Read Guarayu COLOSENSES 4 Bible Online

COLOSENSES 4 - Guarayu bible

COLOSENSES 4

¹Pe avei serekwar, peyapo mba'e i'ɨ̇vi va'e pe pɨ'añemoñeta tuprɨsa pɨpe pe rembigwai upe. Pe avei peyemoma'endu'ara pe Yar ɨva pendar pereko va'e rese.

²Iyavei peyerure katu arɨ rupi pe ma'emo'äsa pɨpe, avɨye ndeu peyera Tüpä upe.

³Peyerure avei ore rese, tore pɨtɨ̇vɨï Tüpä oñe'ëngagwer mombe'u vɨte agwä toroñe'ë vɨte avei ko ñe'ësa Cristo resendar Tüpä omboyekwa ramo va'e rese yandeu, sese tëi ni'ä ko che rokendasa.

⁴Peyerure katu che rese, tamombe'u tuprɨ ko ñe'ësa opakatu upe sendukwa tuprɨ agwä, egwë ta'e che kwaita mboavɨye.

⁵Peiko tuprɨ pe arakwasa pɨpe ava nda'ei va'e Cristo reroyasar rovake, peyapo tuprɨ mba'e ko tekokwer avɨye vɨteseve.

⁶Pe reko avɨye tuprɨsa pɨpe peñe'ëra yepi, iyavei peikwa tuprɨra ñe'ësa mboyevɨ agwä ñepëi-pëi ava upe.

⁷Ko yande rɨvrɨ yande rembiaɨsu Tíquico, che pɨtɨ̇vɨï tuprɨsar, a'e oporavɨkɨ tuprɨ yande Yar rekokwer rese che rupi, a'e omombe'ura che rekokwer peü.

⁸Sese ko amondo peü ore rekokwer kwa tuprɨ agwä, pe mongere'ɨ̇ katu agwä avei.

⁹Ko Onésimo avei osora supi, a'e avei yande rembiaɨsu, yande rɨvrɨ seko tuprɨ va'e pe rekwa pendar. A'e ñuvɨrïo mbɨa omombe'ura peü opakatu mba'e oime va'e ko'ave.

¹⁰Aristarco, che ndugwer che rokendasave, omondo oma'endu'asa peü; iyavei Marcos Bernabé ri'ɨrɨ. Peikwa ite Marcos oso va'erä eipeve; osose pe pɨri, peipɨsɨ tuprɨñora.

¹¹Iyavei omondo Jesús oma'endu'asa peü, a'e serer akoi Justo. Ko gwerañomi Jesús reroyasar pa'üve judío oporavɨkɨ va'e che rupi yuvɨreko Tüpä mborerekwasave narä, a'e ni'ä che mbovɨ'a yuvɨreko yepi.

¹²Epafras avei omondo oma'endu'asa peü, a'e pe rekwa pendar ite, Cristo Jesús rembigwai; a'e oyerure va'e pe rese yepi toyemovɨräkwä tuprɨ iyavei toyuvɨrekoi Tüpä remimbotar rupi yuvɨreko oyapave.

¹³Che aikwa ite Epafras rekokwer, a'e oyemboakɨ oyeruresa pɨpe pe rekokwer rese, Laodicea pendar rekokwer rese, Hierápolis pendar rekokwer rese avei.

¹⁴Iyavei yande rembiaɨsu Lucas, oporoposano va'e, Demas reseve omondo oma'endu'asa yuvɨreko peü.

¹⁵Pemboavɨravemi eipeve yande rɨvrɨ Laodicea pendar oreu. Kuña Ninfa serer va'e avei, toñemonu'ä avei Tüpä reroyasar opakatu gwëtä rupi yuvɨreko.

¹⁶Peyerokɨ pare, pemondo ko kwachiar Laodicea pendar Jesús reroyasar upe iyerokɨ agwä; pe Laodicea pendar kwachiar rese avei peyerokɨra.

¹⁷Pemombe'u ko Arquipo upe: “Emboavɨye tuprɨ yande Yar nde kwaisa peyera.”

¹⁸Che Pablo aiko, aikwachia ko che ma'endu'asa peü. Tapema'endu'a vɨte che rokendasave che rese. Avɨye peü yande Aposar tape pɨtɨ̇vɨï oporoaɨsusa pɨpe.