Read Guarayu 2 CORINTIOS 10 Bible Online

2 CORINTIOS 10 - Guarayu bible

2 CORINTIOS 10

¹Che Pablo, añe'ë Cristo poroaɨsusa sekoasɨ e'ɨ̇sa pɨpe avei peü, amove ava pe pa'ü pendar seko mbegwemi tëi yande pa'üve oikose, amombrɨ gwekose rumo oñe'ë pirätä iteanga aipo e'i yuvɨreko cheu viña.

²Che rumo asose pe repia, ndaipotai che pirätäsa mboyekwa agwä pe pa'ü pendar upe, amove rumo ava pe pa'ü pendar ipɨ'añemoñeta, oyapo mba'e ko ɨvɨ pɨpendar pɨ'a ñemoñetasa rupi tëi e'i yuvɨreko cheu, sese che ayemoigätuño ite evokoi nungar ava upe añe'ë pirätä va'erä.

³Supiete ko ɨvɨ pɨpendar oroiko, ore rumo ndoroyapoi mba'e ava ko ɨvɨ pɨpendar rembiapo nungar tëi.

⁴Esepia ore yoepɨsa nda'ei ava ko ɨvɨ pɨpendar yoepɨsa nungar, orovɨreko rumo Tüpä pirätäsa mba'e tëi seko pirätä va'e rekopɨ agwä. Ava arakwasa tëi rekopɨ agwä avei

⁵a'e ipɨpe ore opa orosekopɨ yepoepɨ-epɨsa iyavei opakatu semirä-mirä tëi va'e gweko ɨvate aisa pɨpe ndoikwa uka potai va'e Tüpä rekokwer ava upe. Iyavei opakatu ava pɨ'añemoñeta raisa orosekopɨ Cristo reroya tuprɨ agwä yuvɨreko,

⁶iyavei ore oroyemoigätu ite opakatu ndiporeroyai va'e rekokwer reroyɨ agwä, pe rane rumo peroya tuprɨra.

⁷Pe rumo pema'eño tëi a'e ava rekokwer rese. Akoi ava pe pa'ü pendar oikwa va'e Cristo rese gwekosa, toikwa tuprɨ avei ore Cristo rese ore rekosa yuvɨreko.

⁸Yepe ayeeko mboɨvate che mborerekwasa rese peü viña, ipɨpe rumo nachi ete; esepia yande Yar ombou mborerekwasa cheu pe rekokwer movɨräkwä tuprɨ agwä, nda'ei rumo pe rekokwer momarä agwä.

⁹Anichira pe pɨ'a ñemoñeta pesɨkɨye agwä che rembikwachia sui.

¹⁰Oime ava che rembikwachia upe yavai eteanga sendukwa agwä e'i yuvɨreko, che añe'ëse rumo peü ndayeeko mboɨvateai ete, ndapeyapɨsakai avei che ñe'ë rese.

¹¹Akoi ava omombe'u va'e ko oikwa tuprɨ rane itera eipeve oroso irise, inungar amombe'u che rembikwachia pɨpe amombrɨ che rekose, egwë a'e tuprɨ aveira yapo pe pa'üve.

¹²Ndoromboyoyai ete ore rekokwer ava oyese tëi oñe'ë va'e rekokwer rese. Esepia oyavɨ ite mba'e yuvɨreko a'e ae tëi gwekokwer omboyoyase yuvɨreko.

¹³Ore rumo ore remimombe'u pɨpe ndoroyapɨrasai chietera orekwaita ore yeekomboɨvatesa pɨpe. Tüpä rumo gwemimbotar rupi ombou ore poravɨkɨ agwä oreu, iyavei Corinto ve pe rese ore poravɨkɨ agwä.

¹⁴Sese, ndoroyapɨrasai orekwaita mombe'usa ikwachia peü, esepia supiete ore ranei ete oroiko pe pa'üve. Ore ranei avei orovɨraso Cristo resendar ñe'ësa imombe'u peü.

¹⁵Ndoroyapɨrasai avei ore ñe'ë pɨpe ambuae ava poravɨkɨsa sui tëi. Ore rumo, orosärö ore oroporavɨkɨ katu va'erä pe pa'üve Tüpä rese pe yeroyasa rupi, ndoroyapɨrasai avei rumo orekwaita.

¹⁶Iyavei orosärö ñe'ësa pɨsɨrösa resendar mombe'u ava amombrɨ katu yuvɨrekoi va'e upe, nda'ei chira rumo ambuae ava poravɨkɨ agwer rese tëi oroyeekomboɨvate oroiko.

¹⁷Akoi ava oyeekomboɨvate pota va'e, toyeekomboɨvate katu yande Yar rese.

¹⁸Esepia akoi ava che aiko tuprɨ e'i va'e nda'ei a'e osë tuprɨ gwekoa'äsa sui yande Yar rovake, avɨye ite ko mbɨa e'ise rumo yande Yar chupe, a'e osë tuprɨ gwekoa'äsa sui.