Read Guarayu 2 CORINTIOS 8 Bible Online

2 CORINTIOS 8 - Guarayu bible

2 CORINTIOS 8

¹Che rɨvrɨ eta, kurïtëi oromombe'u potami peü marä e'i mba'e tuprɨ apo Tüpä ava vɨroyasar upe ɨvɨ Macedonia rupi.

²Yepe a'e ava rekokwer yavai ete yuvɨreko chupe sekoa'äsa pɨpe viña, ovɨ'areteño rumo ipɨpe yuvɨreko; yepe iparaɨsu va'e päve tëi, iporerekoño ite rumo yuvɨreko.

³Che ni'ä asepia ite omondose oporerekosa okatugwer rupi yuvɨreko, ipare omondo iri ete oporerekosa gwemimbotar rupi yuvɨreko

⁴oporandu avei opakatu oreu yuvɨrekoi va'erä ore rupi Tüpä reroyasar pɨtɨ̇vɨï agwä.

⁵A'e rumo oñokwa iri ore pɨ'a ñemoñetasa yuvɨreko, yande Yar upe rane oyemondo, ipare Tüpä remimbotar rupi egwë e'i avei oreu yuvɨreko.

⁶Sese Tito upe oromombe'u omonu'ä va'erä porerekosa pe pa'ü sui, esepia a'e akoi yɨpɨndar omboɨpɨ imonu'ä porerekosa pe pɨtɨ̇vɨï agwä.

⁷Supiete aikwa peyapo tuprɨse opakatu ko ambuae mba'e: peyeroya tuprɨ ite yande Yar rese, pemombe'u tuprɨai Tüpä ñe'ësa, pereko ite Tüpä suindar mba'ekwasa, pekere'ɨ̇ Tüpä upe mba'e apo agwä iyavei ore raɨsu ite peye evokoiyase egwë peye aveira ko nungar poroaɨsusa apo.

⁸Nda'ei pe kwaisa pɨpe aipo a'e peü; che rumo aipota peikwa va'erä ambuae ava rembiapo okere'ɨ̇sa pɨpe oyapo va'e yuvɨreko, sese ni'ä peikwara supiete pi'ä pereko poroaɨsusa.

⁹Peikwa ni'ä pe yande Yar Jesucristo poroaɨsusa, yepe a'e mba'e yar sekoi viña, opa rumo oseya omba'e pe rekokwer rese, iparaɨsu pɨpe sui ni'ä pe ɨva pendar mba'e pereko.

¹⁰Peü mba'e avɨye agwä che añe'ë ko nungar mba'e rese. Ambuae aravɨter sui ni'ä, nda'ei pe gweraño yɨpɨndar pemboɨpɨ ko mba'e apo, a'e pe kere'ɨ̇sa pɨpe ite peyapo.

¹¹Kurïtëi pemboavɨye katu pe porerekosa pe kere'ɨ̇sa yɨpɨndar pe reko va'e pɨpe, pemondoñora mba'e peikatugwer rupi.

¹²Esepia akoi ava omondo pota va'e mba'e, Tüpä oipɨsɨ iporerekosa mba'e vɨrekomi va'e; Tüpä rumo ndoporandui mba'e ndayarekoi va'e rese yandeu.

¹³Toyemombaraɨsu ava pɨtɨ̇vɨïsa pɨpe yuvɨreko nda'ei peü; iya rumo tekokwer oyoya tuprɨra.

¹⁴Kurïtëi mba'e pe rembiereko eta pɨpe peipɨtɨ̇vɨï katu ambuae ava ipane va'e mba'e yuvɨreko chupe; vɨrekomise mba'e a'e avei pe pɨtɨ̇vɨïra yuvɨreko peü mba'e ipanese, evokoiyase pe rekokwer oyoya tuprɨ itera.

¹⁵Inungar Ikwachiaprɨ pɨpe aipo e'i: “Akoi omonu'ä atɨ va'e mba'e, ndasumbɨrei ete mba'e chupe; iyavei akoi movɨrömi tëi mba'e omonu'ä va'e, nipanei mba'e chupe.”

¹⁶Avɨye Tüpä upe ombopɨ'a ñemoñeta Tito pe rese, inungar che pɨ'a ñemoñetasa areko pe rese yepi.

¹⁷A'e vɨroya ite che ñe'ë, gwemimbotar rupi ete rumo ikere'ɨ̇ oso agwä pe repia.

¹⁸Tito rupi oromondo yande rɨvrɨ, a'e opakatu ambuae Jesús reroyasar oikwa iporavɨkɨ tuprɨaise ñe'ësa pɨsɨrösa rese yuvɨreko.

¹⁹Sese opakatu oiporavo yuvɨreko ore rupi igwata agwä ore pɨtɨ̇vɨï va'erä avei ko porerekosa reraso agwä yande Yar mboeteisa oromboyekwa va'erä poropɨtɨ̇vɨïsa yuvɨreko chupe.

²⁰Ore ndoroipotai ava oñe'ë tëira ore rese yuvɨreko ko porerekosa monu'äsa pɨpe sui,

²¹esepia ore oroyapo pota mba'e avɨye va'e, nda'ei yande Yar rovake gweraño, opakatu ava rembiepiave avei.

²²Supi avei oromondo ambuae yande rɨvrɨ, a'e omboyekwa oreu okere'ɨ̇sa opakatu mba'e gwembiapo pɨpe a'e kurïtëi ikere'ɨ̇ katu ite, esepia oyeroya ni'ä pe rese.

²³Peikwa akoi Tito che ndugwer sekoise oyoya tuprɨ oroporavɨkɨ sese pe pɨtɨ̇vɨï agwä. Iyavei ambuae yande rɨvrɨ ñuvɨrïo yuvɨrekoi va'e ambuae Jesús reroyasareta remimbou Cristo mboeteisar yuvɨrekoi va'e.

²⁴Sese pe rekokwer kwa agwä, pemboyekwa katu pe poroaɨsusa supiete va'e chupe yuvɨreko, evokoiyase tovɨroya ite che ayeroyase iyavei ayembovɨ'ase pe rekokwer rese.