Read Guarayu 2 TIMOTEO 4 Bible Online

2 TIMOTEO 4 - Guarayu bible

2 TIMOTEO 4

¹Iyavei ko rese che orokwai pota Tüpä rovake Cristo Jesús rovake avei akoi ou va'erä Omborerekwasa reseve oikove va'e, omano va'e rekokwer rese porandu agwä

²emombe'u Tüpä ñe'ëngagwer arɨ rupi, esekuñarö avei ava rekokwer. Eporomboarakwa, eporomongere'ɨ̇ tuprɨ avei opakatu nde rekoasɨ e'ɨ̇sa pɨpe.

³Esepia koiye ava ndosendu pota iri chira porombo'esa avɨye va'e yuvɨreko; a'ese gwemimbotar tëi osekara ombo'e agwä, gwemimbotar tëi avei omombe'u ukara oyeupe yuvɨreko.

⁴Iyavei oyepepɨra ko mba'e supiete va'e sui, vɨroyara rumo opakatu ava remimombe'u tëi yuvɨreko.

⁵Nde rumo ererekoveñora nde arakwa tuprɨsa, eñemosaño mba'e naporäi va'e upe, nde'añeko katu ñe'ësa pɨsɨrösa resendar mombe'u agwä, emboavɨye tuprɨ avei opakatu nde poravɨkɨsa.

⁶Vɨrovɨ arɨ che retekwer mondo agwä manosave; inungar mba'e seropove'ëprɨ yande Yar upe.

⁷Ayapopa che rekoete pɨpe che poravɨkɨsa avɨye va'e che amotare'ɨ̇mbar pa'üve, amboavɨye che kwaita, ndayepepɨi ete che yeroyasa sui.

⁸Kurïtëi che rärö ɨvave ko porerekosa che poravɨkɨ avɨye va'e resendar, yande Yar Mborerekwar seko ɨ̇vi va'e ni'ä omboura cheu a'e arɨ pɨpe, nda'ei chira cheu gweraño. Ombou aveira opakatu Cristo raɨsusa pɨpe iyevɨsa osärö va'e upe yuvɨreko.

⁹Ndepoyava katu eyu che repia agwä;

¹⁰esepia Demas che reya ko mba'e ɨvɨ pɨpendar tëi potasave, ichui tëi oso tekwa Tesalónica ve. Crescente oso tekwa Galacia rupi, iyavei Tito oso Dalmacia ve.

¹¹Lucas gweraño sekoi che pɨri. Eseka Marcos ichui eru nde yeupi, esepia avɨyeteramo che pɨtɨ̇vɨïra mboravɨkɨ rese.

¹²Tíquico amondo tekwa Éfeso ve.

¹³Akoi ereyuse, eru avɨrave che yemboyo'asa Carpo rëtä sui aseya va'e Tróade ve vitu; iyavei kwachiar gwasu, ambuae kwachiar reseve, a'e aipota katu va'e erupa eyu.

¹⁴Alejandro gwarepochi mombesar oyapo mba'e tëi cheu; yande Yar rumo oikwara sembiapokwer rese chupe.

¹⁵Iyavei nde eikwa katu ichui, esepia a'e yande amotare'ɨ̇ mba'e yande remimombe'u rese oiko.

¹⁶Yɨpɨndar añe'ëse che yoepɨ agwä mborerekwareta rovai, ndipoi ete che pɨtɨ̇vɨïsar; opakatuño ite che reya yuvɨreko. Tüpä tiñerö sese yuvɨreko chupe.

¹⁷Yande Yar Jesucristo rumo che pɨtɨ̇vɨï, che momirätä ko ñe'ësa pɨsɨrösa resendar mombe'u tuprɨ agwä opakatu ava nda'ei va'e judío upe. Egwë e'i avei che renose mba'e-mba'e tëi povɨvrɨ sui,

¹⁸a'e che pe'ara opakatu mba'e-mba'e tëi sui iyavei che pɨsɨröra oyepɨri ɨvave che so agwä. ¡Egwë te'i timboeteisa katu yande Yar apɨre'ɨ̇ va'e yepi! Amén.

¹⁹Emombe'u che ma'endu'asa Prisca upe Áquila upe avei, opakatu Onesíforo rëtä pendar upe avei.

²⁰Erasto opɨta Corinto ve, Trófimo rumo aseya imba'easɨse Mileto ve vitu.

²¹Ndepoyava katu eyu iro'ɨ yu renondeve. Ima'endu'a yuvɨreko nde rese Eubulo, Pudente, Lino, Claudia iyavei opakatu yande Yar vɨroya va'e yuvɨreko.

²²Yande Yar Jesucristo toiko nde rese, iyavei Tüpä taperovasa opakatu pe rereko.