Read Guarayu 2 CORINTIOS 2 Bible Online

2 CORINTIOS 2 - Guarayu bible

2 CORINTIOS 2

¹Ko rese ndaso katu iri pe pɨri, esepia che aso irise pe pɨri ndopombovɨ'a katui chira viña.

²Esepia akoi che ndopombovɨ'aise, ¿ava vo evokoiyase che mbovɨ'ara viña pe ni'ä che mbovɨ'asar peiko?

³Sese che aikwachia ñe'ësa ipirätä va'e peü, esepia ndaipotai eipeve che sose, che mbovɨ'a e'ɨ̇ agwä peye, pe rumo iya che mbovɨ'a katura peye viña. Che ayeroya ite opakatu pe rese avɨ'aretese, pe avei evokoiyase opakatu pevɨ'aretera che rese,

⁴akoi aikwachia va'e evokoi ñe'ësa peü, che ae ayepɨ'amboasɨ ite, ayase'o avei. Esepia aikwachia va'e peü nda'ei pe mbovɨ'a e'ɨ̇ agwä, che rumo aikwachia toikwa che gwaɨsu eteprɨsa yuvɨreko che yapave peü.

⁵Akoi yande rɨvrɨ omoime uka va'e vɨ'are'ɨ̇sa ko mba'e tëi apo pɨpe, nda'ei che gweraño ndache mbovɨ'ai, pe avei rumo seni opakatu egwë peye. Che “aipo a'e peü” esepia ndaipotai che ñe'ë rasɨ agwä.

⁶Ko mbɨa upe seta mba'e peiporara uka va'e, evokoi rupive iya egwë peye chupe.

⁷Ko suive ite rumo peñeröira chupe, peipɨtɨ̇vɨï aveira, esepia avɨyeteramo ovɨ'are'ɨ̇sa pɨpe oyemokañɨ tëira.

⁸Sese kurïtëi opomongere'ɨ̇ pe mboyekwa iri agwä pe poroaɨsusa chupe.

⁹Esepia yɨpɨndar aikwachia che ñe'ë peü ko rese, perekoa'ä agwä iyavei oyapo itera pi'ä che remimombe'u yuvɨreko a'e peü.

¹⁰Kurïtëi che ñerö avei ava upe peñerö va'ekwer upe. Esepia oimese mba'e rese che ñerö agwä, Cristo rovake egwë a'e pe raɨsusave.

¹¹Ko sui Karugwar ndoikatui chietera yande mbopa agwä, esepia yande yaikwa tuprɨ ite iporombopasa.

¹²Ayepotase tekwa Tróade ve Cristo rekokwer mombe'u agwä, oime ite yande Yar upe narä a'eve che poravɨkɨ agwä.

¹³Nambo'e katui rumo che pɨ'a ñemoñetasa, esepia ndasepiai ete yande rɨvrɨ Tito. Sese che avɨye a'eño a'e pendar upe ichui aso ɨvɨ Macedonia rupi.

¹⁴Avɨye yande Ru Tüpä upe esepia yande Cristo rese yaiko va'e yande renose oamotare'ɨ̇mbar povrɨ sui opakatu ava rembiepiave iyavei yande rekokwer sui opakatu ava upe oikwa uka gwekokwer inungar mba'e sɨäkwä va'e yasëtu va'e opakatu rupi.

¹⁵Esepia inungar itaɨsɨ sɨäkwä va'e opakatu rupi, egwë ya'e avei yande Tüpä upe Cristo yande reropove'ëse yaiko ava ipɨsɨröpɨrä upe, ava okañɨ tëi va'erä upe avei.

¹⁶A'e ava okañɨ tëi va'erä upe evokoi ñe'ësa yaru va'e inungar kañɨ tëisa resendar; ava ipɨsɨröpɨrä yuvɨrekoi va'e upe rumo evokoi ñe'ësa ombou tekovesa. ¿Uma pi'ä oikatura ko mba'e mboavɨye agwä oiko?

¹⁷Ore rumo nda'ei seta ambuae ava nungar tëi oroiko, esepia oromombe'use Tüpä ñe'ëngagwer, nda'ei mba'e pɨsɨ agwä tëi rese egwë oro'e, ore rumo ore pɨ'añemoñeta tuprɨsa pɨpe oromombe'u ko ñe'ësa Tüpä rovake Cristo rese ore rekosa pɨpe, esepia ni'ä ore semimondo oroiko.