Read Guarayu GÁLATAS 1 Bible Online

GÁLATAS 1 - Guarayu bible

GÁLATAS 1

¹Che Pablo, imondoprɨ aiko Jesús ñe'ë mombe'usar che reko agwä nda'ei ava tëi sui ayu peü iyavei nda'ei ava tëi che kwai, Jesucristo ite ni'ä che kwai iyavei yande Ru Tüpä che mbou akoi ombogwerayevɨ va'ekwer Gwa'ɨrɨ,

²che Pablo, iyavei opakatu Jesús reroyasar yuvɨrekoi va'e reseve oromondo ore avɨravesa opakatu Jesús reroyasar Galacia ve peiko va'e upe.

³Tapeipɨsɨ yande Ru Tüpä, yande Yar Jesucristo porovasasa pe reko tuprɨ agwä.

⁴Jesucristo oyemondo mano pɨpe yande angaipa repɨrä, egwë e'i kurïtëi yande renose ko ɨvɨ pɨpe mba'e-mba'e tëi sui yande Ru Tüpä remimbotar rupi.

⁵¡Imboeteiprɨ apɨre'ɨ̇ Tüpä tasekoi! Amén.

⁶Che pɨ'amondɨi eteprɨ peye esepia peyepepɨ poyava peiko Tüpä sui, a'e ni'ä pe renoi Jesucristo pe raɨsusa pɨpe sui, pe rumo peroya pota ambuae tëi yembo'esa pe ñepɨsɨrö agwä peiko viña.

⁷Supiete ndipoi ambuae ñe'ësa pɨsɨrösa resendar. Egwë e'i rumo, oime ava pe mañeko tëi va'e pe mbopa agwä ñe'ësa supi tuprɨ va'e sui yuvɨreko, iyavei vɨrova pota ko ñe'ësa Jesucristo resendar yuvɨreko.

⁸Akoi ava omombe'u va'e ñe'ësa pɨsɨrösa resendar nda'oyoyai va'e ore remimbougwer rese, evokoi nungar ava tasekoi Tüpä ñemoɨrösa pɨpe, yepe chera viña, anise mbigwai ɨva pendar ou va'e aveino.

⁹Amboyupagwe irira aipo imombe'u peü: Akoi ava omombe'u va'e ñe'ësa pɨsɨrösa resendar nda'oyoyai va'e ore remimbougwer rese, evokoi nungar ava tasekoi Tüpä ñemoɨrösa pɨpe.

¹⁰Che ndasekai ava tëi cherekoa'ä agwä, che rumo aseka Tüpä ite cherekoa'ä agwä. Ndasekai che ava rese aiko tuprɨ va'erä. ¡Akoi che tëi asekase aiko tuprɨ va'erä ava rese, evokoiyase nda'ei chietera Cristo rembigwai aiko viña!

¹¹Che rɨvrɨ eta, tapeikwa ko ñe'ësa poropɨsɨrösa resendar amombe'u va'e ava upe nda'ei ava tëi pɨ'a ñemoñetasa.

¹²Nda'ei avei ava tëi che mbo'e, Jesucristo ite ni'ä oikwa uka cheu.

¹³Pe ni'ä pesendu yɨpɨndar che rekokwer resendar, che mu judío yembo'esa rupi agwata vɨtese vichiko, che rekoai pɨpe tëi aseka-seka katu Tüpä rembiporavo Jesús reroyasar momarä agwä.

¹⁴Egwë a'e che ayemboɨvateai katu che mboetasa eta sui judío yembo'esa pɨpe, ayapo ite opakatu che rekokwer pɨpe yɨpɨndar che ramoi eta yembo'e agwer rupi ete vichiko.

¹⁵Tüpä rumo yɨpɨve che'a vɨte e'ɨ̇seve che poravo oyeupe narä. Iyavei oporoaɨsusa pɨpe che renoi gwemimbotar rupi,

¹⁶egwë e'i a'e oikwa uka Gwa'ɨrɨ cheu, che imombe'u agwä ko ñe'ësa Ta'ɨrɨ rekokwer resendar ava nda'ei va'e judío upe. Ndasoi rumo ava tëi upe ikwa agwä;

¹⁷ndasoi avei Jerusalén ve yɨpɨve Jesús ñe'ë mombe'usar yuvɨrekoi va'e repia agwä. Che rumo aso voi ete ɨvɨ Arabia rupi, koiye ayevɨ tekwa Damasco ve vitu.

¹⁸Ichui mbosapɨ aravɨter pare, aso tekwa Jerusalén ve a'ese ramo Pedro amborɨ quince arɨ rupi gwerañomi tëi.

¹⁹Ndasepiai ete rumo ambuae Jesús ñe'ë mombe'usar yuvɨreko, yande Yar rɨvrɨ Santiago gweraño asepia.

²⁰Tüpä oikwa ko mba'e aikwachia va'e peü, supi va'e ite.

²¹Ipare aso ɨvɨ Siria ve, Cilicia ve aveino.

²²Yande Yar Cristo reroyasar rumo oñemonu'ä va'e ɨvɨ Judea ve ndache kwai ete yuvɨreko.

²³Ko oyandu yuvɨreko ambuae ava aipo e'i va'e: “Yɨpɨndar akoi ko mbɨa yande reka-reka katu va'e yandeu mba'e tëi apo agwä, kurïtëi omombe'u Jesucristo reroya agwä a'e akoi yɨpɨndar yande mokañɨ potarai va'e oiko.”

²⁴Iyavei omboetei Tüpä che rer pɨpe yuvɨreko.