Read Guarayu COLOSENSES 2 Bible Online

COLOSENSES 2 - Guarayu bible

COLOSENSES 2

¹Che aipota peikwa che yemboakɨsa pe rekokwer rese, Laodicea pendar rekokwer rese, seta ambuae ava che kwapare'ɨ̇ rekokwer rese avei.

²Toyemongere'ɨ̇ katu, toyemboyoya gwasu oyeaɨsusa pɨpe yuvɨreko viya, iyavei sendukwa tuprɨsa pɨpe toyuvɨrekoi mba'e tuprɨ pɨpe viya opakatu peü, esepia Tüpä sui ndikwasai va'e mba'e peikwa tuprɨra ko mba'e imboyekwapɨ ramo, a'e ni'ä Cristo sekoi;

³a'e vɨreko opakatu mba'e yande mboarakwa agwä, mba'e rendukwa tuprɨ agwä avei.

⁴Ko mba'e amombe'u peü ava oñe'ë tuprɨaisa pɨpe tëi pe mbopa e'ɨ̇ agwä.

⁵Iyavei yepe amombrɨ aiko pe sui viña, pe rese che ma'endu'asa pɨpe rumo aikoveño pe reseve yepi, aikwa pegwata tuprɨaise pe reko ɨ̇visa pɨpe, ndapeyepepɨise kokotɨ rupi Cristo reroyasa sui. Sese che mbovɨ'areteño peye.

⁶Evokoiyase inungar akoi peipɨsɨ Jesucristo pe Yar agwä, egwë peye aveira peiko Cristo rese arɨ yakatu rupi,

⁷pe yemovɨräkwäsa pɨpe, peyembo'esa rese peyemomirätä katura Cristo rese pe yeroyasa pɨpe, iyavei avɨye ndeu peye itera Tüpä upe arɨ yakatu yepi.

⁸Peikwa katu: peyembopa ukai rene araka'endar tëi ava arakwasa pɨpe, esepia a'e egwë e'i tëi va'e, ava suindar tëi yembo'esa, ɨvɨ pɨpendar ava seko ɨvate katu va'e pɨ'a ñemoñetasa tëi, nda'ei Cristo suindar porombo'esa.

⁹Esepia Tüpä reko pirätäsa oyekwa Cristo rese,

¹⁰Cristo sui avei Tüpä omboyekwa opakatu gweko pirätäsa, esepia Cristo sekoi opakatu mborerekwar ɨvɨ pɨpendar iyavei ɨva pendar rerekwar.

¹¹Ichui avei imbocircuncidaprɨ peiko, nda'ei rumo pe rete rese yaposa ava tëi rembiapo, ko rumo Tüpä oyapo va'e pe rekokwer rese, peiko va'erä Cristo rese, ipɨpe sui omokañɨpa pe angaipa pe sui.

¹²Pe apirämosa pɨpe opa ite pe rekokwerai ñotɨ̇sa Cristo rupive, egwë e'i avei pe rekokwer okwerayevɨ supive, esepia peyeroya ite Tüpä pirätäsa, a'e akoi ombogwerayevɨ omano va'e pa'ü sui.

¹³Pe ni'ä akoi yɨpɨndar omano va'e nungar tëi peiko peye mboangaipasa pɨpe; kurïtëi rumo Tüpä pe rekokwer mbogwerayevɨ Cristo reseve, iyavei iñeröi opakatu yande angaipa rese yandeu.

¹⁴Tüpä opa omboye'o yande angaipa yande reko momaräsar oime va'e sui; Cristo atɨkasa kurusu sui opa yande renose yande kañɨ rägwer sui.

¹⁵Ipɨpe sui Tüpä opa omokañɨ mborerekwareta seko pirätäsa va'e, Cristo rekokwer sui osekopɨpa opakatu ava rembiepiave inungar vavasa pendar ipɨsɨprɨ serasoprɨ va'e yepi.

¹⁶Evokoiyase toñe'ë-ñe'ë tëi eme ava pe rembi'u rese yuvɨreko pe ɨgwa rese avei; anise ndapemboeteise pieta, arɨ yasɨ osë ramomi va'e, arɨ mbɨtu'usa aveino.

¹⁷Esepia yɨpɨndar oime va'e mba'e ou agwä renonde egwë e'i tëiete, ko rumo Cristo supiete va'e sekoi.

¹⁸Peyapɨsakai rene ava ñe'ë katuprɨai porombopasa rese iyeruresa mbigwai ɨva pendar rese, iyavei osepia pota va'e mba'e ndayasepia va'e oyese yuvɨreko oyeeko mboɨvateai tëi va'e opɨ'a ñemoñetasa pɨpe yuvɨreko.

¹⁹Esepia a'e ndoyuvɨrekoi yande kwaisar Cristo rese, a'e omovɨräkwä va'e opakatu vɨroyasar yepi, evokoiyase a'e omboyemboya tuprɨ oyese, ñepëi va'e nungar vɨreko oyeupe Tüpä remimbotar rupi.

²⁰Pe omano va'ekwer peiko Cristo rese, iyavei ndapeiko iri ko ɨvɨ pɨpendar pɨ'a ñemoñetasa povrɨve tëi. ¿Ma'erä evokoiyase peroya vɨte ko ɨvɨ pɨpendar porokwaita egwë e'i tëi va'e

²¹inungar aipo e'i: “Pepokoi rene ko mba'e rese, ani avei pe'u evokoi nungar mba'e tëi, ndapeipɨsɨ chiaveira mba'e pepo pɨpe”?

²²Opakatu ko nungar porokwaita okañɨ tëi va'erä, esepia a'e ava remimbotar tëi yembo'esa iporokwaita tëi avei.

²³Ko mba'e avɨye anga'u arakwasa supiete va'e, esepia seroyasar a'e e'iño oyeruresa upe, oyeekomomini tëi iyavei omombaraɨsu gwetekwer yuvɨreko viña, a'e arakwasa rumo egwë e'i tëi va'e, esepia ndayande pɨtɨ̇vɨï ete yande yepepɨ agwä yande remimbotarai sui.