Read Guarayu HEBREOS 7 Bible Online

HEBREOS 7 - Guarayu bible

HEBREOS 7

¹Ko Melquisedec aipo mborerekwar gwasu Salem pendar, iyavei pa'i Tüpä ɨvate katu va'e upendar sekoi araka'e. Abraham oyevɨse perɨ rupi ovavasa sui ou mborerekwar gwasu eta momba pare, a'ese Melquisedec osë voi ete oso Abraham rovaïchi Tüpä porovasasa mondo agwä chupe;

²a'ese Abraham omondo oporerekosa vavasa sui mba'e gweru va'e imboopayandepo yovaivesa sui ñepëi-pëi chupe, opakatu rovai ikwa agwä ko Melquisedec rer “mborerekwar gwasu seko ɨ̇vi va'e” oyapave aipo e'i, iyavei a'e mborerekwar ɨvate katu va'e Salem pendar sekoi, “mborerekwar ɨvate katu va'e mba'e tuprɨ resendar ” oyapave aipo e'i.

³A'e iyesupa rumo ndikwasai ete ichɨ iyavei tamoi, arɨ iyesu agwer avei imano agwer avei; egwë e'i sekokwer, inungar Tüpä Ra'ɨrɨ a'e pa'i apɨre'ɨ̇ va'e ite sekoi.

⁴Peyapɨsaka tuprɨ ko Melquisedec rekokwer rese, ɨvate ite sekoi araka'e yande ramoi Abraham teiete avei omondo imboopayandepo yovaivesa sui ñepëi-pëi mba'e porerekosa mborerekwareta ɨvate katu va'e sui gwembierokwa chupe.

⁵Moisés porokwaita pɨpe aipo e'i, opakatu Leví suindar pa'i eta yuvɨrekoi va'e vɨreko ite okwaita vɨrokwa va'erä opakatu ava sui ñepëi-pëi iporavɨkɨ imboopayandepo yovaivesa sui yuvɨreko, yepe Abraham suindar ite yuvɨrekoi va'e imu viña inungar a'e yuvɨrekoi yepi.

⁶Yepe Melquisedec nda'ei Leví suindar viña, a'e rumo oipɨsɨ Abraham sui evokoi porerekosa; Abraham, a'e akoi oipɨsɨ va'erä mba'e Tüpä remimombe'u. Egwë e'i Melquisedec Abraham rovasa;

⁷iyavei ndipoi chietera akoi sovasaprɨ ɨvate katu va'e sekoi oporovasa va'e sui yepi.

⁸Ko tekokwer pɨpe oipɨsɨ va'e ava poravɨkɨ reprɨ imboopayandepo yovaivesa sui ñepëi-pëi a'e ava rumo omano va'erä tëi yuvɨrekoi; Ikwachiaprɨ araka'endar pɨpe aipo e'i ñe'ësa Melquisedec resendar, esepia a'e nomano vɨtei va'e yepi.

⁹Iyavei aipo esa itera pa'i eta yuvɨrekoi va'e Leví suindar upe, iyavei kurïtëi vɨrokwa va'e imboopayandepo yovaivesa sui mboravɨkɨ reprɨ yuvɨreko, ipɨpe avei omboepɨ Melquisedec upe Abraham rupive yuvɨreko;

¹⁰esepia Abraham oyeseve vɨte Leví oyesuindar vɨreko, evokoiyase i'a e'ɨ̇ vɨteseve oyeepia Melquisedec rese yuvɨreko araka'e.

¹¹Ava Israel pendar oipɨsɨ mborokwaita pa'i Leví sui a'e Aarón suindar yuvɨrekoi va'e. Supietese pa'i eta ava vɨrekose Tüpä suindar gweko katuprɨsa evokoi mborokwaita reroya pɨpe viña, evokoiyase ndoyemboyekwai chietera ambuae pa'i viña. Nda'ei chira rumo a'e Aarón nungar, a'e Melquisedec nungar itera.

¹²Esepia Tüpä osekuñaröse evokoi pa'i kwaita, osekuñarö aveira supive mborokwaita;

¹³iyavei yande Yar rese, akoi Ikwachiaprɨ pɨpe aipo e'i ko ñe'ësa, nda'ei Leví suindar, a'e rumo Israel suindar sekoi, a'e ichui ndoyuvɨnosëi ete pa'igwä.

¹⁴Esepia ikwaprɨ ite yande Yar ouse Judá sui, iyavei Moisés noñe'ëi ete ichuindar rese, oñe'ëse pa'i kwaita rese.

¹⁵Iyavei ko oyekwa tuprɨ katu itera, oyekwase pa'i ipɨasu va'e Melquisedec nungar,

¹⁶a'e rumo nda'ei porokwaita rupi sekoi pa'igwä, a'e oike pa'i gweko agwä ɨvɨ pɨpendar pɨ'a ñemoñetasa rupi tëi, iyavei a'e oike teko pirätäsa ndopai va'e pɨpe ite.

¹⁷Esepia Tüpä aipo e'i oñe'ë sese: “Nde pa'i apɨre'ɨ̇ va'erä ite ereiko, inungar Melquisedec yepi.”

¹⁸Sese mborokwaita araka'endar opa ite imokañɨsa, esepia a'e nipirätäi ete, poropɨtɨ̇vɨï agwä rese,

¹⁹esepia Moisés porokwaita ndosekuñaröi ete tekokwer, yande rumo yasärö mba'e avɨye katu va'e yande rekokwer upe narä, supi ni'ä yayemboya Tüpä rese.

²⁰Iyavei Tüpä rumo oñe'ë omoigätu ñepëi reseve gwerer pɨpe. Ambuae pa'i rumo nda'ei ñepëi reseve senoiprɨ yuvɨrekoi,

²¹yande Yar rumo osenoi ñepëi reseve gwerer pɨpe pa'i seko agwä, esepia Ikwachiaprɨ pɨpe aipo e'i chupe: “Yande Yar osenoi ñepëi reseve sese nosekuñaröi chietera: ‘Nde pa'i apɨre'ɨ̇ va'erä ite ereiko.’ ”

²²Ko rese Jesús kurïtëi yande rereko Tüpä povrɨve avɨye katu va'e yɨpɨndar va'e sui.

²³Yɨpɨndar seta pa'i yuvɨrekoi, opa-opaño rumo omano;

²⁴Jesús rumo nomanoi va'e ite, sese nomondoi chietera pa'i gwekosa ambuae upe.

²⁵Sese Jesús oikatu ite ñepëi reseve Tüpä reroyasar pɨsɨrö agwä, esepia a'e oikove va'erä ite sekoi yepi, oporandu agwä avei mba'e avɨye va'e rese Tüpä upe.

²⁶Supiete Jesús pa'i ɨvate katu va'e sekoi, evokoi nungar ipane ite yandeu yɨpɨndar. A'e ndaseko maräi va'e, ndoyapoi va'e mba'e tëi gweko maräne'ɨ̇sa pɨpe, nda'oyoyai avei ava angaipa viyar rese, iyavei a'e ɨvate katu va'e ɨva pendar sui.

²⁷Nda'ei ete ambuae pa'i eta nungar sekoi, ndoyuka ranei arɨ yakatu rupi mba'e mɨmba Tüpä upe seropove'ë agwä yɨpɨndar oangaipa rese, ipare opakatu ambuae angaipa rese. Ñepëi reseve Jesús vɨropove'ë gwete opakatu ava angaipa repɨrä.

²⁸Moisés porokwaita rupi iporavoprɨ pa'i ɨvate katu va'erä ava nda'ei seko tuprɨ va'e; Tüpä rumo Moisés porokwaita pare osenoi ñepëi reseve Gwa'ɨrɨ seko katuprɨ va'e tasekoi pa'i ɨvate katu va'e apɨre'ɨ̇ va'erä ite oya.