Read Guarayu 1 CORINTIOS 5 Bible Online

1 CORINTIOS 5 - Guarayu bible

1 CORINTIOS 5

¹Yandusa avei ñepëi pe pa'ü pendar vɨrekose gwembirekorä osɨ rekoyar. Evokoi oyapo va'e yemboagwasasa naporäi ete, Tüpä reroyasare'ɨ̇ ite ndoyapoi evokoi nungar mba'e tëi yuvɨreko.

²¡Pe rumo peyeekomboɨvateai peiko! ¡Iyakatu rumo ndapeyembovɨ'ai chira evokoi nungar mba'e tëi repiase viña! Evokoi nungar ava iyakatu ite pemboyepepɨra pe pa'ü sui.

³Yepe ni'ä che teiete ndaikoi pe pa'üve viña, pe rese che ma'endu'asa pɨpe rumo aikove ite pe pa'üve; iyavei aikwa voi ete aipo oyapo va'e mba'e tëi rekokwer inungar-ra aiko va'e ite pe pa'üve viña.

⁴Akoi peñemonu'äse, che avei aikora pe pa'üve che ma'endu'asa pɨpe, iyavei yande Yar Jesús pirätäsa avei sekoira pe rese,

⁵evokoi ava timondosa Karugwar povrɨve sekokwerai mokañɨ agwä, ipɨpe sui sekokwer toñepɨsɨrö yande Yar yevɨse kuri.

⁶Ndapeyeeko mboɨvateai chira peiko ko mba'e tëi oimese pe pa'üve. Esepia peikwa ni'ä ko ñe'ësa aipo e'i va'e: “Yepe chi'ïmi imondosa mboyape mboapeposa mboyapegwä rese viña, a'e rumo oikepa tuprɨ mboyapegwä rese.”

⁷Sese pepoi evokoi nungar mboyape mboapeposa naporäi va'e sui, a'ese peikora inungar mboyape yapoprɨ ipɨasu ramo va'e. Iyavei peiko inungar mboyape ndovɨrekoi va'e omboapeposa i'usa va'e Pascua pieta pɨpe yepi. Esepia yande Yar Cristo iparaɨsu omano yande repɨrä, inungar ovesa yukaprɨ angaipa mokañɨ agwä Pascua pɨpe.

⁸Sese iya yamboeteira yande pieta Pascua yaiko inungar mboyape ndayapepoi va'e iyavei mba'e supi tuprɨ va'e rese, nda'ei chiaveira yamboetei mboyape mboapeposa kwakwa va'e nungar pɨpe tëi ani chiaveira porombopasa tekokwer naporäi va'e pɨpe.

⁹Ambuae aikwachia va'e pɨpe aipo a'e peü ndapemborɨi chira ava oyemboagwasa-gwasa tëi va'e.

¹⁰Iyavei ko namombe'ui peyepepɨ va'erä opakatu mba'e ɨvɨ pɨpendar oime va'e yemboagwasasa sui, ani chiaveira mba'e ñomiprɨ sui, ani chiaveira mondasa sui, ani chiaveira yeruresa mba'e ra'anga upe tëi, imboavɨye agwä pesë itera ko ɨvɨ pɨpe sui viña.

¹¹Che akoi aipo a'e peü ndapemborɨi chira ava che Jesucristo reroyasar aiko e'i anga'u tëi va'e, oyemboagwasase, anise oipotaraise ambuae ava mba'e, oyerure tëi va'e mba'e ra'anga upe, iyavei ima'echiröiai va'e, kagwar tëi va'e, anise imondarai va'e. Evokoi nungar ava pɨri ñepëi yepe ndapekarui chietera.

¹²Cheu ndiyai ete ava ndoyuvɨrekoi va'e Tüpä rese rekokwer rese porandu agwä; Tüpä a'e ava yuvɨrekoi va'e rekokwer opara oikwa koiye. Pe rumo pe kwaita ite Tüpä rese yuvɨrekoi va'e upe pe porandu agwä sekokwer rese. Sese pemboyepepɨño ite osɨ rekoyar rese sekoi va'e pe pa'ü sui.