Read Guarayu GÁLATAS 6 Bible Online

GÁLATAS 6 - Guarayu bible

GÁLATAS 6

¹Che rɨvrɨ eta, akoi Jesús reroyasar pe pa'ü pendar oyavɨse gwekokwer, perekokwer katuprɨsa pɨpe peipɨtɨ̇vɨï sekokwer moigätu agwä. Pe rekokwer mbegwemisa pɨpe; peikwa katura rumo, avɨyeteramo oyoya voi peyemboangaipa uka tiëtera.

²Peñepɨtɨ̇vɨ-tɨvɨï katu mba'e yavairai va'e rese, egwë peyese Cristo porokwaita pemboavɨyera.

³Amove ava, che ɨvate katu va'e aiko e'i tëi, egwë e'i rumo a'e ae oyembopa aipo o'esa pɨpe oiko.

⁴Sese ni'ä ñepëi-pëi ete yaikwa tuprɨra yande rekokwer, avɨyese evokoiyase sese yavɨ'aretera, nda'ei akoi ambuae ava rekokwer rese tëi yamboyoyara yande rekokwer.

⁵Esepia ñepëi-pëi ete yande yakatu yareko yande kwaita imboavɨye agwä.

⁶Akoi oyembo'e va'e Tüpä ñe'ë pɨsɨrösa rese, tomondo ombo'esar upe mba'e gwembiereko ipɨtɨ̇vɨï agwä.

⁷Peyembopa eme katu pe ae: ndipoi chietera ava vɨroɨrö va'e Tüpä ñemoɨrösa pɨsɨ e'ɨ̇sa pɨpe. Egwë e'i ete yañotɨ̇se mba'e, ichui avei mba'e yaipɨsɨra.

⁸Akoi ava oyapo va'e mba'e gwemimbotarai pɨpe, a'e oipɨsɨra kañɨsa apɨre'ɨ̇ va'e. Akoi oyapo va'e mba'e Espíritu remimbotar rupi, a'e oipɨsɨra tekovesa apɨre'ɨ̇ va'e yuvɨreko.

⁹Evokoiyase tayandekwerai eme mba'e tuprɨ aposa pɨpe; esepia akoi ndayandekweraise, yaipɨsɨra mba'e tuprɨ apo reprɨ.

¹⁰Sese yande katugwer rupi yayapo mba'e ikatuprɨ va'e opakatu upe; yande mboetasa Jesús reroyasar upe rumo yayapora.

¹¹¡Pesepia ko ñe'ësa ipa va'e che pove ite aikwachia tuvicha va'e peü kurïtëi!

¹²Evokoi ava pe mbocircuncida uka pota va'e gwemimbotar rupi tëi, a'e yuvɨropɨta tuprɨ va'erä egwë e'i ava rese yuvɨreko, esepia ndoipotai oamotare'ɨ̇ ko ñe'ësa Cristo atɨka agwer mombe'u pɨpe yuvɨreko.

¹³Akoi oyembocircuncida uka tëi va'e avei rumo nomboavɨyei ete opakatu porokwaita remimombe'u yuvɨreko. Oipota rumo pe mbocircuncida ukara oyemboɨvateai agwä pe kwaise evokoi nungar apo yuvɨreko.

¹⁴Che rumo ndayemboɨvate potai ete, yande Yar Jesucristo mano agwer kurusu reseaño ite ayembovɨ'a. Cristo mano agwer sui ko ɨvɨ pɨpendar opa ite omano yuvɨreko cheu, che evokoiyase inungar omano va'e aiko ko ɨvɨ pɨpendar upe.

¹⁵Yepe yayembocircuncidase revo, anise ndayayembocircuncidaise viña; ko rumo avɨye katu va'e yaroyase Cristo Jesús opa yande rekokwer oñekuñarö.

¹⁶Peipɨsɨ teko katuprɨsa iyavei teko poroaɨsusa opakatu yuvɨrekoi va'e ko ñe'ësa che remimombe'ugwer rupi, opakatu tekwa Israel Tüpä suindar avei.

¹⁷Avɨye, ko pɨpe suive ndaipota iri ava che mañeko tëi va'erä; esepia che areko che retekwer rese che apicha-picha agwer cherekosa pɨpe Jesús rese.

¹⁸Che rɨvrɨ eta, yande Yar Jesucristo oporoaɨsusa pɨpe taperovasa opakatu pe rereko. Amén.