Read Guarayu 1 CORINTIOS 11 Bible Online

1 CORINTIOS 11 - Guarayu bible

1 CORINTIOS 11

¹Che rakɨkwei moña katu peye, inungar che asakɨkwei moña Cristo vichiko.

²Avɨye peü che rɨvrɨ eta esepia ndaperesai ete che sui yepi iyavei pema'endu'a pegwataño vɨte avei che opombo'e va'e agwer rupi.

³Che rumo aikwa uka tuprɨ pota peü, Cristo ni'ä sekoi ñepëi-pëi kuimba'e kwaisar, kuimba'e evokoiyase gwembireko kwaisar sekoi. Egwë e'i avei Tüpä Gwa'ɨrɨ Cristo upe.

⁴Akoi kuimba'e Cristo upe ñemonu'äsave oakä ndɨru ndosekɨise oyerure agwä, anise Tüpä ñe'ëngagwer mombe'u agwä, a'e egwë e'i gwerekwar Cristo mboetei e'ɨ̇sa pɨpe.

⁵Iyavei akoi kuña ndoyopɨise oäkä oyerure agwä, anise Tüpä ñe'ëngagwer mombe'u agwä, a'e egwë e'i omer mboyeroya e'ɨ̇sa pɨpe. A'e kuña evokoiyase ndoyavɨi oñeapipa tuprɨ va'e.

⁶Akoi kuña ndoyopɨ potaise oäkä, tayapekäraisa tuprɨ. Ochïse rumo oapekaräi agwä, evokoiyase toyopɨño oäkä sereko.

⁷Kuimba'e rumo ndoyopɨi chira oäkä sereko, esepia a'e Tüpä ra'anga ite sekoi omboyekwa avei Tüpä porañetesa oyese. Kuña rumo omboyekwa omer rekokwer porañetesa oyese yuvɨreko,

⁸esepia Tüpä oyapose kuimba'e, nda'ei kuña sui vɨnose, kuimba'e sui ni'ä kuña oyapo.

⁹Iyavei nda'ei kuña upe narä Tüpä oyapo kuimba'e, a'e rumo oyapo kuña kuimba'e upe narä.

¹⁰Sese iya ite kuña vɨrekora oakängaosa, omboyekwa va'erä omer mborerekwasa mbigwai ɨva pendar mborerekwasa avei.

¹¹Supiete, yande Yar reroyasar yaiko va'e ko tekokwer rese, yañepɨtɨ̇vɨï oyoya yaiko, evokoiyase kuimba'e ndoikatui kuña pore'ɨ̇, kuña avei ndoikatui kuimba'e pore'ɨ̇ yuvɨreko.

¹²Esepia, yepe supiete kuimba'e sui yapoprɨ kuña, ipare rumo kuña sui o'a kuimba'e; opakatu rumo oyoya tuprɨ Tüpä suindar yuvɨrekoi.

¹³Evokoiyase peyapɨsaka tuprɨ ko rese, iya pi'ä kuña noñeakäpɨi va'e oyerure agwä Tüpä upe.

¹⁴Yande ite ni'ä yaikwa oimese yemochisa kuimba'e oyembo'a vuku gwasuse;

¹⁵kuña rumo ovɨ'arete o'a vuku porañetesa rese; esepia chupe imondoprɨ ite a'e i'a ñakäpɨ agwä.

¹⁶Akoi ava oñe'ë pota va'e ko tekokwer rese, toikwa rane esepia ore oroiko va'e Tüpä reroyasar, ndoroikwai ete ambuae tekokwer.

¹⁷Ko ambuae mba'e rese rumo ndaikatui ete, avɨye tuprɨ yuvɨrekoi che'e agwä peü, esepia aipo pe ñemonu'äsave, mba'e tëiete aipo peyapo.

¹⁸Esepia yɨpɨndar che ayandu peñemonu'äpase aipo oyese yande Yar mboetei agwä pe pɨ'a ñemoñetasa nda'oyoyai va'e pɨpe peiko; amove ayanduse pe reräkwä aroya ite.

¹⁹¡Iya ite revo peyemboya'opara pe pɨ'a ñemoñetasa sui, a'ese ikwasara uma sekoi Jesús reroyasar ite!

²⁰Peñemonu'äse pe pɨ'a ñemoñetasa nda'oyoyai va'e pɨpe pe karu agwä, nda'ei yande Yar rese pe yemoma'endu'asave egwë peye.

²¹Esepia aipo pekaruse, pe rane aipo pepoyava pekaru; ambuae aipo evokoiyase ndasɨepoi tëi yuvɨreko, ambuae rumo pe pa'ü pendar aipo oyembosavaɨpoño yuvɨreko.

²²¿Ndipoi vo pe rëtä, a'eve pe karu agwä peɨ'u agwä avei? ¿Ma'erä peroɨrö ambuae Tüpä reroyasareta ndovɨrekoi va'e mba'e yuvɨreko? ¿Marä a'era vo evokoiyase peü? ¿Avɨye ite yuvɨrekoi a'era pi'ä? ¡Ani chietera ko mba'e pe rembiapoai rese!

²³Ko ñe'ësa aipɨsɨ va'e yande Yar suindar amombe'u va'e peü: A'e pɨ̇tü pɨpe akoi Jesús mbogwaisar opɨsɨ agwä renonde, a'ese mboyape oipɨsɨ

²⁴avɨye ndeu o'e pare Tüpä upe, ombo'i-mbo'i a'ese aipo e'i gwemimbo'e eta upe: “Ko che rete amondo va'e manosave mba'e tuprɨ pe reko agwä, egwë peyera che rese pe ma'endu'asa pɨpe peiko.”

²⁵Egwë e'i avei okarure, oipɨsɨ ɨgwa rɨru aipo e'i: “Ko uva rɨkwer omboyekwa peü Tüpä oyapora mba'e ipɨasu va'e pe reko va'erä. Che ruvɨ pɨpe rumo yaposara evokoiyase ko arɨ pɨpe suive, peyemoma'endu'ara peɨ'use che rese yepi.”

²⁶Esepia akoi pe'use ko peɨ'use avei, peyemoma'endu'ara pemombe'u aveira yande Yar mano agwer opakatu ava upe, egwë peyera iyevɨ rärö peiko.

²⁷Evokoiyase akoi ava okaruño tëi va'e, yuvɨroɨ'uño tëi va'e avei Yar mboetei e'ɨ̇save, a'e evokoiyase oyemboangaipa yuvɨreko yande Yar rembiapokwer omondose gwetekwer, iyavei oipɨyerese vuvɨ.

²⁸Sese ñepëi-pëi tipɨ'añemoñeta rane oyakatu gwekokwer rese ava ko mboyape u agwä renonde, oɨ'u agwä renonde avei ko uva rɨkwer yuvɨreko.

²⁹Esepia akoi pe'use iyavei peɨ'use yande Yar retekwer, pe pɨ'a ñemoñeta e'ɨ̇sa pɨpe, pekaru iyavei peɨ'u ipɨpe sui peseka mba'e naporäi va'e peyeupe narä peiko.

³⁰Ichui ni'ä seta pemba'easɨ, oime seta nipirätä iri va'e avei pe pa'üve, oime avei omano va'e pe pa'ü pendar.

³¹Sese yande rane ite yaikwara yande rekokwer katuprɨsa, a'ese yande Yar nomboui chira poronupasa yandeu,

³²yepe yande Yar ombou poronupasa yandeu a'e rumo yande reko tuprɨ agwä egwë e'i, nda'ei yande kañɨ agwä opakatu ava vɨroyasare'ɨ̇ reseve.

³³Sese che rɨvrɨ eta, akoi peñemonu'äse pekaru agwä, peñearö ranera oyoya tuprɨ pe karu agwä.

³⁴Akoi ava ndasɨepoise yuvɨreko, tokaru rane gwëtäve, a'ese Tüpä nomondoi chira chupe poronupasa yuvɨrasose ñemonu'äsave. Iyavei che asose eipeve pe repia opara ambuae mba'e amoigätu vicho peü.