Read Guarayu EFESIOS 4 Bible Online

EFESIOS 4 - Guarayu bible

EFESIOS 4

¹Sese Cristo rekokwer mombe'usa sui che rokendasa pɨpe, peiko tuprɨra pe kwaita rupi Tüpä pe renoisa pɨpe a'e peü.

²Peyemominira pe reko avɨyesa pɨpe; pe reko mbegwesa pɨpe iyavei peñemosaño pe yeaɨsusa pɨpe peyeupe;

³peyapo opakatu pe rekokwer pɨpe peiko tuprɨ vɨte agwä peyepa'üve Espíritu Maräne'ɨ̇ pe pɨtɨ̇vɨïsa pɨpe, pe reko tuprɨsa pɨpe avei.

⁴Yaiko ñepëi nungar Cristo rese iyavei yareko ñepëi Espíritu, egwë e'i avei Tüpä yande poravo ñepëi gwarösa rereko agwä.

⁵Oime ñepëi yande Yar, ñepëi yande yeroyasa, oime avei ñepëi poroapirämosa;

⁶Oime ñepëi Tüpä, a'e opakatu yande Ru, opakatu yande kwaisar, a'e oporavɨkɨ opakatu yande rese sekoi avei opakatu rupi.

⁷Iyavei Cristo ni'ä yande yakatu ñepëi-pëi mba'ekwasa ombou.

⁸Sese aipo e'i Ikwachiaprɨ pɨpe: “Oso ɨvave vɨraso ava sekopɨsa va'e oyeupi, omondo avei porerekosa ava upe.”

⁹¿Marä oyavo aipo e'i “oso ɨvave”? Esepia ni'ä yɨpɨndar ogweyɨ ko ɨvɨ pɨpe.

¹⁰Iyavei akoi ogweyɨ va'e ko ɨvɨ pɨpe oso ɨvave ɨvate katu va'esave, sekoi va'erä opakatu rupi.

¹¹A'e ni'ä ombou amove ava upe Jesús ñe'ë mombe'usar seko agwä, ambuae upe ombou Tüpä ñe'ë mombe'u agwä, ambuae upe ombou ñe'ësa pɨsɨrösa mombe'u agwä, ombou avei ambuae upe vɨroyasar rärö agwä iyavei iporombo'e agwä.

¹²Egwë e'i ava vɨroyasar mbo'e oyeupe mboravɨkɨ apo agwä, ambuae vɨroyasar movɨräkwä tuprɨ katu agwä avei Cristo rese

¹³opakatu yaiko tuprɨ rane itera oyese Jesús rese yeroyasa pɨpe iyavei yaikwa tuprɨra Tüpä Ra'ɨrɨ rekokwer, a'ese yaiko tuprɨra yande Cristo rese inungar ava ipɨ'añemoñeta tuprɨ katu va'e, a'ese yasupitɨra Cristo rekokwer.

¹⁴Evokoiyase nda'e iri chira chi'ïvä'emi nungar yaiko ova-ova tëi va'e inungar ɨvɨtu yande reraso va'e oyeupi ndayayembopa uka iri chira ava kokotɨ tëi oporombo'e va'e upe, iyavei yande rerova pota va'e upe mba'e tëi pɨpe.

¹⁵Yande rumo evokoiyase yañe'ëra mba'e supiete va'e rese poroaɨsusa pɨpe, iyavei yaroya katu-katu irira Cristo opakatu yande rekokwer pɨpe, a'e ni'ä yande rerekwar sekoi.

¹⁶Esepia Cristo yande mboya tuprɨ oyese, yande moenda tuprɨ avei yande rereko, egwë e'i a'e yande mboyemboya oyese ñepëi va'e nungar; ñepëi-pëi yaporavɨkɨ tuprɨse, a'ese opakatu yayeroya katu itera, yayemovɨräkwä katu aveira yande yeaɨsusa pɨpe.

¹⁷Ko rese aipo a'e peü, iyavei opokwai yande Yar rer pɨpe: ndapeiko iri chira inungar ava ndoikwai va'e Tüpä yuvɨreko, a'e yuvɨrekoi va'e opɨ'añemoñeta raisa pɨpe tëi

¹⁸ndoikatui mba'e rendukwa tuprɨ agwä yuvɨreko. Iyavei ndovɨrekoi tekovesa Tüpä suindar oyese, esepia ndoikwai Tüpä ñe'ë opɨ'añemoñeta e'ɨ̇sa pɨpe yuvɨreko.

¹⁹Ndoyuvɨnochi iri mba'e tëi apo agwä iyavei oyemondo mba'e tëi pɨpe, ndosɨkɨyei ete opakatu gwemimbotarai apo agwä yuvɨreko.

²⁰Pe rumo ndapeyembo'ei ete evokoi nungar mba'e rese Cristo rese peikose,

²¹supiete pesenduse porombo'esa supi tuprɨ va'e sekokwer rendar iyavei peyembo'e ite Jesús rekokwer rese supi peiko va'erä.

²²Sese, pesekuñaröra perekokwerai yɨpɨndar pereko va'e iyavei pepoira yɨpɨndar perekokwerai sui, esepia opa pe pɨ'a ñemoñeta rerova pe mba'e potaraisa.

²³Pesekuñarö katu pe pɨ'a ñemoñetaraisa yɨpɨndar pereko va'e,

²⁴iyavei peikora tekokwer ipɨasu va'e pɨpe, sese ni'ä Tüpä yande apo yande reko ɨ̇vi tuprɨ agwä, yande reko maräne'ɨ̇ va'erä supi tuprɨ va'e pɨpe, inungar a'e sekoi.

²⁵Sese ndaperemirä iri chira, iya rumo peñe'ë ñepëi-pëi mba'e supi tuprɨ va'e rese peyeupe, esepia ni'ä yande opakatu ñepëi ava rete resendar nungar yaiko.

²⁶Peyemboangaipai rene peñemoɨröse, iyavei ndiyai peñemoɨrö arɨ momba tuprɨ peiko.

²⁷Peipota ukai rene Karugwar upe peyeupe mba'e apo agwä.

²⁸Akoi imondarai va'e, timonda iri eme, toyapo mboravɨkɨ avɨye va'e ava iparaɨsu va'e pɨtɨ̇vɨï agwä.

²⁹Ndapeñe'ë rai chira, iyakatu rumo peñe'ë tuprɨra ñe'ësa avɨye va'e pɨpe ambuae peñe'ë rendusar mongere'ɨ̇ katu agwä yuvɨreko.

³⁰Peyapoi rene mba'e naporäi va'e Tüpä Espíritu Maräne'ɨ̇ mbovɨ'a e'ɨ̇ agwä, esepia ipɨpe sui ni'ä peiko Tüpä upe narä ite, ichui avei peipɨsɨra poropɨsɨrösa ipa va'e.

³¹Pepoi pɨ'a vɨräkwäsa sui, mba'e potaraisa sui, ñemoɨrösa sui, pe räse aisa sui, peñe'ë raisa sui, opakatu ambuae mba'e-mba'e tëi sui avei.

³²Iya rumo peiko tuprɨ ambuae ava upe pe yeaɨsusa pɨpe, peñeröiño itera peyeupe yepi inungar Tüpä iñeröi Cristo rese peü.