Read Guarayu HEBREOS 11 Bible Online

HEBREOS 11 - Guarayu bible

HEBREOS 11

¹Supiete yarekose yande yeroyasa Tüpä rese, a'ese yaikwa a'e ombou itera mba'e yasärö va'e yandeu; iyavei yaikwa ite oime mba'e ndayasepiai va'e.

²Supiete yande ramoi araka'endar oporeroyasa pɨpe avɨye ite Tüpä pɨ'ave.

³Tüpä rese yande yeroyasa pɨpe yaikwa a'e oñe'ë pɨpe ite oyapo opakatu mba'e, sese yaikwa kurïtëindar mba'e yasepia va'e mba'e ndayasepiai va'e apoprɨ.

⁴Tüpä reroyasa pɨpe Abel vɨropove'ë oporerekosa Tüpä upe avɨye katu va'e Caín porerekosa sui, sese Tüpä vɨreko ava seko katuprɨ va'e nungar ipɨpe sui oipɨsɨ iporerekosa. Yepe Abel omano va'e sekoi viña, a'e rumo oñe'ë vɨteño Tüpä rese oyeroyasa pɨpe oiko.

⁵Enoc avei Tüpä rese oyeroyasa pɨpe serasosa ko ɨvɨ pɨpe sui, imano e'ɨ̇ agwä, ava ndosepia iri ete yuvɨreko, esepia Tüpä vɨraso sekove reseve. Iyavei Ikwachiaprɨ pɨpe aipo e'i, yɨpɨndar vɨraso e'ɨ̇ vɨteseve, Enoc rekokwer avɨyeai ete Tüpä upe.

⁶Nda'ei ete rumo Tüpä pɨ'a rupi yaiko ndayayeroyaise sese, esepia yayemboya potase Tüpä rese, yayeroya rane itera sese iyavei omondora mba'e avɨye va'e vɨroyasar upe narä.

⁷Tüpä reroyasa pɨpe avei Noé, a'ese Tüpä omombe'u chupe mba'e ndasepiasa vɨtei va'e, evokoiyase seroyasave oyapo arca oyesuindar pɨsɨrö agwä. Iyavei sese oyeroya pɨpe omombe'u ava ko ɨvɨ pɨpendar kañɨ agwä, a'e rumo Tüpä rese oyeroya pɨpe oñepɨsɨrö.

⁸Tüpä rese oyeroyasa pɨpe avei Abraham, oyeupe ñe'ëse omboyeroya ite oso ɨvɨ pɨsɨ agwä Tüpä remimbotar rupi. Osë oɨvɨ sui oso va'ëra ɨvɨ ndikwai va'esave,

⁹oporeroyasa pɨpe avei sekoi ambuae ava nungar ɨvɨ Tüpä remimondosa rupi. Sekoi avei oɨ mba'e pirer apoprɨ pɨpe, egwë e'i tuprɨ avei ta'ɨrɨ Isaac iyavei Jacob, a'e avei oipɨsɨ ɨvɨ Tüpä remimombe'ugwer yuvɨreko.

¹⁰Esepia Abraham osäröño ite tekwa ɨva pendar ovɨräkwä va'e, Tüpä ni'ä a'e tekwa rä'asar, yaposar avei.

¹¹Yepe Sara nimembɨi va'e viña iyavei Abraham okwakwami, Tüpä rese oyeroyasave rumo oipɨsɨ pirätäsa Tüpä sui gwa'ɨ agwä, esepia vɨroya ite Tüpä oñe'ë omboavɨye agwä chupe.

¹²Egwë e'i Abraham rekokwer, yepe okwakwami viña, vɨreko rumo gwa'ɨrɨ, a'e ichuindar se'ɨi eteanga koiye, inungar yasɨtata iyavei inungar ɨvɨ ku'i paragwasu popɨ rupindar ndayaipapa katui va'e ite.

¹³A'e ava opakatu ite omanopa tëi mba'e ndoipɨsɨ vɨtei seve Tüpä semimombe'ugwer oyeupendar yuvɨreko; iyavei a'e vɨrekose poreroyasa, osepia avei amombrɨ rupive tëi yuvɨreko, sorɨvete avei imboavɨravesave inungar ambuae ɨvɨ pɨpendar yuvɨreko raimi tëi va'e ko ɨvɨ pɨpe.

¹⁴Iyavei aipo e'i va'e oikwa uka tuprɨ yandeu, oseka vɨte oyeupendar ɨvɨ yuvɨreko.

¹⁵Ipɨ'añemoñetase rumo ɨvɨ gweko agwer rese yuvɨreko viña, a'eve avei oyevɨ irira yuvɨreko viña;

¹⁶a'e rumo oipota ambuae ɨvɨ avɨye katu va'e yuvɨreko, a'e ɨva pendar. Sese Tüpä nochi ete, che Ru Tüpä oyeupe'ese, esepia vɨreko ite tekwa imoigätuprɨ chupe narä.

¹⁷Tüpä rese oyeroyasa pɨpe Abraham, gwekoa'äse vɨropove'ë gwa'ɨrɨ Isaac yukapɨrä. A'e vɨropove'ë pota voi ete ñepëi va'e gwa'ɨrɨ, yepe Tüpä araka'e aipo e'i chupe viña:

¹⁸“Nde ra'ɨrɨ Isaac sui seta oimerä ndesuindar.”

¹⁹Esepia Abraham oikwa ite Tüpä vɨrekose pirätäsa ava omano va'e mbogwerayevɨ iri agwä, evokoiyase Abraham imano rägwer sui ete oipɨsɨ iri gwa'ɨrɨ araka'e, ipɨpe sui a'e omboyekwa mba'e avɨye va'e yandeu.

²⁰Tüpä rese oyeroya pɨpe avei Isaac osovasa Jacob, Esaú avei mba'e oime va'erä pɨsɨ agwä.

²¹Iyavei Tüpä rese oyeroya pɨpe Jacob omano pota agwä, osovasa ñepëi-pëi José ra'ɨrɨ, a'ese opokoka rese tëiete oyemovɨräkwä oyerure agwä Tüpä upe imboeteisa pɨpe.

²²Tüpä rese oyeroya pɨpe avei José, omano agwä renonde aipo e'i, yande mu Israel opara yuvɨnosë ɨvɨ Egipto sui kuri, ipare oyokwai omu oɨtakwer rerova agwä araka'e.

²³Tüpä rese oyeroya pɨpe avei, o'ase Moisés iyesupa oñomi mbosapɨ yasɨ rupi yuvɨreko; esepia a'e pitani ikatuprɨai, iyavei ndoyembosɨkɨyei ete mborerekwar ɨvate katu va'e porokwaita sui yuka agwä yuvɨreko.

²⁴Tüpä rese oyeroyasa pɨpe avei, okwakwase Moisés, ndoipotai ete, mborerekwar faraón rayrɨ membrɨ oyeupe'e agwä;

²⁵a'e rumo oipota katu marä-marä tëi gwereko agwä Tüpä reroyasar reseve chi'ï rupive mba'e tëi rese yembovɨ'a rägwer sui.

²⁶Avɨye katu ite chupe Tüpä rembiporavo upe narä mba'e tëi porara agwä, Egipto pendar mba'e eta sepɨrusu va'e rereko rägwer sui; esepia a'e oikwaño ite oyeupe narä porerekosa Tüpä ombou va'erä.

²⁷Tüpä rese oyeroya pɨpe avei osë ɨvɨ Egipto sui osɨkɨye e'ɨ̇sa pɨpe mborerekwar gwasu rorɨe'ɨ̇se; oyemovɨräkwäño ite oyese mba'e apo agwä, avɨye osepia va'e ite Tüpä akoi ndoyekwai va'e.

²⁸Tüpä rese oyeroya pɨpe avei Moisés oyapo Pascua pieta, opa uka oipichi ava upe okenda rese mba'e mɨmba ruvɨ Tüpä rembigwai oporoyuka va'e ava Israel pendar ra'ɨrɨ ɨpɨ yuka e'ɨ̇ agwä.

²⁹Tüpä rese oyeroya pɨpe avei ava Israel pendar osasa paragwasu Pirä Va'e ɨvɨ ipiru va'e arɨ rupi yuvɨraso; ipare yamotare'ɨ̇mbar Egipto pendar, egwë ya'e avei e'i yuvɨreko viña, ɨ rumo opaño oyopɨ.

³⁰Tüpä rese oyeroya pɨpe avei Israel pendar oyerese ñuvɨrïo ova arɨ rupi tekwa Jericó rese, opa ñachisa onduru.

³¹Tüpä rese oyeroya pɨpe avei Rahab, oyemondo-mondo tëi va'ekwer, nomanoi ete ambuae ava mba'e-mba'e tëi va'e rupi, esepia a'e oipɨsɨ tuprɨño gwëtäve Israel pendar Jericó ɨvɨ repiasar.

³²¿Mba'e irivo amombe'ura peü? Ipane ite rumo arɨ imombe'upa agwä cheu, Gedeón, Barac, Sansón, Jefté, David, Samuel iyavei opakatu Tüpä ñe'ë mombe'usar rekokwer.

³³Evokoi avei Tüpä rese oyeroya pɨpe osekopɨ ambuae ɨvɨ pendar, oporokwai tuprɨ gweko ɨ̇visa pɨpe, oipɨsɨño ite Tüpä suindar mba'e semimombe'ugwer yuvɨreko, oiyurumboyaño avei yagwar yuvɨreko,

³⁴ombogwe avei tata ipirätä va'e, oyeepɨ avei kɨse puku pɨpe oyuka rägwer sui; ava nipirätäi va'ekwer rumo oyemomirätä yuvɨreko, oyemovɨräkwä ite vavasave oyese; opaño avei oamotare'ɨ̇sar sundao osekopɨ yuvɨreko.

³⁵Oime avei amove kuña vɨreko iri va'ekwer omu manosa sui imbogwerayevɨprɨ. Ambuae rumo omanopaño ite teko rasɨsa pɨpe, yasë katu ko nungar mba'e sui nde'i ete yuvɨreko kwerayevɨsa avɨye katu va'e pɨpe gweko agwä.

³⁶Ambuae iparaɨsu katu ava upe oñeroɨrösa pɨpe, onupasa pɨpe, oapɨ̇chi-pɨ̇chisa pɨpe, vokendasa pɨpe avei yuvɨreko.

³⁷Ambuae eta evokoiyase oapi-apise ita pɨpe opa omano yuvɨreko, amove imombɨtesa ɨvɨra asɨasa pɨpe, anise ambuae yukasa kɨse puku pɨpe; amove ipa'ü pendar ogwata tëi, ovesa, kavara pirerño tëi iyemondesa, iparaɨsu mba'e pore'ɨ̇ yuvɨreko nombo'e katui ava ipɨ'a ñemoñetasa pɨpe sereko iyavei marä-marä tëi vɨreko yuvɨreko no.

³⁸Evokoi seko katuprɨ va'e yuvɨreko ndiyai ko ɨvɨ pɨpendar Tüpä kwapare'ɨ̇ upe vɨreko va'erä oyepa'üve a'e ogwata tëi ɨvɨ iporupɨre'ɨ̇sa rupi, ɨvɨtrɨ rupi, mba'ekwar rupi avei yuvɨreko.

³⁹Yepe a'e opakatu avɨye ite Tüpä upe oyeroyasa rese yuvɨreko viña, ndoipɨsɨi ete rumo oyeupe Tüpä remimombe'ugwer yuvɨreko;

⁴⁰esepia Tüpä omoime mba'e avɨye katu va'e yandeu oyoya tuprɨ toipɨsɨ gwekokwer i'ɨ̇vi tuprɨ agwä che remimombe'ugwer rupi yuvɨreko o'esa pɨpe, yandeu opakatu avei.