Read Guarayu 1 CORINTIOS 10 Bible Online

1 CORINTIOS 10 - Guarayu bible

1 CORINTIOS 10

¹Che rɨvrɨ eta, che aipota peyemoma'endu'ara yande ramoi araka'endar gwata agwer rese, esepia akoi Tüpä opa tuprɨ oyopɨ mba'e pɨ̇tü pɨpe. Paragwasu Pïra va'e avei osasa opakatu yuvɨreko araka'e.

²Egwë e'i ete opakatu ogwatase mba'e pɨ̇tüvrɨ rupi iyavei paragwasu osasase yuvɨreko, opa ñapirämosa Moisés rupi ogwata agwä yuvɨreko araka'e.

³Iyavei opakatu a'e yuvɨrekoi va'e yuvɨro'u tembi'u Tüpä ombou va'e chupe narä yuvɨreko

⁴yuvɨroɨ'u avei opakatu Tüpä ombou va'e i'ɨgwarä yuvɨreko. Esepia a'e ita inungar Cristo sekoi igwatasa rupi yuvɨreko chupe.

⁵Yepe egwë e'i Tüpä opakatu yande ramoi upe viña, seta iteanga rumo ava ipa'ü pendar nda'ei avɨye va'e ipɨ'a rupi yuvɨreko, ipɨpe sui opa omano ɨvɨ iporupɨre'ɨ̇sa rupi araka'e.

⁶Ko opakatu mba'e sembiapokwer yuvɨreko a'e yande mbo'e agwä, a'ese yande ndayaipotarai chira yaiko va'erä mba'e-mba'e tëi pɨpe, inungar a'e ava imba'e potarai yuvɨreko araka'e.

⁷Sese, pe ndapeyerurei chira mba'e ra'anga upe tëi, inungar a'e yuvɨrekoi ipa'ü pendar araka'e, esepia Ikwachiaprɨ pɨpe aipo e'i ete: “Esepia ava okaru agwä oyuvɨrogwapɨ ite yuvɨroɨ'u agwä araka'e, ipare rumo oyembopieta agwä yuvɨropü'apa ovɨ'aretesave yuvɨreko.”

⁸Ndayayemboagwasa-gwasa tëi chira inungar amove a'e egwë e'i yuvɨreko, ipɨpe sui tëi ñepëi arɨ pɨpe a'e opa omano veintitrés mil tuprɨ yuvɨreko araka'e.

⁹Ndayasekoa'ä-a'ä tëi chiaveira yande Yar, inungar a'e yuvɨreko, ipɨpe sui oyeyukapa uka mboi osu'usa pɨpe yuvɨreko.

¹⁰Iyavei ndayande ñe'ë marä-marä tëi chira Tüpä rese, inungar a'e egwë e'i yuvɨreko, ipɨpe sui Tüpä ombou gwembigwai ava yukasar ɨva sui a'e ava yukapa agwä araka'e.

¹¹Ko opakatu yande ramoi upe mba'e oime va'e araka'e ikwachiaprɨ yande ipa yaiko va'e upe narä, yande sɨkɨye agwä avei.

¹²Sese, akoi ava oyeeko movɨräkwä tuprɨ pota va'e, toñearö katu ovɨapi e'ɨ̇ va'erä mba'e tëi pɨpe.

¹³Pe rumo kurïtëi ndapeiko vɨtei ete tekoa'äsa yavai va'e pɨpe. Sese peyeroyaño itera Tüpä rese, a'e ni'ä oikwa pe yemovɨräkwäsa, noñokwai chira tekoa'äsa imbou peü. Akoi mba'e tëi oimese pe rekoa'äse, Tüpä ombou voiñora pirätäsa evokoi mba'e tëi sui pe së agwä, chupe pe ñemosa agwä.

¹⁴Sese, che rɨvrɨ eta che rembiaɨsu, peyepepɨ mba'e ra'anga mboeteisa sui.

¹⁵Ava ni'ä peiko pesendukwa va'erä mba'e, evokoiyase peporandu ko che remimombe'ugwer rese peyeupe ikwa tuprɨ agwä.

¹⁶Akoi yaɨ'use uva rɨkwer sovasaprɨ ipɨpe yamboetei Tüpä sereko yepi, a'ese oyoya gwasu Cristo rese yaiko suvɨ pɨpe sui; ya'use ko mboyape imboya'o-ya'oprɨ, a'ese oyoya gwasu yaipɨsɨ Cristo retekwer yandeyeupe narä.

¹⁷Yepe yandereta iteanga yaiko viña, opakatu ite ni'ä ya'u mboyape ñepëi ava sui, ipɨpe sui avei yaiko ñepëi ava nungar yepi.

¹⁸Peyapɨsaka akoi ava araka'endar Israel rekokwer rese: esepia akoi yuvɨro'u va'e Tüpä upendar mba'e seropove'ëprɨ, a'e evokoiyase chupendar ite yuvɨrekoi.

¹⁹Che rumo mba'e ra'anga avɨye va'e ite nda'ei, iyavei mba'e ro'o ikwave'ëprɨ mba'e ra'anga upe, avɨye katu ite nda'ei avei.

²⁰Ko rumo, akoi ava ndoikwai va'e Tüpä oikwave'ë mba'e karugwar upe tëi yuvɨreko yepi, nda'ei rumo Tüpä upe narä egwë e'i yuvɨreko, che evokoiyase ndaipotai karugwar upe narä tëi egwë peye va'erä peiko.

²¹Peɨ'use yande Yar ɨgwa rɨru pɨpe, a'ese ndiyai ete peɨ'u va'erä karugwar ɨgwa rɨru pɨpe; ndiyai avei pekaru va'erä yande Yar karusave, pekaruse karugwar karusave.

²²¿Yasekara pi'ä yande Yar ñemoɨrösa yande yeupe narä? ¿Yande pi'ä yande pirätä katu yande Yar sui?

²³Oime pe pa'ü pendar aipo e'i va'e: “Yaikatu ite mba'e apo agwä yande remimbotar rupi.” Supiete avɨye egwë ya'e, nda'ei rumo opakatu mba'e avɨye va'e ipɨpe. Avɨye ite ni'ä yayapo mba'e yande remimbotar rupi, ipɨpe sui rumo nda'ei opakatu yande pɨtɨ̇vɨï Cristo rese yande reko agwä.

²⁴Ndapesekai chira mba'e avɨye va'e peyeupe narä tëi, pesekara rumo ambuae ava upe mba'e avɨye va'e.

²⁵Pe'uño mba'e tembi'u opakatu mba'e mboepɨsa rupi sui perokwa va'e, ndapeporandui chira rumo sese pe pɨ'a ñemoñeta momarä e'ɨ̇ agwä Tüpä rese;

²⁶esepia ɨvɨ opakatu ipor reseve, a'e yande Yar upendar ite.

²⁷Akoi Tüpä reroyasare'ɨ̇ pe so'o ukase oyepɨri pe mbokaru agwä, peso potase ipɨri, pe'uñora mba'e imbouprɨ peü. Ndapeporandui chira rumo sese chupe Tüpä rese pe pɨ'a ñemoñetasa momarä e'ɨ̇ agwä.

²⁸Akoi ava aipo e'ise peü: “Ko mba'e ro'o ikwave'ëprɨ mba'e ra'anga upe tëi”, evokoiyase ndape'ui chira a'e mba'e ro'o, egwë peyera peü imombe'usar rereko megwä e'ɨ̇ agwä ava pɨ'a ñemoñeta momarä e'ɨ̇ agwä avei.

²⁹Supiete che añe'ë ko ambuae ava pɨ'a ñemoñetasa rese, nda'ei pe pɨ'a ñemoñetasa rese. Che namondoi chietera che rekokwer ambuae ava mba'e tëi pɨpe vɨreko va'erä yuvɨreko.

³⁰Iyavei avɨye ndeu a'ese Tüpä upe mba'e a'u va'e rese, sese revo ndiyai ete ava iñe'ë marä yuvɨreko cheu Tüpä upe avɨye che'esa pɨpe.

³¹Iyakatu rumo pe'use mba'e, peɨ'use avei, anise mba'e peyapose, peyapo ru opakatu Tüpä mboeteisa pɨpe.

³²Supiete ndapemboyekwai chira pe rekokwerai; judío eta upe, ava nda'ei va'e judío yuvɨrekoi va'e upe, anise Jesús reroyasar yuvɨrekoi va'e upe avei.

³³Che opakatu che rembiapo pɨpe aipota ite mba'e tuprɨ apo agwä opakatu ava upe narä, nda'ei cheyeupeño mba'e tuprɨ aseka, ambuae ava upe avei mba'e tuprɨ aipota iñepɨsɨrö agwä yuvɨreko.