Read Guarayu TITO 1 Bible Online

TITO 1 - Guarayu bible

TITO 1

¹Che Pablo, Tüpä rembigwai aiko iyavei Jesucristo ñe'ë mombe'usar semimbou aiko, Tüpä rese yeroyasa mondo agwä sembiporavo eta upe iyavei sese pɨ'a ñemoñetasa supi tuprɨ va'e kwa uka tuprɨ agwä,

²esepia ndopai va'e tekovesa apɨre'ɨ̇. Tüpä ndoporombopai va'e, omombe'u ko tekovesa ndopai va'erä,

³ipare kurïtëi arɨ oyepota yandeu, iñe'ëngagwer kwa agwä sese Tüpä yande Pɨsɨrösar che kwai oñe'ëngagwer mombe'u agwä.

⁴Nde Tito, nde ni'ä che ra'ɨrɨ ite ereiko sese yande poreroyasa pɨpe esepia oyoya yaroya va'e yaiko. Yande Ru Tüpä yande Pɨsɨrösar Jesucristo tombou oporovasasa nde reko tuprɨ agwä ndeu.

⁵Che oroeya vitu ka'a pa'ü Creta ve, mba'e opɨta vɨte va'e moigätu tuprɨ agwä iyavei tekwa yakatu rupi, ereñe'ëra ava kwakwa tüpäro pendar upe, amombe'u va'ekwer rupi ndeu.

⁶Ñepëi ava kwakwa otɨ̇arö va'e vɨrasora gwekokwer mba'e avɨye va'e rupi. Ñepëiño ite sekoira imer gwembireko rese, ta'ɨrɨ avei yuvɨrekoira mba'e avɨye va'e rupi anichira yuvɨrekoira mba'e-mba'e tëi pɨpe tiporeroya avei yuvɨreko.

⁷Akoi oyapo tuprɨ va'e tekwa pɨpe mba'e a'e yuvɨrekoi Tüpä mba'e rese i'añeko va'e, sese evokoiyase vɨrasora gwekokwer avɨye va'e rupi. Anichira ndasekoporäi yuvɨreko, anichira ndasorɨi oiko; nda'ei chiaveira kagwar tëi, ndivava serai chiaveira, tigwarepochi potarai eme yuvɨreko.

⁸Iyakatu rumo, omoingera ava oyepota va'e gwëtäve oyepɨri, iyavei avɨyeaira sekokwer ava upe yepi, osärö tuprɨra gwekokwer sereko; seko ɨ̇vi tuprɨ aveira, opakatu opɨ'añemoñetasa pɨpe.

⁹Iya oyemboya katu yembo'esa supi tuprɨ va'e rese yuvɨreko, ipɨpe sui tomongere'ɨ̇ katu ambuae eta yuvɨreko ko ñe'ësa avɨye va'e rese, pe mombe'u avei mba'e pereroya agwä ambuae ava upe.

¹⁰Esepia oime seta nimba'e reroyai va'e, ko vɨreko va'e pɨ'añemoñetasa judío yuvɨreko, a'e omondo-mondo tëi va'e oñe'ë ombopa tëi va'e avei ava yuvɨreko.

¹¹Evokoi nungar ava iyakatu pemongiriri, esepia a'e ni'ä seta ava oñemu va'e omboyepepɨ uka porombo'esa supi tuprɨ va'e sui yuvɨreko, oporombo'e mba'e kokotɨ tëi va'e rese gwarepochi rereko agwä tëi yuvɨreko.

¹²Oso ñepëi mbɨa Creta ɨgwar a'e aipo e'i omu rese oñe'ë: “Ko Creta ɨgwar yuvɨrekoi va'e semirañeteai, mba'e mɨmba nungar tëi, ikaruai, yangaipa vai yuvɨreko yepi.”

¹³Supiete aipo e'i; sese emboarakwa pirätä ite, evokoiyase tovɨroya tuprɨ ite ñe'ësa yuvɨreko

¹⁴iyavei tovɨroya eme ko judío oyesui tëi mba'e omombe'u va'e, iyavei ava porokwaita tëi a'e oyemboyere avei mba'e avɨye va'e sui yuvɨreko.

¹⁵Akoi ndaseko maräi va'e upe opakatu mba'e nimaräi; ndiporeroyai va'e ipɨ'a ñemoñeta rai tëi va'e upe rumo, ndipoi ete mba'e avɨye va'e, esepia ipɨ'a ñemoñeta yarakwasa avei naporäi ete.

¹⁶Aikwa Tüpä e'i tuprɨ tëi yuvɨreko, mba'e sembiapo rese rumo ikwasa seroya e'ɨ̇sa; a'e ni'ä ava ndosepia potai va'e, ndiporeroyai va'e ndoikatui mba'e avɨye va'e apo yuvɨreko yepi.