Read Guarayu SANTIAGO 5 Bible Online

SANTIAGO 5 - Guarayu bible

SANTIAGO 5

¹¡Pe mba'e yar pesendu ko! ¡Peyase'o pepoäse avei esepia peiporarara mba'e tëi peiko!

²Opakatu pe mba'e eta okañɨ tëi va'erä; esepia pe mba'e pe reko atɨ va'e opa ituyu, pe turukwar yayɨ va'e opa avei o'u sasoi.

³Oro pereko va'e iyavei gwarepochi opa opochi atɨ-atɨ, a'e ni'ä pe rekoa'ä agwä omboyekwa va'e mba'e tëi peü, iyavei pe mba'e pota raisa ndoyavɨi pe ro'o okai va'e vɨreko. Esepia pemonu'ä gwasu tëi mba'e pereko atɨ va'e sereko ko arɨ ipa va'e pɨpe.

⁴Peyapɨsaka, akoi oipo'o va'e mba'e peü narä yuvɨreko, chupe ndapemboepɨi ete, sese säse tëi yuvɨreko a'e rumo yande Yar ipirätä va'e, ɨvate katu va'e oikwa.

⁵Ko ɨvɨ pɨpe tëi peyeekomoendɨyai peiko iyavei peyembovɨ'a ko ɨvɨ pɨpendar mba'e rese inungar gwaka imongɨraprɨ yuka agwä, ¡ipɨpe peyemoigätu pe kañɨ agwä!

⁶Peñe'ë pɨpe pemombaraɨsu tëi ava ndoyapoi va'e mba'e yuvɨreko; yepe marä nde'i yuvɨreko peü viña, pe rumo peyukaño ite.

⁷Che rɨvrɨ eta, peñemosaño yande Yar yevɨ iri agwä rese. Inungar ava oma'etɨ̇ va'e osärö rane gwemitɨ̇ po'o agwä, esepia a'e osärö yɨpɨndar okɨ va'e iyavei ipa okɨ va'e mba'e mitɨ̇ avɨye agwä.

⁸Pe avei peñemosaño, peyemongere'ɨ̇ katu, esepia köimi ete yande Yar yevɨ agwä.

⁹Iyavei che rɨvrɨ eta, peñemoɨröi rene peyeupe, evokoiyase ndipoichira porandusa perembiapokwer rese peü; esepia Tüpä yande rärö ite okendɨpɨve o'ä mba'e rese porandu agwä.

¹⁰Che rɨvrɨ eta, peiko katu inungar Tüpä ñe'ë mombe'usar araka'endar yuvɨrekoi va'e, a'e oñemosaño mba'e rasɨkwer upe yande Yar rer pɨpe oñe'ë agwä yuvɨreko.

¹¹Yande rumo yaikwa sovasaprɨ ava oñemosa va'e mba'e rasɨkwer upe yuvɨreko. Pesendu ni'ä akoi mbɨa Job serer va'e ñemosasa, peikwa avei mba'e avɨye va'e yande Yar oyapose chupe, esepia yande Yar ni'ä oporoparaɨsuereko va'e yepi.

¹²Che rɨvrɨ eta, peyapɨsaka tuprɨ katu ko che ñe'ë rese: peñe'ë agwä ndapeiporui chietera ɨva rer iyavei ambuae mba'e peñe'ë reroya uka agwä. Iyakatu rumo, “Supiete” peyese supiño itera; “Ani” peyese, ani chietera, ipɨpe sui ndapeipɨsɨi chira Tüpä poronupasa.

¹³Akoi oimese pe pa'ü pendar iparaɨsu va'e oiko, toyerure. Iyavei akoi oimese sorɨvete va'e oiko, a'e tosapukai Tüpä upe.

¹⁴Akoi oimese ava imba'easɨ va'e, toñe'ë Jesús reroyasar rärösar upe, a'e oyerurera yande Yar rer pɨpe sese, ipare tomondo mba'ekɨra sese.

¹⁵Akoi peyerurese peyeroyasa pɨpe, a'ese imba'easɨ va'e okwerara, yande Yar avei omopü'ara; akoi angaipa vɨrekose, oime aveira ñeröisa chupe.

¹⁶Sese pemombe'u pe angaipa peyeupe, peyerure avei peyese pe yembogwera uka agwä. Ava avɨye va'e oyerurese okere'ɨ̇save opakatu gwekokwer pɨpe, a'e iyeruresa ipirätä ite.

¹⁷Elías Tüpä ñe'ë mombe'usar yande nungar tuprɨ ite sekoi, a'e oporandu oyeruresa pɨpe Tüpä upe okɨe'ɨ̇ agwä, ipare ndokɨi ete mbosapɨ aravɨter imombɨtesa rupi ɨvɨ pɨpe.

¹⁸Ipare oyerure iri, a'ese okɨ iyavei mba'e mitɨ̇ i'a iri yuvɨreko.

¹⁹Che rɨvrɨ eta, akoi oimese oya'uva va'e pe pa'ü pendar ñe'ësa supiete va'e sui, ambuae evokoiyase osekokwer moigätu seroyevɨ,

²⁰a'ese peikwara ava vɨroyevɨ va'e angaipa viyar sekokwerai sui, oipɨsɨrö aveira sekovesa imano rägwer sui, ipɨpe avei omoime ñeröisa opakatu angaipa upe.