Read Guarayu HEBREOS 8 Bible Online

HEBREOS 8 - Guarayu bible

HEBREOS 8

¹Ko rupi ete oroyepota ore remimombe'u mba'e avɨye katu va'e upe, yareko ite evokoi nungar pa'i ɨvate katu va'e. A'e ogwapɨ Tüpä akato kotɨ öi omborerekwasa pɨpe ɨvave,

²a'eve pa'i sekoi oporavɨkɨ Vu rëtä supiete va'e pɨpe, a'e ɨvave yande Yar rembiapo, nda'ei ava tëi rembiapo.

³Opakatu pa'i ɨvate katu va'e senoisa mba'e oporerekosa iyavei mba'e mɨmba yukaprɨ vɨropove'ë va'erä Tüpä upe yuvɨreko, sese Jesucristo avei vɨreko mba'e vɨropove'ë va'erä Vu Tüpä upe.

⁴A'e sekoise ko ɨvɨ pɨpe viña, nda'ei chietera pa'i sekoi, esepia ko'ave oime vɨte pa'i mba'e vɨropove'ë va'e Moisés porokwaita rupi yuvɨreko.

⁵Ko ɨvɨ pɨpendar pa'i rumo i'añeko ɨva pendar ra'anga rese tëi yuvɨreko, yaikwa ni'ä a'e sa'anga tëi, esepia Moisés oyapo potase tüpäro, Tüpä aipo e'i chupe: “Ema'ekwa tuprɨ akoi ɨvɨtrɨve amboyekwa va'e rese ndeu, a'e inungar tuprɨ eyapo.”

⁶Yande pa'i ɨvate katu va'e rumo Jesús, vɨreko okwaita avɨye katu va'e ambuae pa'i sui, esepia Tüpä remimbotar ipɨasu va'e Jesús gweru va'e yandeu avɨye katu va'e ite yɨpɨndar va'e sui sesendar Tüpä remimombe'u avɨye katu va'e avei.

⁷Esepia yɨpɨndar Tüpä remimbotar oikatuse yande rekokwer rekuñarö agwä viña, ndipoi chira ambuae semimbotar ipɨasu va'e yandeu viña.

⁸Tüpä rembiepiave rumo ava rekokwer mba'e tëiete, sese aipo e'i Ikwachiaprɨ pɨpe ko ava rese araka'e: “Yande Yar aipo e'i: oimerä arɨ ayapo iri agwä che remimbotar ipɨasu va'e Israel pendar upe Judá pendar upe avei.

⁹Nda'oyoyai chira rumo akoi tamoi eta rese yɨpɨndar ayapo va'e che remimbotar, a'e akoi aipopɨsɨ serogwata senose agwä ɨvɨ Egipto sui; nomboavɨyei rumo che porokwaita yuvɨreko, sese apoi ichui e'i yande Yar.

¹⁰Ko ayapora che remimmbotar rupi Israel pendar upe inungar yɨpɨndar arɨ, a'e ko sekoi, aipo e'i yande Yar: Amondora che porokwaita iyapɨsakasa pɨpe aikwachia aveira ipɨ'a ñemoñetasa pɨpe. A'ese aikora che Tüpä yuvɨreko chupe a'e evokoiyase cheundar yuvɨrekoira.

¹¹Sese ndiya iri chira ñepëi-pëi ambuae rese, gwekwa pendar rese avei anise omu rese oyembo'e va'erä oikwa va'erä yande Yar yuvɨreko, esepia opakatu che kwara yuvɨreko, chi'ïvä'e katu va'e sui, ava okwakwa katu va'e avei che kwara yuvɨreko.

¹²Che evokoiyase che ñeröira mba'e-mba'e tëi sembiapokwer rese yuvɨreko chupe; ndayemoma'endu'a iri chira yangaipagwer rese.”

¹³Oñe'ëse Tüpä gwemimbotar pɨasu rese, omombe'u yɨpɨndar va'e kañɨ agwä; chi'ïmi tëi ipane ikañɨpa agwä.