Read Guarayu SANTIAGO 2 Bible Online

SANTIAGO 2 - Guarayu bible

SANTIAGO 2

¹Iyavei no, che rɨvrɨ eta, peroya va'e yande Yar Jesucristo seko porañete va'e peiko, ndapeyeaɨsu yoavɨi chira.

²Inungar-ra ava mba'e yar oikese pe ñemonu'äsave viña, a'e ikwä penda oro va'e, iturukwar katuprɨai va'e, pe añeko tuprɨai sese iyavei aipo peye chupe: “Egwapɨ ko tenda avɨye katu va'esave”, a'e pɨpeve avei oikese pe pa'üve ñepëi ava iparaɨsu va'e oturukwar oyemondesa kwakwami va'e reseve ou, aipo peye chupe: “Nde eipe peve epɨtaño ë'a, anise egwapɨ ɨvɨve e'ï ”;

⁴evokoiyase peyapo mba'e ndoyoyai va'e, ipɨpe avei peyapo mba'e naporäi va'e peiko pe pɨ'añemoñeta raisa pɨpe.

⁵Che rɨvrɨ eta, che rembiaɨsu, pesendu ko ñe'ësa: Tüpä oiporavo ava iparaɨsu va'e ko ɨvɨ pɨpe, yuvɨrekoi va'erä mba'e tuprɨ pɨpe gweko agwä, iyavei toipɨsɨ che remimombe'ugwer rupi che mborerekwasa oyeupe narä oyapave gwaɨsupar upe;

⁶pe rumo seroɨrösa pɨpe pemochi ava iparaɨsu va'e. ¿Nda'ei vo mba'e yar marä-marä tëi pe rereko yuvɨreko yepi, a'e avei ni'ä pe mbotɨrɨrɨ mborerekwar rovai pe reraso yuvɨreko?

⁷¿Nda'ei vo akoi mba'e yar yuvɨrekoi va'e mba'e e'i-e'i tëi seroɨrösave yuvɨreko yande Yar upe?

⁸Supiete pemboavɨyese mborokwaita ɨvate katu va'e, inungar Ikwachiaprɨ pɨpe aipo e'i: “Esaɨsu ava ndeyeaɨsu nungar.”

⁹Akoi peyeaɨsu yoavɨratɨ tëise rumo, a'ese oyapo angaipa, oyavɨ ite mborokwaita Tüpä rovai yuvɨreko.

¹⁰Esepia akoi ava vɨroya va'e opakatu mborokwaita, ipare rumo oime ñepëi nomboavɨye tuprɨi va'e, a'e oyavɨ opakatu mborokwaita.

¹¹Esepia Tüpä teite aipo e'i: “Ndapeyemboagwasai chira”, aipo e'i avei: “Ndapeporoyukai chira.” Yepe akoi ndapeyemboagwasai chira viña, pe poroyuka pɨpe rumo peyavɨ mborokwaita.

¹²Evokoiyase peñe'ë tuprɨra iyavei peiko tuprɨ, esepia oporandura yande rekokwer rese yande Yar oporokwaita pɨpe gweru va'e yande reko tuprɨ agwä.

¹³Supiete akoi ndoiparaɨsuerekoi va'e ava, a'e chupe ndipoi chiaveira poroparaɨsuerekosa mborandusave, oporoparaɨsuereko va'e rumo, a'e sorɨvete katura yuvɨreko arɨ pɨpe mborandusave kuri.

¹⁴Che rɨvrɨ eta, ¿avɨyera pi'ä akoi ava, ayeroya yande Yar rese e'i tëi va'e, ndoyapoise mba'e avɨye va'e yuvɨreko? ¿Oikatura pi'ä a'e oñepɨsɨrö aipo o'e pɨpe tëi yuvɨreko?

¹⁵Inungar-ra oimese yande rɨvrɨ, anise yande reindrɨ upe ipanera iturukwarä, semi'urä arɨ yakatu rupindar viña;

¹⁶akoi pepa'ü pendar aipo e'ise: “Avɨye, eso tuprɨño eiko, eyeao eso so'ɨ̇sagwer sui, ekaru tuprɨ”, ipare rumo ndapemondoise mba'e ipane va'e chupe, ¿avɨyera pi'ä ava upe aipo yande'e tëi viña?

¹⁷Egwë e'i avei: ayeroya yande Yar rese yande esa pɨpe, ndayayapoise rumo mba'e avɨye va'e aipo yande esa pɨpe, aipo ya'e tëiete yaiko.

¹⁸Ñepëi ava pe pa'ü pendar aipo e'ira: “Nde erereko ndeporeroyasa, che rumo ayapo mba'e avɨye va'e. Emboyekwa ru nde yeroyasa mba'e nde rembiapo e'ɨ̇ pɨpe; evokoiyase che amboyekwara che yeroyasa oime va'e che rembiapo pɨpe ndeu.”

¹⁹Nde ni'ä ereikwa oimese ñepëi Tüpä, supiete aipo ere; ko rumo karugwar avei oikwa, ichui osɨkɨyepave rumo a'e orɨrɨi ete yuvɨreko.

²⁰Ani peikora ava nimba'ekwai va'e nungar, ereikwa vo ko nde mba'e apoe'ɨ̇sa nde yeroyasa egwë e'i tëi va'e.

²¹Esepia Tüpä oipɨsɨ yande ramoi Abraham seko tuprɨsa pɨpe, oikwave'ëse porerekosa nungar gwa'ɨrɨ Isaac chupe araka'e.

²²Iyavei Abraham yeroyasa oyekwa ite mba'e sembiapokwer avɨye va'e rese, evokoiyase egwë e'i a'e gwembiapokwer avɨye va'e pɨpe, omboavɨye tuprɨ oyeroyasa oiko araka'e.

²³Egwë e'i yavɨye Ikwachiaprɨ aipo e'i va'e: “Abraham vɨroya ite Tüpä, sese Tüpä vɨreko seko katuprɨ va'e nungar.” Ipɨpe sui Abraham sekoi Tüpä mborɨpar.

²⁴Peikwa ni'ä, Tüpä ko seko katuprɨ va'e e'i ava upe sembiapo tuprɨ repiase yepi, iyavei nda'ei iyeroyasa rese gweraño.

²⁵Egwë e'i tuprɨ avei kuña oyemondo-mondo tëi va'e Rahab upe, esepia a'e omoinge ñuvɨrïo ava ɨvɨ repiasar imondoprɨ gwëtä pɨpe, ipare oñomi imondo ambuae perɨ rupi yamotare'ɨ̇sar sui. Ipɨpe sui Tüpä oipɨsɨ inungar seko ɨ̇vi tuprɨ va'e.

²⁶Egwë e'i yande rembiapo katuprɨ ndayamboyekwaise yande yeroyasa pɨpe, a'e inungar avei Espíritu ndasekoise yande rese, yande yeroyasa evokoiyase omano tëiete oiko.