Read Guarayu HEBREOS 10 Bible Online

HEBREOS 10 - Guarayu bible

HEBREOS 10

¹Esepia Moisés porokwaita mba'e avɨye va'e ra'anga nungar tëi ou, nda'ei rumo a'e ite ou. Sese a'e porokwaita ndoikatui ete ava Tüpä rese oyemboya va'e reko mo'ɨ̇vi tuprɨ agwä, mba'e seropove'ëprɨ aravɨter yakatundar pɨpe.

²Supiete porokwaita oikatuse pe angaipa sui pe moatɨrö tuprɨ agwä viña, ndapeyandu iri chira pe angaipa viña, iyavei ndaperopove'ë iri chiaveira mba'e ruvɨ Tüpä upe yuvɨreko viña no.

³Ko seropove'ëprɨ rumo avɨye ite pemoma'endu'a uka agwä pe angaipagwer rese aravɨter yakatu.

⁴Esepia mba'e mɨmba ruvɨ tëi nomokañɨi ete yande angaipa yandesui.

⁵Sese Cristo ko ɨvɨ pɨpe ouse, aipo e'i Tüpä upe: “Ndereipota iri ni'ä mba'e mɨmba tëi porerekosa seropove'ëpɨ̇ra ndeyeupe narä, nde rumo ereyapo che retekwer evokoi nungarä.

⁶Iyavei nda'ei nde pɨ'a rupi mba'e mɨmba yukaprɨ sapɨprɨ avei, seropove'ësa va'e angaipa repɨrä yepi.

⁷Evokoiyase che aipo a'e: ‘Che ayu ko'ave, inungar ikwachiasa va'e che resendar kwachiar pɨpe yepi, ayapo va'erä mba'e nde remimbotar, che Ru Tüpä.’ ”

⁸Yɨpɨndar aipo e'i, Tüpä ndoipotai ete, iyavei nda'ei ipɨ'a rupi mba'e mɨmba reropove'ëprɨ, porerekosa mba'e sapɨprɨ avei angaipa mboye'o agwä, yepe a'e mborokwaita rupi seropove'ësa viña.

⁹Ipare aipo e'i: “Che ayu nde remimbotar apo agwä.” A'e ipɨpe omombopa yɨpɨndar va'e mba'e seropove'ëprɨ ko ambuae mba'e ipɨasu va'e apo agwä.

¹⁰Tüpä evokoiyase yande pe'a angaipa sui oyeupe narä, esepia Jesucristo oyapo ite semimbotar mba'e ñepëi reseve apɨre'ɨ̇ va'erä gwete mondo pɨpe.

¹¹Opakatu judío pa'i eta arɨ yakatu oyapo okwaita mba'e mɨmba avei-vei vɨropove'ë Tüpä upe yuvɨreko, yepe a'e vɨropove'ë tëi yuvɨreko viña, nomokañɨ katui ete rumo angaipa.

¹²Jesucristo rumo oyeeropove'ë ñepëi reseve angaipa repɨrä apɨre'ɨ̇ va'erä, ipare oso ɨvave, ogwapɨ öi Tüpä akato kotɨ.

¹³A'eve osärö öi Tüpä opase voi omondo yamotare'ɨ̇mbar ipovrɨve,

¹⁴esepia ñepëi reseve oyeeropove'ë pɨpe osekomo'ɨ̇vi tuprɨ Vu Tüpä rembipe'a apɨre'ɨ̇ va'erä.

¹⁵Iyavei Espíritu Maräne'ɨ̇ aipo e'i tuprɨ avei ikwachiaprɨ araka'endar pɨpe yandeu:

¹⁶“Che ñe'ëngagwer amboavɨye rane itera yuvɨreko chupe osupitɨse a'e arɨ ipapaprɨ kuri, a'e ko e'i yande Yar Tüpä: Amondora che porokwaita ipɨ'a ñemoñetasa pɨpe aikwachia aveira iyapɨsakasa pɨpe.

¹⁷Ndayemoma'endu'a iri chietera yangaipagwer rese iyavei mba'e tëi sembiapokwer rese yuvɨreko.”

¹⁸Egwë e'i angaipa rese oimese ñeröisa, a'ese ndiya iri seropove'ësa mba'e angaipa repɨrä.

¹⁹Sese che rɨvrɨ eta, iya ite kurïtëi yande reike agwä Tüpä rovai yande sɨkɨye e'ɨ̇sa pɨpe Jesús ruvɨ pɨpe sui,

²⁰yaikoveño itera ipɨasu va'e tekokwer tekovesa yandeu ombou va'e pɨpe, a'e ni'ä omboi tüpäro pɨpe asɨasa turukwar yande reike agwä Tüpä rovai, a'e turukwar inungar Jesús rete.

²¹Iyavei a'e yande pa'i ɨvate katu va'e ite sekoi Tüpä rëtä rärösar.

²²Sese yayemboya katura Tüpä rese yande pɨ'añemoñeta tuprɨsa pɨpe iyavei yande yeroyasa ipa voi va'e pɨpe, supiete a'e opa yande reko mbokatuprɨ yande pɨ'añemoñeta raisa sui iyavei omoatɨrö yande rete ɨ maräne'ɨ̇ pɨpe.

²³Yayemovɨräkwä katura mba'e avɨye va'e yande remiarö pɨpe yamombe'u va'e ava upe yande pɨ'añemoñeta rerova e'ɨ̇sa pɨpe. Esepia Tüpä omboavɨye itera mba'e gwemimombe'ugwer yandeu.

²⁴Iyavei yasekañora ñepëi-pëi yañepɨtɨ̇vɨï va'erä yande yeaɨsu katu agwä iyavei mba'e tuprɨ apo agwä yande yeupe.

²⁵Ndayamopanei chira yande ñemonu'äsa Tüpä upe, ndayaikoi chira omopane va'e nungar, iya rumo yayemongere'ɨ̇ katura ñepëi-pëi yande yeupe; esepia vɨrovɨ arɨ yande Yar yevɨ iri agwä.

²⁶Akoi tayemboangaipaño ite ya'ese, mba'e supi tuprɨ va'e kwa pare yaiko, ndipo iri ambuae seropove'ëpɨ̇ra evokoi yande angaipa repɨrä yandeu;

²⁷ñemoɨrösa ipirätä va'e gweraño oimerä yandeu iyavei tata gwasu apɨre'ɨ̇ va'e opara omokañɨ Tüpä amotare'ɨ̇mbar yuvɨrekoi va'e.

²⁸Akoi ava Moisés porokwaita ndovɨroyai va'e, avɨyeteramo oimese ñuvɨrïo, anise mbosapɨ rembiepiave, a'e sekokwer mombe'uise, a'e yukaprɨ ite saɨsue'ɨ̇sa pɨpe yuvɨrekoi.

²⁹Ndapeikwai vo ¿akoi Tüpä Ra'ɨrɨ marä-marä tëi rerekosar suvɨ reroɨrösar avei a'e oipɨsɨra ñemoɨrösa tuvicha katu va'e yuvɨreko, Tüpä Espíritu raɨsusar reroɨrösar avei? Evokoi tuvɨ pɨpe ni'ä imboavɨyesa ñe'ësa yepi, ipɨpe avei ni'ä a'e ava Tüpä rembipe'a yuvɨrekoi.

³⁰Yaikwa ni'ä yande Yar aipo e'ise: “Che ite ni'ä opara mba'e amoigätu: che avei ambo'epɨpara.” Aipo e'i avei oñe'ë: “Yar oporandura mba'e sembiapokwer rese ava oyeupendar upe.”

³¹¡Mba'e tëiete yaikese Tüpä oikove va'e ñemoɨrösa pɨpe!

³²Peyemoma'endu'a akoi yɨpɨndar mba'e araka'endar rese, akoi peipɨsɨse tesapesa avɨye va'e, peyemovɨräkwäño avei pe rekoa'äsa upe pe yemombaraɨsusa pɨpe.

³³Esepia akoi amove pe pa'ü pendar rese iñe'ë-ñe'ë tëi yuvɨreko, marä-marä tëi avei pe rereko opakatu ava rovake, ambuae pe pa'ü pendar evokoiyase peipɨtɨ̇vɨï peyemombaraɨsusa rese.

³⁴Pesaɨsuño avei ambuae sokendaprɨ yuvɨreko, opase pe mba'e vɨrokwa yuvɨreko pe sui peñemosaño avei pe vɨ'aretesa pɨpe peiko, esepia peikwa ɨvave perekora mba'e avɨye katu va'e iyavei apɨre'ɨ̇ va'e.

³⁵Sese pemokañɨ tëi eme Tüpä rese pe yeroyasa, esepia evokoiya pe rekosa pɨpe omoime ukara mba'e tuprɨ peü kuri.

³⁶Pe rumo peyemovɨräkwäño itera mba'e-mba'e tëi upe Tüpä remimbotar apo agwä semimombe'ugwer oime va'erä pɨsɨ agwä kuri.

³⁷Supiete Ikwachiaprɨ pɨpe aipo e'i Tüpä: “Ou pɨ'aivi etera, akoi ou va'evɨ. Ndiaraka'ei chietera.

³⁸Akoi seko katuprɨ va'e che rese, a'e oporeroyasa pɨpe yuvɨrekovera; akoi oyepepɨse rumo che sui, che evokoiyase ndavɨ'ai chira sese.”

³⁹Yande nda'ei oyepepɨ va'e nungar yaiko, evokoi nungar ni'ä okañɨ tëi va'erä yuvɨreko, yande rumo yayeroya sese ipɨpe yañepɨsɨrö.