Read Guarayu 1 CORINTIOS 4 Bible Online

1 CORINTIOS 4 - Guarayu bible

1 CORINTIOS 4

¹Pe rumo iya orekwa ukaño ite peye inungar Cristo pɨtɨ̇vɨïsar, iyavei orekwaita ite ni'ä Tüpä suindar ñe'ësa oyekwa ramo va'e rese oreporombo'e agwä.

²Supiete kurïtëi, akoi vɨreko va'e okwaitära iya ite omboyekwa okwaita mboavɨye tuprɨsa.

³Marä etemo che areko pe che rekokwer rese peporanduse viña, iyavei cheu mba'emi tëi che reraso potase ava tëi porandusave che rekokwer rese porandu agwä yuvɨreko. Che avei ndaikwai ete che rekokwer katuprɨsa.

⁴Yepe, ndaikwai mba'e che rembiavɨ che kwaita sui viña, ndiyai chira rumo amboavɨye tuprɨ che kwaita a'e va'erä. Esepia yande Yar ñoite oikwa opakatu mba'e che rembiapo.

⁵Sese ani, peñemoñeta ava rese tenondeve tëi; pesärö ranera rumo yande Yar yevɨ agwä, a'e ni'ä omboyekwara opakatu mba'e ndoyekwai va'e, iyavei omboyekwapara ñepëi-pëi yande pɨ'a ñemoñetasa. A'ese Tüpä omondora vɨ'aretesa ñepëi-pëi upe narä.

⁶Che rɨvrɨ eta, añe'ë ko mba'e rese peü peiko tuprɨ agwä rese, inungar Apolo rekokwer che rekokwer aveino. Amombe'u peü peyembo'e agwä ore rekokwer sui peiko e'ɨ̇ va'erä kokotɨ tëi ikwachiaprɨ sui, iyavei ipɨpe sui ndipoi chira ava oyeeko mboɨvateai va'e, ambuae mbɨa sui.

⁷Esepia ¿Uma vo ombou ndeu ndereko mboɨvateai agwä ambuae ava sui? ¿Mba'e vo ipane ndeu ndereipɨsɨi va'e Tüpä sui? Esepia a'e omondo opakatu mba'e ndeu, ¿ma'erä evokoiyase ereyeeko mboɨvateai eiko, ndoyavɨi ndeye sui tëi ereyapo va'e mba'e?

⁸Ndoyavɨi pereko ite va'e opakatu mba'e pe remimbotar viña, ndoyavɨi avei nipanei va'e ite mba'e peü, iyavei ndoyavɨi mborerekwar ɨvate katu va'e peiko ore sui. ¡Mborerekwar ɨvate katu va'e peikose viña, a'ese ore avei oroikera pe mborerekwasave!

⁹Ore rumo Jesús ñe'ë mombe'usar oroiko va'e ndoyavɨi cheu Tüpä ore renoi ipa tëi va'e ore mano tëi agwä. Sese seroɨömbrɨ oroiko inungar ava imbogwaiprɨ yukapɨrä, egwë oro'e oroiko opakatu ava rovake, mbigwai ɨva pendar rovake avei.

¹⁰Ore oroiko va'e Cristo rese, ndoyavɨi egwë oro'e ñotëi va'e; pe evokoiyase pereko pe mba'e kwasa Cristo sui, peyeapo imba'ekwa eteprɨ va'e peiko Cristo rese pe rekosa pɨpe. Iyavei ore ndoyavɨi ndaseko pirätäi va'e oroiko ava rembiepiave; a'eseve avei rumo peyeekomomirätä tëi peiko. Ore seroɨrömbrɨ tëi oroiko, pe evokoiyase ava pe mboetei gwasu pe rereko yuvɨreko.

¹¹Kurïtëi oroikove vɨte ite ore rɨepore'ɨ̇ pɨpe, ore usei tëi iyavei ndore turukwai ete; ava evokoiyase marä-marä tëi ore rereko yuvɨreko, iyavei ndorovɨrekoi ore rëtä

¹²ore oroporavɨkɨño ite oroyembogwerai tëi ipɨpe. Ava rumo iñe'ë marä-marä tëiete yuvɨreko oreu; ore evokoiyase oromboyevɨño iñe'ë mba'e tuprɨ pɨpe chupe; ore reka-reka katuño ite ore momarä agwä yuvɨreko; ore rumo oroñemosaño ite yuvɨreko chupe.

¹³Iñe'ë-ñe'ë tëi ore rese yuvɨreko, oromboyevɨ rumo ñe'ësa avɨye va'e pɨpe yuvɨreko chupe. Ore rereko ɨtɨ nungar tëi iyavei ore rereko inungar ava egwë e'i tëi va'e yuvɨreko. Kurïtëi egwë e'i vɨteño ite yuvɨreko oreu.

¹⁴Nda'ei pe mochi agwä aipo a'e ikwachia peü, egwë e'i rumo pe mboarakwa agwä tëi, inungar che ra'ɨrɨ ite, che rembiaɨsu opovɨreko.

¹⁵Esepia, yepe pereko atɨ pe pɨtɨ̇vɨïsar Cristo rese pe reko agwä viña, ndaperekoi rumo seta pe yesupa, esepia che amombe'use ni'ä ñe'ësa pɨsɨrösa resendar peü, a'ese ramo peroya Cristo Jesús. Seroyasa pɨpe evokoiyase che inungar pe yesupa ite aiko peü.

¹⁶Sese, che aipota ite che rekokwer moña agwä peye.

¹⁷Sese che amondo che rembiaɨsu Timoteo peü, che ra'ɨrɨ nungar omboavɨye va'e okwaita yande Yar suindar. A'e pe moma'endu'ara Cristo rupi che gwatasa rese. A'e oyoya che porombo'e agwer rese che sose opakatu Jesús reroyasar ñemonu'äsa rupi yepi.

¹⁸Oime pe pa'ü pendar oyeroya iteanga va'e oyese ipɨ'a ñemoñeta avei ndou chira revo yande repia e'i cheu yuvɨreko viña;

¹⁹aso pɨ'aiviño itera rumo pe repia, yande Yar oipotase cheu. A'ese aikwa tuprɨra oyemboɨvateai va'e reko pirätäsa yuvɨreko, iyavei nda'ei chira iñe'ë gweraño tëi aikwara.

²⁰Esepia Tüpä mborerekwasa iyavei ipirätäsa rese, nda'ei chira ñe'ësaño tëi.

²¹¿Mba'e vo peipota peiko: peipota tie aso poronupasa reseve, anise tie asora mba'e tuprɨ pɨpe pe repia?