Read Guarayu 1 CORINTIOS 3 Bible Online

1 CORINTIOS 3 - Guarayu bible

1 CORINTIOS 3

¹Che rɨvrɨ eta, ndapegwata tuprɨi pɨ'a ñemoñetasa avɨye va'e rupi, pe rumo pegwataño vɨte ava tëi pɨ'a ñemoñetasa rupi peiko, pe pɨ'a ñemoñetasa inungar pitani pɨ'a ñemoñetasa tëi Cristo rese.

²Sese che opombo'e mba'e ndayavai va'e rese, inungar pitanimi ndoikatu vɨtei va'e okaru, esepia pe ndapesendukwa katu vɨtei ete Tüpä ñe'ëngagwer yavai va'e peiko. ¡Iyavei kurïtëi ndapeikatu vɨtei ete sendukwa agwä.

³esepia pegwata vɨteño ko ɨvɨ pɨpendar pɨ'a ñemoñetasa rupi! Peyemoekate'ɨ̇-te'ɨ̇ oyeupe, iyavei peñemoɨrö peyeupe pe pɨ'añemoñeta nda'oyoyai va'esa pɨpe, pe evokoiyase peyapo ava ndoikwai va'e rembiapo nungar tëi.

⁴Esepia oime aipo e'i va'e: “Che aiko Pablo rupindar”, iyavei ambuae aipo e'i: “Che aiko Apolo rupindar”, pe evokoiyase peiko ava ɨvɨ pɨpendar pɨ'a ñemoñetasa rupi tëi.

⁵Evokoiyase, ¿Mba'e vo Apolo sekoi?, ¿Mba'e vo Pablo sekoi? A'e yuvɨrekoi Tüpä rembigwai, ipɨpe sui ni'ä pereko poreroyasa peyese. Yande Yar ni'ä ombou ñepëi-pëi mboravɨkɨ yandeu chupe yayapo va'erä:

⁶che rane inungar añotɨ̇ va'e mba'e rä'ɨi pe pɨ'a pɨpe; Apolo evokoiyase inungar imboɨ'usar, Tüpä rumo inungar omboorɨ va'e peü.

⁷Evokoiyase ndiyai peyeroya mba'e tɨ̇sar rese tëi, imboɨ'usar rese tëi avei, peyeroya katura rumo Tüpä rese, a'e ni'ä pe reko momirätä katu pe rereko.

⁸Mba'e tɨ̇sar iyavei imboɨ'usar oyoya tuprɨ iporavɨkɨ yuvɨreko, sese Tüpä omboepɨra ñepëi-pëi upe iporavɨkɨgwer rupi.

⁹Ore oroporavɨkɨ va'e Tüpä upe, pe evokoiyase ɨvɨ nungar peiko Tüpä poravɨkɨ agwä iyavei pe inungar Tüpä omopü'a ramomi va'e oɨ.

¹⁰Che aiko oɨ aposar esepia Tüpä oyapo uka oɨ vɨräkwäsa cheu, ambuae evokoiyase omopü'a i'arɨve. Ñepëi-pëi peiko va'e peikwa tuprɨra imopü'a,

¹¹esepia ndipoi chietera ambuae omopü'a va'e oɨ vɨräkwäsa yapoprɨ arɨve, esepia a'e ite Jesucristo sekoi.

¹²Ko oɨ movɨräkwäsa arɨve, a'ese ñepëi oikatura imopü'a oro pɨpe, gwarepochi iyavei ita avɨye va'e pɨpe, anise ɨvɨra, kapi'i, anise takwar pɨpe avei;

¹³a'e iporavɨkɨ agwer rumo arɨ kañɨse ikwasa tuprɨra ñepëi-pëi yuvɨreko; esepia a'e arɨ pɨpe yande Yar oura tata reseve, ñepëi-pëi pe poravɨkɨ agwer kwa agwä.

¹⁴Akoi ava oporombo'e tuprɨ va'e inungar ava oyapo oɨ ndokai va'e, a'e oipɨsɨra oporavɨkɨ reprɨ;

¹⁵ambuae oporombo'e rai va'e rumo inungar oɨ oyapo okai va'e tëi, iporombo'e agwer opa tëietera okañɨ, a'e gweraño evokoiyase oñepɨsɨrö säira tata gwasu sui.

¹⁶¿Ndapeikwai vo Tüpä rëtä peikose, iyavei Tüpä Espíritu sekoise pe rese?

¹⁷Oimese ava omomarä va'e Tüpä rëtä, Tüpä evokoiyase omboura oñemoɨrösa a'e ava upe, esepia Tüpä rëtä nimaräi va'e ite; iyavei evokoi Tüpä rëtä a'e ite ni'ä peiko.

¹⁸Peyembopa eme katu pe ae: oimese pe pa'ü pendar inungar imba'ekwa vai va'e ko ɨvɨ pɨpendar pɨ'a ñemoñetasa rupi tëi, toyeekomombegwemi rane oarakwa agwä, a'ese osupitɨra mba'e kwasa avɨye va'e.

¹⁹Esepia ava yarakwa vai va'e ko ɨvɨ pɨpe a'e Tüpä upe egwë e'i tëi va'e. Inungar Ikwachiaprɨ pɨpe aipo e'i: “Tüpä opa ite osekopɨ ava imba'ekwa vai va'e mba'ekwasa pɨpe.”

²⁰Aipo e'i avei: “Yande Yar oikwa ite ava yarakwa vai va'e pɨ'a ñemoñetasa, a'e egwë e'i tëi va'e.”

²¹Sese, ndapeyeeko mboɨvateai chira ava tëi porombo'esa rupi; esepia opakatu mba'e oime va'e peündar ite:

²²Pablo, Apolo, Pedro avei, opakatu ɨvɨ pɨpendar mba'e oime va'e, tekovesa, manosa avei, yasepia va'e, iyavei mba'e oime va'erä, a'e ni'ä opakatu peü narä ite,

²³iyavei pe ni'ä Cristo upendar, Cristo evokoiyase Tüpä upendar sekoi.