Read Guarayu GÁLATAS 4 Bible Online

GÁLATAS 4 - Guarayu bible

GÁLATAS 4

¹Amboyoapɨ vɨtera ko che ñe'ësa peü: inungar ava omanose, oseya omba'e eta gwa'ɨrɨ upe chi'ïvä'emise, yepe a'e ta'ɨrɨ opakatu mba'e yar sekoira viña, a'e rumo inungar tuprɨ mbigwai tëi sekoi va'e yepi.

²Esepia a'e gwarösar povrɨve sekoi imboyeroya agwä okwakwase voi ete, opoira iyesupa remimombe'ugwer rupi ichui.

³Egwë ya'e avei yande yaiko: yande chi'ïvä'emise porokwaita povrɨve tëi yaiko ko ɨvɨ pɨpe.

⁴Oyepotase rumo arɨ imombe'uprɨ, a'ese Tüpä ombou Gwa'ɨrɨ, a'e o'a ñepëi kuña sui, evokoiyase imondosa Moisés porokwaita povrɨve,

⁵egwë e'i ou opakatu yande renose agwä evokoi porokwaita povrɨ sui Tüpä ra'ɨrɨ yande reko agwä

⁶Esepia ta'ɨrɨ yaikose, Tüpä ombou Gwa'ɨrɨ Espíritu yande pɨ'a pɨpe; iyavei Espíritu aipo e'i: “¡Abbá! ¡Che Ru!”

⁷Sese yande Tüpä ra'ɨrɨ ite yaiko, nda'e iri kurïtëi mbigwai tëi nungar, Tüpä ra'ɨrɨ yande reko pɨpe a'e ombou aveira oporerekosa yande ma'erä.

⁸Yɨpɨndar mba'e ra'anga tüpä anga'u rembigwai tëi peiko Tüpä kwae'ɨ̇ pɨpe.

⁹Kurïtëi rumo peikwa ite Tüpä, egwë e'i kurïtëi Tüpä ite oikwa pe rekokwer, sese ni'ä aipo a'e che yeupe, “¿marä e'i pi'ä oyevɨ iri mborokwaita tëi pɨpe mbigwai tëi gweko iri agwä yuvɨreko?”

¹⁰Esepia pemboetei vɨte arɨ, yasɨ, aravɨter pieta eta tëi peiko.

¹¹¡Che ayembosɨkɨye pe rese, che porombo'esa revo egwë e'i tëi va'e ipa'üve yuvɨreko chupe a'e peü!

¹²Che rɨvrɨ eta, aipota che rekokwer moña peye: esepia che aiko inungar pe kurïtëi. Ndapeyapoi ete ni'ä mba'e naporäi va'e cheu.

¹³Peikwa ni'ä che yɨpɨndar che mba'easɨse vichiko, a'ese amombe'u ko ñe'ësa pɨsɨrösa resendar peü.

¹⁴Yepe ko che mba'erasɨsa yavai eteprɨ peü viña, pe rumo ndache reroɨröi ete peye iyavei ndache momboi peye, pe rumo avɨye akoi Tüpä rembigwai ete che rereko peye, ¡inungar aiko Cristo Jesús itera peü viña!

¹⁵¿Marä peye pevɨ'aretesa rereko kurïtëi? Ndacheremiräi chietera aipo peü, esepia supiete penosera revo pembou va'erä peresa cheu viña.

¹⁶Iyavei kurïtëi, ¿opoamotare'ɨ̇ tie pe rereko, mba'e supi tuprɨ va'e mombe'u pɨpe sui tëi?

¹⁷Evokoi ava ikere'ɨ̇ ite pe rese, nda'ei rumo mba'e avɨye va'e apo agwä yuvɨreko. A'e rumo oipota pe mboyepepɨ agwä tëi ore sui yuvɨreko pe kere'ɨ̇ agwä supi.

¹⁸Avɨye ite ni'ä yande kere'ɨ̇se mba'e apo ambuae ava upe, mba'e avɨye va'e apo agwä rumo; nda'ei chira pe pa'üve che rekoseño pereko pe kere'ɨ̇sa, iyakatu rumo pekere'ɨ̇ño itera yepi.

¹⁹Che ra'ɨreta, che paraɨsu iri ete vichiko, inungar kuña imembɨrasɨ va'e, Cristo sekoi va'erä pe rese.

²⁰¡Kurïtëi rägwer opoepiara viña añe'ë tuprɨ katu agwä pe rese, ndaikwai avei marä a'era perereko!

²¹Pe mombe'u mba'e cheu, peiko pota va'e Moisés porokwaita povrɨve: ¿Ndapesendukwai vo porokwaita pɨpe aipo e'i va'e?

²²Esepia aipo e'i Abraham vɨreko ñuvɨrïo gwa'ɨrɨ: ñepëi ta'ɨrɨ aipo sembigwai Agar membrɨ, ambuae ta'ɨrɨ evokoiyase sembireko Sara membrɨ.

²³Evokoi sembigwai membrɨ o'a ava tëi yesu nungar pɨpe; sembireko membrɨ rumo o'a Tüpä remimombe'ugwer rupi ete.

²⁴Ko tekokwer mboyoyasa yarakwa va'e ite; ko ñuvɨrïo kuña sui yayembo'e ñuvɨrïo Tüpä remimbotar rese: yɨpɨndar ɨvɨtrɨ Sinaí omboyekwa Agar, a'e kuña opakatu ava mbigwai sɨ sekoi araka'e.

²⁵Esepia Agar omboyekwa ɨvɨtrɨ Sinaí, tekwa Arabia, a'e tekwa kurïtëi sekoi Jerusalén, esepia ko tekwa pɨpendar ava yuvɨrekoi mbigwai nungar tëi opakatu gwa'ɨrɨ reseve.

²⁶Yande rumo inungar Jerusalén ɨva pendar yaiko, egwë ya'e yaiko ta'ɨrɨ mbigwai e'ɨ̇.

²⁷Esepia Ikwachiaprɨ pɨpe aipo e'i: “Nde kuña eyembovɨ'arete, esepia ndererekoi ete nde membrɨ; esapukai nde rorɨvetesa pɨpe, esepia ndereiporarai va'e nde membrɨ rasɨkwer. Esepia akoi kuña seyaprɨ imembɨ atɨ katura kuña omer vɨreko va'e sui.”

²⁸Che rɨvrɨ eta, peiko inungar Isaac, egwë ya'e avei ta'ɨrɨ yaiko Tüpä remimombe'ugwer rupi.

²⁹Ko rumo araka'e sembigwai membrɨ o'a va'e ava tëi yesu nungar, a'e ndoyambotai sembireko membrɨ akoi Espíritu pirätäsa pɨpe sui o'a va'e, kurïtëi egwë e'i tuprɨ avei.

³⁰Kurïtëi ¿Marä e'i pi'ä Ikwachiaprɨ pɨpe? Supiete aipo e'i: “Emboyepepɨ nde rëtä sui kuña mbigwai tëi imembrɨ reseve, esepia kuña mbigwai tëi membrɨ ndiyai oyoya kuña nda'ei va'e mbigwai membrɨ rese vu mba'e pɨsɨ agwä yuvɨreko.”

³¹Sese, che rɨvrɨ eta, yande nda'ei sembigwai tëi membrɨ nungar yaiko, yande rumo sembireko membrɨ nungar yaiko, esepia a'e nda'ei mbigwai.