Read Guarayu 2 CORINTIOS 12 Bible Online

2 CORINTIOS 12 - Guarayu bible

2 CORINTIOS 12

¹Ndipoi ete ava oipɨsɨ va'e mba'e a'e ae tëi oyemboeteisa pɨpe. Che rumo amombe'uño itera mba'e asepia va'e che ker nungar pɨpe iyavei yande Yar remimboyekwa che aipɨsɨ va'e ichui.

²Che aikwa mbɨa Cristo reroyasar, omomba kurïtëi catorce aravɨter a'e imbosapɨsa ɨvave seraso agwer. Ndikwasai gwetekwer rese tie revo oso, anise i'ä gweraño tie revo; Tüpä rumo oikwa.

³Che rumo aikwa evokoi mbɨa (serasosa setekwer reve anise i'ä serasosa, ndaikwai ete rumo, Tüpä gweraño oikwa)

⁴serasoprɨ ɨvave teko orɨsave, a'eve osendu ñe'ësa ndikwasai va'e, a'e ni'ä ava tëi upe ndipotasai imombe'u agwä yuvɨreko.

⁵Che evokoi nungar mbɨa rese ayeeko mboɨvatera, che yese ite rumo ndayeeko mboɨvateai chira, che rekokwer nipirätäi va'e reseño egwë a'era vichiko.

⁶Yepe che añe'ë tuprɨaira cheyese viña, che revo nda'ei chira ndayarakwai va'e nungar aiko, esepia mba'e supiete va'e amombe'ura viña; a'e rumo ndayapoi, esepia tipɨ'añemoñeta katu che rembiapo rese, che remimombe'ugwer rese avei yuvɨreko che kerve nungar mba'e mombe'u rägwer sui viya,

⁷sese che yemboɨvateai e'ɨ̇ agwä che ker nungar mba'e che pɨ'amondɨi va'e rembiepiagwer rese Tüpä ombou tekoasɨsa cheu. A'e avɨye yu che kutu gwasu va'e, ndoyavɨi avei Karugwar marä-marä tëi che rereko va'e.

⁸Mbosapɨ yupagwer yande Yar upe aporandu teko asɨsa che sui serokwa agwä rese viña;

⁹yande Yar aipo e'i cheu: “Che porovasasa ndeu ambou va'e iyara nde ñemosa agwä; esepia che pirätäsa oyekwa katu ite ava nipirätäi va'e rekokwer rese evokoiyase che ayembovɨ'a katuño itera che reko nipirätäi va'e rese.” Egwë e'ira Jesucristo pirätäsa oyekwa che rese.

¹⁰Sese Cristo rese che rekosa pɨpe avɨyeño ite ndache pirätäise, ambuae ava oñe'ë raise che rese, mba'e ipanese cheu, ambuae che reka-reka tëise che reko momarä agwä yuvɨreko iyavei mba'e yavai va'e aiporarase Cristo sui, esepia ayanduse che pirätä e'ɨ̇sa a'ese che pirätä katu.

¹¹Che ndayarakwai va'e nungar aiko peü, pe rese tëi rumo egwë a'e. Iya rumo peñe'ë tuprɨra che rese, esepia yepe nda'ei seko ɨvate va'e aiko viña, ko Jesús ñe'ë mombe'usar anga'u tëi rumo pe supi pegwata va'e nda'ei ɨvate katu va'e che sui yuvɨreko.

¹²Che ñemosa tuprɨ pɨpe mboravɨkɨ ayapo pe pa'üve, ayapo mba'e poromondɨisa mba'e pesepia yesapɨ'arai va'e imboyekwa agwä che supiete va'e Jesús ñe'ë mombe'usar che rekosa pɨpe.

¹³Ko mba'e reseño pe ɨvɨ kotɨ katu peiko ambuae Jesús reroyasareta sui, che ndopomañekoise mba'e cheu pembou va'erä rese: ¡ayavɨ tie che kwaita egwë a'ese peü! Peñerö sese cheu.

¹⁴Kurïtëi che ayemoigätu imombosapɨsa rupi che so agwä pe pɨri, iyavei ndopomañekoi chira mba'e rese. Che ndasekai mba'e pe rembiereko, pe rekokwer ite rumo aipota; esepia iyesupa omonu'ära gwarepochi gwa'ɨrɨ upe narä, iyavei nda'ei ta'ɨrɨ tëi egwë e'i oyesupa upe yepi.

¹⁵Evokoiyase che kere'ɨ̇sa pɨpe amondora opakatu che mba'e areko va'e pe pɨtɨ̇vɨï agwä, iyavei opakatu che rekokwer rese ayemondo peü pe reko tuprɨ agwä. Che rumo opoaɨsu iteanga, ¿pe tie revo ndache raɨsu tuprɨi ete peye?

¹⁶Cheu mba'e ipanese, ndaporandui ete mba'e pereko va'e rese peü. Amove rumo ava, yande mbopa agwä tëi egwë e'i Pablo yandeu e'i yuvɨreko.

¹⁷¿Opombopa pi'ä ava amondo va'e pɨpe pe rereko yepi?

¹⁸Che Tito upe eresora ipɨri yuvɨreko a'e, supi avei ambuae yande rɨvrɨ Jesús reroyasar amondo. ¿Tito avei tie pembopa pe rereko? ¿Nda'oyoyai vo orepɨ'a ñemoñetasa orovɨreko mba'e oroyapo va'erä sese?

¹⁹Che rɨvrɨ eta, che rembiaɨsu, pe revo pepɨ'añemoñeta ore oroikwachia ko peü, ore yoepɨ agwä tëi. Egwë ndoro'ei ete rumo, ore rumo Cristo rese ore reko pɨpe oroñe'ë Tüpä rovake. Opakatu ite ni'ä mba'e oroyapo pe rekokwer movɨräkwä katu agwä.

²⁰Che asɨkɨye asose eipeve pe repia, avɨyeteramo nda'ei chira che pɨ'a rupi pe rekokwer, iyavei pe avɨyeteramo egwë peye aveira che repiase. Che asɨkɨye ite, oime revo pe pa'üve yepoepɨ-epɨsa, pe pɨ'añemoñeta raisa ava mba'e pota raisa pɨpe, pe ñemoɨrösa peyeupe. Iyavei avɨyeteramo oimerä pe pa'üve ava oyeupeño tëi mba'e oipota va'e, ima'echiröiai va'e iyavei oñe'ë-ñe'ë tëi va'e ambuae ava rese, seko ɨvateai va'e iyavei ndiporeroyai va'e.

²¹Asɨkɨye avei aso irise pe repia, esepia omboura Tüpä che chï agwä pe sui, che mboyase'o uka tiëtera peye yɨpɨsuive angaipa pereko va'e pɨpe, iyavei ndapemboasɨi etese mba'e tëi, yemboagwasa-gwasa tëisa iyavei mba'e pe remimbotarai peyapo va'ekwer.