Read Guarayu 2 CORINTIOS 11 Bible Online

2 CORINTIOS 11 - Guarayu bible

2 CORINTIOS 11

¹¡Peñemosa iriñomi tëira cheu ko che ñe'ë ndayarakwai va'e nungar pɨpe che ñe'ëse! Peremimbotar rupi peñemosañomi tëi cheu.

²Esepia cherekate'ɨ̇ ite pe rese, a'e tekate'ɨ̇sa ou cheu Tüpä sui. Che aipota Cristo upe opomondo va'erä pe reko maräne'ɨ̇sa pɨpe, inungar kuñatäi ndaseko maräi va'e imondoprɨ kuimba'e upe imenda agwä.

³Che rumo asɨkɨye ko mba'e sui, inungar mboi ombopa Eva oporombopasa pɨpe, avɨyeteramo Karugwar pe mbopa aveira pe pɨ'a ñemoñetasa rerova agwä Cristo mboeteisa supiete va'e sui.

⁴Esepia peñemosaño ava oñe'ë va'e peü ambuae Jesús rese ndoyoyai va'e ore remimombe'u rese; ichui peipɨsɨ pe kere'ɨ̇sa pɨpe ambuae Espíritu peipɨsɨ va'ekwer sui, iyavei ambuae ñe'ësa pɨsɨrösa resendar peipɨsɨ avei ndoyoyai va'e ore oromombe'u va'e rese peü.

⁵Che rumo namo'äi ete ɨvɨ kotɨ katu tëi aikora evokoi supi pegwata va'e Jesús ñe'ë mombe'usar yemboɨvateai tëi va'e sui.

⁶Yepe ndayembo'ei che ñe'ë tuprɨ agwä viña, che rumo areko che mba'ekwasa, a'e oromboyekwaño ite opakatu ore rembiapo pɨpe pe rembiepiave.

⁷¿Mba'e tëi pi'ä ayapo amombe'use Tüpä ñe'ëngagwer ndapemboepɨise cheu, che ayeeko momini pe rekokwer mboɨvate katu agwä vichiko?

⁸Aipɨsɨ ambuae ava Jesús reroyasar sui gwarepochi, pe rekokwer rese che poravɨkɨ agwä.

⁹Iyavei aikose pe pa'üve ipane avei mba'e cheu, ndopomañekoi ete rumo; yande rɨvrɨ ɨvɨ Macedonia pendar yugweru va'e ombou mba'e ipane va'e yuvɨreko cheu. Egwë a'e che pepoɨsupave pe mañeko e'ɨ̇ vichiko, ndopomañekoi chietera ni'ä mba'e ipanese cheu.

¹⁰Supiete aikwa supi tuprɨ va'e mba'e Cristo suindar, evokoiyase supiete avei che aikwa ndipoi chietera ava ɨvɨ Acaya rupi vɨrokwa va'erä ko che vɨ'aretesa che sui yuvɨreko.

¹¹¿Mba'e rese pi'ä aipo a'e peü? ¿Pe raɨsu e'ɨ̇save pi'ä? ¡Tüpä rumo oikwa che pe raɨsusa!

¹²Ayapoño itera rumo ko mboravɨkɨ cheu imboepɨ e'ɨ̇sa pɨpe vichiko ko ambuae pe pa'ü pendar ava pe mbopa e'ɨ̇ agwä yuvɨreko, esepia yande nungar yuvɨrekoi pota tëi viña;

¹³a'e rumo nda'ei Jesús ñe'ë mombe'usar supi tuprɨ va'e yuvɨrekoi, a'e oporombopa tëi, ore Jesús ñe'ë mombe'usar oroiko e'i tuprɨ tëi yuvɨreko.

¹⁴Yaikwa ni'ä Karugwar rerekwar oporombopa, esepia oyeapo inungar mbigwai ɨva pendar tesapesa sekoi;

¹⁵sese yaikwa avei Karugwar povrɨ pendar oporombopasa pɨpe oyeapo inungar Tüpä ñe'ë mombe'usar yuvɨreko. ¡A'e chupe rumo oimerä Tüpä ñemoɨrösa mba'e sembiapokwer rupi kuri!

¹⁶Aipo a'e irira peü yarakwa kañɨ oiko te'i eme ava yuvɨreko cheu; akoi egwë peyese pe pɨ'a ñemoñetase che rese, tañe'ëño ayase ndayarakwai va'e nungar, che avei evokoiyase tayeeko mboɨvateño vichiko,

¹⁷nda'ei rumo yande Yar che kwaisa pɨpe aipo a'e, che arakwa e'ɨ̇sa nungar pɨpe rumo aipo a'e che yemboɨvateaisa pɨpe avei.

¹⁸¡Esepia ni'ä seta iteanga ava a'e ae tëi oyemboɨvateai gwekokwer avɨye anga'u va'e tëi pɨpe, sese che avei ayemboɨvatera!

¹⁹Esepia yepe pe imba'ekwa vai va'e nungar peiko, pemboyoya katu pe kere'ɨ̇sa pɨpe ava ndayarakwai va'e,

²⁰pe ni'ä pemboyoyaño akoi mbigwai tëi nungar pe rereko va'e, mba'e pe rembiereko sui tëi oikove va'e, pe mbopa tëisar, pe reroɨrösar, pe rova pete-petesar avei.

²¹Yepe achïai imombe'u peü viña, ¡ore reko mbegwe eteprɨ evokoi nungar apo agwä peü! Akoi oñe'ëse ambuae ava oyeupendar mba'e rese oyemboɨvate aisa pɨpe, che avei evokoiyase egwë a'era, yepe ndayarakwai va'e nungar aikora.

²²¿A'e pi'ä hebreo yuvɨrekoi? Che avei ni'ä a'e aiko. ¿A'e pi'ä yuvɨrekoi Israel ɨgwar? Che avei ni'ä a'e pendar aiko. ¿A'e pi'ä yuvɨrekoi Abraham suindar? Che avei ni'ä ichuindar aiko.

²³¿A'e pi'ä yuvɨrekoi Cristo pɨtɨ̇vɨïsar? Che rumo ɨvate katu aiko ichui yuvɨreko, yepe añe'ëse avɨye che ndayarakwai va'e aiko viña. Che aporavɨkɨ katu yuvɨreko ichui, seta rupi avei che rokenda ichui yuvɨreko, iyavei inupambrɨ katu aiko ichui yuvɨreko, seta rupi avei seni-seni che yuka uka che mombaraɨsusa pɨpe yuvɨreko.

²⁴Poyandepo yupagwer judío che mombaraɨsu iteanga yuvɨreko treinta y nueve tuprɨ tukumbo omondo che rese yuvɨreko.

²⁵Mbosapɨ yupagwer che nupasa ɨvɨra pɨpe, ñepëi rupi evokoiyase che api-apisa ita pɨpe. Mbosapɨ yupagwer avei oñeäpɨvɨi ɨarɨ ɨpɨve che gwatasa rupi cheu, ñepëi pɨ̇tü, ñepëi arɨ avei avevui tëi paragwasu avɨter rupi vichiko.

²⁶Seta rupi agwata, iyavei ɨai rupi mba'e-mba'e tëi oime cheu, aiko avei imondarai va'e pa'üve; che mu judío mba'e tëi va'e pa'üve avei aiko iyavei nda'ei va'e che mu pa'üve no. Aiko avei tekwa gwasu pɨpe mba'e tëisave, amombrɨ va'esa rupi iyavei paragwasu pɨpe, iyavei aiko mba'e-mba'e tëisave nda'ei va'e Jesús reroyasar pa'üve.

²⁷Amboavɨyepa ite mboravɨkɨ yavai va'e; seta yupagwer avei ndakei vichiko; aiporara tɨepore'ɨ̇ usei avei; seta yupagwer rupi ndakarui ete; so'ɨ̇sagwer avei aiporara, ndacheturukwai avei vichiko.

²⁸Nda'ei ko opakatu mba'e gweraño aiporara, arɨ yakatu rupi che ma'endu'año ite opakatu tekwa rupindar Jesús reroyasar rese.

²⁹Oimese oiporara va'e mba'erasɨkwer, che avei ayandu ko mba'erasɨsa; akoi oimese oyavɨ uka va'e mba'e, che avei añemoɨrö egwë e'ise.

³⁰Iyase cheu yeekomboɨvateai agwä, ko mba'e omboyekwa va'e che pirätä e'ɨ̇sa rese ayeeko mboɨvateaiño itera.

³¹Tüpä yande Yar Jesús Yesupa, a'e imboeteiprɨ sekoi apɨre'ɨ̇ va'e yepi, oikwa avei amombe'use ñe'ësa supi tuprɨ va'e yepi.

³²Aikose tekwa Damasco ve, mborerekwar ɨvate katu va'e Aretas povrɨ pendar oyokwai sundao tekwa rokendɨpɨ rärö agwä che rese osareko va'erä che rokenda agwä yuvɨreko viña;

³³oime rumo ava ɨruova gwasu pɨpe che mbogweyɨ va'e tekwa ächisa metana rupi yuvɨreko, egwë a'e añemi ipovrɨ sui yuvɨreko.