Read Guarayu GÁLATAS 2 Bible Online

GÁLATAS 2 - Guarayu bible

GÁLATAS 2

¹Koiye catorce aravɨter pare oroso iri Jerusalén ve Bernabé rese iyavei orovɨraso Tito oreyeupi.

²Esepia Tüpä omombe'u ite a'eve che so agwä. A'eve amombe'u ñe'ësa Poropɨsɨrösa resendar ava nda'ei va'e judío upe yuvɨreko. Amombe'u avei kokotɨ mborerekwar ikwaprɨ yuvɨrekoi va'e upe, mba'e che rembiapokwer oikwa tuprɨ va'erä mboravɨkɨ nda'ei che rembiapo egwë e'i tëi va'e.

³Tito sekoi va'e che rupi a'e griego, ndoyemocircuncidai avei.

⁴Oime rumo amove yande rɨvrɨ anga'u tëi, a'e yuvɨroike mbegwe va'e ore pa'üve yasekoepia rane, supiete ndovɨroyai Moisés porokwaita Cristo Jesús reroyasa pɨpe yuvɨreko oyapave.

⁵Ore rumo ndoroipotai ete semimbotar apo agwä yuvɨreko chupe, esepia tovɨreko vɨteño oyese ko ñe'ësa pɨsɨrösa resendar supi tuprɨ va'e yuvɨreko ore yapave peü.

⁶Ko rumo akoi ikwaprɨ Jesús reroyasar rerekwar, nomombe'ui ete yembo'esa ambuae va'e yuvɨreko cheu, oyoyaño ite che porombo'esa rese (yepe okwaita vɨrekora ɨvate yuvɨreko viña. Che rumo nañekuñaröi chietera che rekokwer sui, esepia ni'ä Tüpä nda'ei ava rete tëi osepia).

⁷A'e rumo oikwa yuvɨreko Tüpä che kwai oñe'ëngagwer poropɨsɨrösa resendar mombe'u agwä nda'ei va'e ava judío yuvɨrekoi va'e upe, inungar omondo Pedro oñe'ëngagwer poropɨsɨrösa resendar mombe'u agwä judío upe.

⁸Esepia inungar Tüpä omondo Pedro upe Jesús ñe'ë mombe'usar seko agwä ava judío upe narä, egwë e'i avei cheu Jesús ñe'ë mombe'usar che reko agwä ava nda'ei va'e judío upe narä.

⁹Santiago, Pedro iyavei Juan, a'e Jesús reroyasar yemovɨräkwäsa yuvɨrekoi, oikwa yuvɨreko Tüpä ombou va'e oporovasasa cheu, a'ese imboetasa ore rekosa pɨpe che po pɨsɨ yuvɨreko, Bernabé upe avei egwë e'i yuvɨreko iyavei ipɨ'a rupi ete ore oroporavɨkɨ va'erä ava nda'ei va'e judío pa'üve oroiko, inungar a'e oporavɨkɨ judío pa'üve yuvɨreko.

¹⁰A'e rumo oporandu yuvɨreko oreu, oroyemoma'endu'a va'erä ava iparaɨsu va'e pɨtɨ̇vɨï agwä rese, che rumo egwë a'e pota ite yɨpɨsuive vichiko yepi.

¹¹Iyavei osose Pedro tekwa Antioquía ve, a'eve oyavɨ gwekokwer, evokoiyase añe'ë pirätä sovai ete chupe mba'e sembiavɨ rese.

¹²Esepia yɨpɨndar okaru nda'ei va'e judío pɨri viña, ipare rumo oyepotase ambuae judío Jesús reroyasar Santiago mboetasa yuvɨrekoi, a'ese Pedro osɨrɨño ichui osɨkɨyepave, iyavei ndokaru iri ipɨri. Esepia a'e Jesús reroyasar judío yugweru va'e judío rekokwer rupi yagwatara yande ñepɨsɨrö agwä e'i va'e ite yuvɨreko viña.

¹³Evokoiyase ambuae Jesús reroyasar judío avei osɨrɨpaño tëi supive yuvɨreko, Bernabé avei ete supive egwë e'iño tëi.

¹⁴Che asepiase rumo, nda'oyoyai sekokwer yuvɨreko ko ñe'ësa poropɨsɨrösa resendar supi tuprɨ va'e rese, ichui Pedro upe añe'ë opakatu Jesús reroyasar rovake: “Nde ni'ä judío, ereiko rumo inungar nda'ei va'e judío; ¿ma'erä evokoiyase kurïtëi erembo'e tëi nde rembiapo pɨpe evokoi ava nda'ei va'e judío Jesús reroyasar judío rereko uka agwä?”

¹⁵Yande ni'ä judío yande'asa suive yaiko, nda'ei avei ava angaipa viyar nungar tëi yaiko.

¹⁶Kurïtëi rumo yaikwa, ndipoi ete ava seko katuprɨ va'e Moisés porokwaita mboavɨyesa pɨpe Jesucristo rese yeroyasa pɨpe ñoite rumo yande reko katuprɨ. Sese yande avei yayeroya Jesucristo rese, a'ese Tüpä oikwara yande yeroyasa, avɨye yande yeroyasa upe nda'ei porokwaita reroyasa pɨpe. Esepia ndipoi chietera ñepëi ava seko katuprɨ va'e porokwaita mboavɨyesa pɨpe tëi.

¹⁷Yasekase yande reko katuprɨ agwä Cristo rese yande yeroyasa pɨpe, yaikwa avei angaipa viyar yande rekose, ¿Cristo pi'ä evokoiyase yande mboangaipa? ¡Ani nda'ei ete supi!

¹⁸Che amokañɨse mba'e ipare rumo amopü'a irise, che evokoiyase ayemboangaipa ipɨpe.

¹⁹Esepia ndaikatuise Moisés porokwaita reroya tuprɨ che ñepɨsɨrö agwä, a'ese okañɨ tëi va'e aiko ipɨpe, Tüpä upe che reko agwä rumo. Cristo rupive ite che atɨkasa kurusu rese,

²⁰sese nda'e iri che ite aikove, esepia Cristo rumo che rese sekoi. Sese ite ayeroya che retekwer pɨpe che rekove agwä, a'e ni'ä oyemondo omano agwä che raɨsupave.

²¹Che naroɨrö potai Tüpä porovasasa; esepia oimese mba'e avɨye va'e porokwaita reroyasa pɨpe, a'ese Cristo omano tuprɨ tëietera viña.