Read Guarayu 1 CORINTIOS 7 Bible Online

1 CORINTIOS 7 - Guarayu bible

1 CORINTIOS 7

¹Kurïtëi amboyevɨra peü akoi pe porandusa mendasa resendar peikwachia va'e imbou cheu. Avɨyeño ite ni'ä ava nomendaise viña;

²pe agwasa-gwasa tëi e'ɨ̇ agwä rumo, iyakatu perekoño itera pe rembireko ñepëi-pëi, kuña avei evokoiyase tovɨreko oyakatu omer yuvɨreko.

³Kuimba'e tomboavɨye omendasa gwembireko rese iyavei kuña omenda va'e, tomboavɨye avei mendasa omer rese a'e ni'ä yande kwaita yamendase.

⁴Esepia kuña omenda va'e gwetekwer nda'e iri oyeupe narä vɨreko, omer upe narä ite rumo. Iyavei kuimba'e omenda va'e, nda'ei avei gwetekwer oyeupe narä vɨreko, a'e rumo gwembireko upe narä ite vɨreko.

⁵Ndiyai peate'ɨ̇ oyeupe, oyoya rumo yayapo eme mba'e peyese peyeupe pe yerokɨ agwä Tüpä upe, a'e avɨyeño. Ndiyai rumo peyoeya pukura, avɨyeteramo ndapeñemosaï chira, ipɨpe sui avɨyeteramo Karugwar peätoi tiëtera.

⁶Nda'ei che opokwai tomenda yuvɨreko viya peü.

⁷Che aipota, peiko va'erä viña inungar che ndaikoi mendasa pɨpe; Tüpä rumo ombou ñepëi-pëi tekokwer yande yakatu yande rekorä.

⁸Iyavei nomenda vɨtei va'e upe, kuña imer mano va'ekwer upe avei amombe'u pota mba'e, iyakatu revo ndapemendai chietera, inungar che aiko.

⁹Ndapeikatuise rumo pe ñemosa agwä, pemendaño, esepia avɨye katu itera pemenda poropotarai rägwer sui.

¹⁰Che aipo amombe'u omenda va'e upe, topoi eme kuña omer sui viya, nda'ei cheyesui tëi aipo a'e: a'e rumo yande Yar porokwaita ite.

¹¹Akoi opoise kuña omer sui, tomenda iri eme, anise toyevɨ iri omer upe. Iyavei kuimba'e omenda va'e, topoi eme avei gwembireko sui.

¹²Ambuae ava opakatu upe rumo che yesui ete aipo a'e, esepia nda'ei ete yande Yar suindar ñe'ësa, akoi Jesús reroyasar vɨrekose gwembireko nda'ei va'e Jesús reroyasar, a'e kuña sekoi potaño itese sese, evokoiyase a'e topoi eme ite gwembireko sui.

¹³Iyavei akoi kuña Jesús reroyasar, vɨrekose omer nda'ei va'e Jesús reroyasar, a'e kuimba'e sekoi potaño itese sese, evokoiyase a'e kuña topoi eme ite ichui.

¹⁴Esepia ko kuña Jesús reroyasar vɨrekose omer nda'ei va'e Jesús reroyasar, nda'ei ete angaipa pɨpe yuvɨrekoi Tüpä rovai; egwë e'i aveira kuimba'e Jesús reroyasar vɨrekose gwembireko Jesús reroyasare'ɨ̇, egwë nde'ise rumo, pe ra'ɨrɨ avei ndoyavɨi chira nda'ei va'e Jesús reroyasar ra'ɨrɨ yuvɨreko viña. A'e pe ra'ɨrɨ rumo Tüpä upendar ite yuvɨrekoira.

¹⁵Supiete kurïtëi, pemenda va'e nda'ei va'e Jesús reroyasar rese, pepoi eme katu ichui. Evokoiyase Jesús reroyasar kuña anise kuimba'e yuvɨrekoira mba'e tuprɨ pɨpe, esepia Tüpä oñe'ë ite peü peiko va'erä teko tuprɨsa pɨpe.

¹⁶Esepia ¿nde kuña omenda va'e marä ere vo ikwa, ereikatura pi'ä nde mer pɨsɨrö agwä eiko? ¿Iyavei nde kuimba'e omenda va'e, ereikatura pi'ä nderembireko pɨsɨrö agwä eiko?

¹⁷Ñepëi-pëi yande Yar ombou tekokwer yaiko va'erä yande remimbotar rupi, inungar Tüpä yɨpɨndar yande poravo oiko. Ko mborokwaita opakatu rupi ete amombe'u Jesús reroyasar upe vichiko.

¹⁸Akoi Tüpä osenoise ava oyemocircuncida va'e, ndape ñomichira pe yemocircuncidasa, akoi osenoi va'e avei ava nimbocircuncidaiprɨ, a'e ndiyai ete oyembocircuncida va'erä.

¹⁹Esepia a'e oipota yande reko tuprɨ, nda'ei chira yande yembocircuncida pɨpe gweraño, Tüpä rumo oipota yamboyeroya va'erä iporokwaita.

²⁰Ñepëi-pëi peiko va'e perekora perekokwer ɨ̇vɨisa inungar yɨpɨndar Tüpä oñe'ëse peü.

²¹Akoi Tüpä oñe'ëse ndeu a'ese nde ereiko mbigwai tëiete, sese ani nde pɨ'a ñemoñeta iri; yepe erereko tëira nde rekokwer mba'e avɨye va'e pɨpe viña, iyakatu rumo nde ereyapo tuprɨ ite mba'e ipɨpe.

²²Esepia pe mbigwai tëi peiko viña, peroyase rumo yande Yar, a'ese inungar nda'e iri va'e mbigwai peiko chupe; iyavei pe no, nda'ei va'e mbigwai tëi peiko va'e, yepe egwë peye viña, peroyase rumo Cristo, a'ese sembigwai peiko.

²³Tüpä opa ite perekokwa oyeupe narä, sese ndiyai ete ambuae ava povrɨve tëi peiko.

²⁴Sese, che rɨvrɨ eta, peikoveño itera pe rekokwer pɨpe inungar yɨpɨndar peiko tekokwer ɨ̇vɨisa pɨpe a'ese Tüpä oñe'ë peü.

²⁵Akoi kuña nomenda vɨtei va'e yuvɨreko, a'e chupe narä ndarekoi Yar suindar che ñe'ë agwä; che rumo amondora che pɨ'a ñemoñetasa yuvɨreko chupe, esepia yande Yar che paraɨsuerekosa pɨpe ite imboyeroyaprɨ aiko.

²⁶Cheu avɨye katuño ite nomendai va'e egwë e'iño tëise yuvɨreko viña. Esepia ni'ä tekokwer yavai eteanga kurïtëi.

²⁷Akoi pemendase, pepoi eme ite oyesui; akoi ndapemendaise, ndapeseka iri chietera peyeupe.

²⁸Akoi eremendase, ndereyemboangaipai ete; iyavei kuñatäi nomenda vɨtei va'e, ndoyemboangaipai ete. Akoi omenda va'e upe rumo yavai katura ko ɨvɨ pɨpe yuvɨreko. Sese che ndaipotai evokoi nungar mba'e pɨpe yuvɨrekoi va'erä.

²⁹Che rɨvrɨ eta, aipo mba'e amombe'u pota peü: Ndipukuvei ko arɨ naporäi va'e yepota agwä yandeu. Sese ko pɨpe suive tuprɨ omenda va'e toyuvɨrekoi nomendai va'e nungar yande Yar rese opɨ'a ñemoñetasa pɨpe;

³⁰akoi ndovɨ'ai va'e, toyuvɨrekoi eme ovɨ'are'ɨ̇sa pɨpe iyavei akoi ovɨ'arete va'e, a'e toyuvɨrekoi eme avei ovɨ'aretesa pɨpe, iyavei vɨrokwa va'e mba'e oma'erä toyuvɨrekoi inungar mba'e ndovɨrokwai va'e oma'erä; yande Yar rese opɨ'a ñemoñetasa pɨpe;

³¹akoi ava ipɨ'añemoñeta katu va'e ko ɨvɨ pɨpendar mba'e poru agwä, tipɨ'añemoñeta eme evokoi nungar mba'e tëi rese yuvɨreko, esepia ko ɨvɨ pɨpendar mba'e yasepia va'e opa tëietera okañɨ.

³²Che ndaipotai ko ɨvɨ pɨpendar rekokwer rese tëi pe pɨ'añemoñeta eteprɨ peiko. Akoi mbɨa nomendai va'e rumo, ipɨ'añemoñeta katuño ite yande Yar rese imbovɨ'a agwä;

³³omenda va'e rumo ipɨ'añemoñeta ko ɨvɨ pɨpendar rekokwer rese tëi gwembireko mbovɨ'a agwä,

³⁴iyavei ipɨ'a ñemoñeta nda'oyoyai ete yuvɨreko. Egwë e'i avei kuña ndovɨrekoi va'e omer kuñatäi nomenda vɨtei va'e ipɨ'a ñemoñeta avei yande Yar upendar mba'e rese yuvɨreko, esepia sekoi pota ite gwetekwer espíritu reseve teko maräne'ɨ̇sa pɨpe; kuña omenda va'e rumo ipɨ'añemoñeta ko ɨvɨ pɨpendar rekokwer rese tëi omer mbovɨ'a agwä oiko.

³⁵Che aipo a'e peü, mba'e tuprɨ pɨpe toyuvɨrekoi viya, nda'ei mba'e yavai va'e pɨpe pe reko agwä, che aipota ite pe reko katuprɨsa pɨpe yande Yar upeño ite mba'e peyapo va'erä pe rekoete pɨpe peiko.

³⁶Akoi ava ipɨ'añemoñeta va'e gwembirekovɨ rese omenda agwä, esepia ni'ä osupitɨ ite i'aravɨter imenda agwä, iyavei a'e ipɨ'añemoñetase oiko omenda agwä, toyapoño gwemimbotar, tomendaño ite gwembirekovɨ rese, esepia mendasa ni'ä nda'ei angaipa.

³⁷Iyavei akoi mbɨa ndoipotaise omenda agwä, iyakatu ite oyapora mba'e gwemimbotar rupi, vɨrekose rumo pɨ'a ñemoñetasa avɨye va'e omenda e'ɨ̇ agwä, a'ese avɨye katu avei.

³⁸Iyavei akoi mbɨa omenda va'e kuña gwemimbotar rese, avɨyeño ite; akoi nomendaise rumo, avɨye katu ite.

³⁹Iyavei akoi kuña omenda va'e, a'e ndiyai ete iyepepɨ agwä omer sui imano e'ɨ̇ vɨteseve; omanose rumo ichui, a'ese ramo a'e kuña upe avɨyeño imenda iri agwä gwemimbotar rupi, yande Yar reroyasar rese avei rumo omendara.

⁴⁰Nomenda irise rumo, avɨye katuño itera. A'e che pɨ'a ñemoñetasa, iyavei revo a'e che pɨ'a ñemoñetasa Tüpä Espíritu suindar ite.