Read Guarayu HEBREOS 4 Bible Online

HEBREOS 4 - Guarayu bible

HEBREOS 4

¹Oime vɨte Tüpä remimombe'u yande yaike va'erä ipɨri yande pɨtu'u agwä, sese iya ite yañearö tuprɨ, avɨyeteramo ñepëi pe pa'ü pendar ndoikei chira.

²Esepia yandeu avei imombe'usa ñe'ësa poropɨsɨrösa resendar inungar yande ramoi upe ɨvɨ iporupɨre'ɨ̇ rupi yuvɨreko araka'e. Ko ñe'ësa rumo ndoipɨtɨ̇vɨï ete a'e ava yuvɨreko. Esepia a'e osendu yuvɨreko seroya e'ɨ̇save tëi.

³Yande rumo yaroya va'e, yaikera yande pɨtu'u agwä, a'e chupe Tüpä aipo e'i: “Sese añemoɨrö a'e ava upe ñepëi reseve ndoyuvɨroikei chietera che pɨtu'usa pɨpe opɨtu'u agwä yuvɨreko.” Tüpä rumo yɨpɨve opa omboavɨye oporavɨkɨsa;

⁴esepia ko imoñuvɨrïo ova arɨ resendar ñe'ësa oime Ikwachiaprɨ pɨpe aipo e'i: “Tüpä opɨtu'u opakatu oporavɨkɨsa sui imoñuvɨrïo ovasa arɨ pɨpe.”

⁵Iyavei aipo e'i iri Ikwachiaprɨ pɨpe: “Ndoyuvɨroikei chietera che pɨtu'usa pɨpe opɨtu'u agwä yuvɨreko.”

⁶Ipane vɨte rumo amove ava yuvɨroike va'erä a'e pɨtu'usave, akoi yɨpɨndar osendu tëi va'e rumo ñe'ësa poropɨsɨrösa resendar, ndoyuvɨroikei ete seroya e'ɨ̇sa pɨpe yuvɨreko.

⁷Sese, Tüpä omombe'u iri arɨ yandeu, ñekuñarösa ipɨasu va'e resendar “kurïtëi rumo”, omombe'u iri ñe'ësa koiye katundar araka'e, a'e David omombe'u Ikwachiaprɨ pɨpe aipo e'i va'e: “Supiete pesenduse Tüpä ñe'ë aipo e'i va'e, peye pɨ'amoatäi rene katu chupe.”

⁸Esepia Josué omondose ko pɨtu'usa Israel pendar upe araka'e viña, Tüpä evokoiyase noñe'ë iri chira ko ambuae arɨ rese viña.

⁹Evokoiyase oimeño itera mbɨtu'usa iporavoprɨ ava Tüpä upendar upe narä;

¹⁰esepia akoi oike va'e Tüpä pɨtu'usa pɨpe, opɨtu'u oporavɨkɨsa sui, inungar Tüpä opɨtu'u omba'e mboavɨye pare araka'e.

¹¹Sese yayemovɨräkwä katura yande reike agwä evokoi mbɨtu'usa pɨpe, anichira ava araka'endar seroya e'ɨ̇sar rekokwer rupi tuprɨ avei yaikora.

¹²Esepia Tüpä ñe'ëngagwer vɨreko tekovesa iyavei pirätäsa. A'e inungar kɨse saimbe katu va'e ambuae kɨse puku saimbe yoya va'e sui, a'e oike va'e ite yande avɨterve egwë e'i avei iñe'ëngagwer oñatoi ete yande ä yande espíritu avei; omboyekwa tuprɨ avei yande pɨ'añemoñeta mba'e rese porandu agwä yandeu.

¹³Ndipoi ete ni'ä mba'e Tüpä rembiapo ñomiprɨ ichui; opakatu ite oikwa, osepia avei opakatu mba'e, a'e ni'ä oporandura opakatu yande rekokwer rese yandeu kuri.

¹⁴Jesús, Tüpä Ra'ɨrɨ, pa'i ɨvate katu va'e sekoi yandeu, oike va'e ɨvave Tüpä pɨri. Sese yayemovɨräkwäño itera yande yeroyasa pɨpe yepi.

¹⁵Esepia yande pa'i ɨvate katu va'e oikwaño ite yande rekokwer pirätä e'ɨ̇sa, esepia a'e avei ni'ä yande nungar vɨroparaɨsu opakatu mba'e-mba'e tëi gwekoa'äsa pɨpe araka'e; a'e rumo ndoyemboangaipai ete ipɨpe.

¹⁶Sese yayemboya katura yande yeroyasa pɨpe yande Ru Tüpä mborerekwasa iporoaɨsusa rese avei, ipɨpe sui tayande paraɨsuereko gweko avɨyesa pɨpe yande pɨtɨ̇vɨï agwä mba'e tëi oimese yandeu.