Read Guarayu 2 TIMOTEO 3 Bible Online

2 TIMOTEO 3 - Guarayu bible

2 TIMOTEO 3

¹Iyavei ereikwara arɨ ipa va'e yepotasa, a'ese oimerä tekokwer yavai katu va'e.

²A'ese ava a'e ae tëi oyeaɨsura yuvɨreko, gwarepochi tëi oipotaraira, oyemboɨvateaira oyemboeteiai tëi aveira. Oñe'ë raira Tüpä rese yamotare'ɨ̇save, nomboyeroyai chira oyesupa yuvɨreko, seta avei avɨye ndeu nde'i va'e ava upe, iyavei nomboetei chira Tüpä rese pɨ'a ñemoñetasa yuvɨreko.

³Ndosaɨsui chira oyesuindar, niñeröi chiaveira oyeupe yuvɨreko, iyavei ima'echiröi aira noñemosaï chira mba'e tëi apo agwä yuvɨreko, gweko asɨ pɨpe avei yuvɨrekoira iyavei opakatu mba'e avɨye va'e oyamotare'ɨ̇ra yuvɨreko.

⁴Iyavei omondora ava yamotare'ɨ̇mbar upe, ndiporomboetei chira gwemimbotar apo yuvɨreko, iyavei oyemboɨvateaira osekara gwemimbotar tëi oyembovɨ'a agwä ipɨpe rumo Tüpä ndosaɨsui chira yuvɨreko.

⁵A'e inungar-ra Tüpä rese ite yuvɨrekoi va'e viña. Tüpä pirätäsa rumo nomboyekwai chietera gwembiapo pɨpe yuvɨreko oyese. Sese nde, eyepepɨño evokoi nungar ava sui.

⁶Esepia evokoi nungar ava pa'üve oime yuvɨroikeño tëi va'e oɨ rupi kuña ndoikatui va'e angaipa rerekosar mbopa agwä, esepia a'e kuña opɨ'añemoñeta raisa pɨpe yuvɨrekoi va'e,

⁷yepe oyapɨsaka tuprɨ tëira ñe'ësa rese yuvɨreko viña, ndosupitɨi ete rumo ko porombo'esa supiete va'e rendukwa agwä yuvɨreko.

⁸Inungar ko ava ipaye va'e Janes iyavei Jambres serer va'e oyemboyere Moisés amotare'ɨ̇ yuvɨreko, egwë e'i avei evokoi ava porombo'esa supiete va'e amotare'ɨ̇sar yuvɨreko. A'e oyemomarä va'e opɨ'añemoñeta rai pɨpe, ndovɨroyai ete Jesús porombo'esa yuvɨreko.

⁹Ndoporombopa iri chira rumo yuvɨreko, esepia opakatu ava oikwara imba'ekwa e'ɨ̇ rese, inungar ko ñuvɨrïo mbɨa Moisés amotare'ɨ̇mbar yuvɨrekoi araka'e.

¹⁰Nde rumo che reko rupi tuprɨ ereiko, esepia ereroya tuprɨño che porombo'esa, che pɨ'a ñemoñetasa, che Cristo rese yeroyasa, che reko mbegwesa, che poroaɨsusa iyavei che ñemosasa,

¹¹ereiporara avei mba'e-mba'e tëi che rupive eiko, inungar oyapo Antioquía ve, Iconio ve Listra ve avei yuvɨreko cheu. ¡A'eve aiporara mba'e-mba'e tëi paraɨsusa vichiko! Yande Yar rumo che pɨsɨrö opakatu evokoi mba'e-mba'e tëi sui.

¹²Supiete opakatu akoi Cristo Jesús rese gwekokwer vɨreko pota va'e, oiporarara mba'e-mba'e tëi yuvɨreko;

¹³ava sekokwer naporäi va'e rumo, iporombopa serai va'e avei ombouvicha katura gwekokwerai, oporombopa-mbopa tëira yuvɨreko, iporombopasa pɨpe rumo ambuae omboyevɨra chupe.

¹⁴Nde rumo ereyemovɨräkwäño itera akoi ereyembo'e va'e rese, a'e ereroya ite sereko. Esepia ni'ä ereikwa uma nde mbo'e yuvɨreko.

¹⁵Iyavei eyemoma'endu'a ko rese, nde chi'ïvä'e suive ite ni'ä ereikwa Tüpä ñe'ë Ikwachiaprɨ eiko, a'e ni'ä nde momba'ekwa va'e nde pɨsɨrö agwä Cristo Jesús reroyasa pɨpe.

¹⁶Opakatu ko ñe'ësa Ikwachiaprɨ ou va'e Tüpä sui, avɨyeai ete porombo'e agwä, iyavei poromboyapɨsaka agwä, poromboarakwa tuprɨ agwä avei ava upe ñe'ë tuprɨ agwä sekokwer mo'ɨ̇vi agwä yepi,

¹⁷ichui ava Tüpä rese yuvɨrekoi va'e oyemoigätu voira opakatu tekokwer tuprɨ apo agwä yuvɨreko.