Read Guarayu 1 SAN PEDRO 3 Bible Online

1 SAN PEDRO 3 - Guarayu bible

1 SAN PEDRO 3

¹Egwë peye aveira pe kuña omenda va'e, pemboyeroyara pe mer, esepia amove ndovɨroya vɨtei Tüpä ñe'ëngagwer yuvɨreko, pemboyekwase rumo pe reko tuprɨsa imboeteisa avei chupe, avɨyeteramo a'e avei vɨroyara, yepe ndapeñe'ëi chira chupe viña,

²esepia a'e osepiara perekokwer yuvɨreko Tüpä mboeteisa pereko va'e.

³Akoi pemboyekwa potase pe yemoporañetesa nda'ei chira pe rete rese inungar oakä rese mba'e omoporañeteai va'e, nda'ei chiaveira pe yemondesa sendɨyai va'e oro nungar, iyavei turukwar porañete katu va'e,

⁴iya rumo pe avɨter pɨpe sui mba'e porañete ipokopɨ va'e pemboyekwa pe reko mbegwemisa iyavei pe rekoasɨ e'ɨ̇sa pɨpe. Evokoi nungar avɨye katu ite Tüpä rovake.

⁵Egwë e'i avei kuña seko katuprɨ va'e gweko porañetesa imboyekwa araka'e; a'e oyeroya Tüpä rese, omer avei omboyeroya yuvɨreko.

⁶Inungar Sara araka'e, omboyeroya ite omer Abraham, “che yar” e'i chupe. Pe ichuindar peiko peyapose mba'e avɨye va'e pe sɨkɨye e'ɨ̇sa pɨpe.

⁷Iyavei pe kuña mereta, pereko mbegwera pe rembireko upe. Pemboeteira sereko, esepia a'e nipirätä tuprɨi, iyavei Tüpä omboura gweko tuprɨsa pɨpe tekovesa apɨre'ɨ̇ va'e oyoya voi peü. Egwë peyese Tüpä osendu itera pe yeruresa.

⁸Iyavei peikora opakatu teko katuprɨsa pɨpe, perekora ñepëi pɨ'a ñemoñetasa, iyavei peyeaɨsu katura Jesús reroyasar pe rekosa pɨpe. Peyemboava aveira oyeupe pe reko mbegwesa pɨpe.

⁹Oyapose ava mba'e tëi peü, anise oñe'ë raise, ndapemboyevɨi chira chupe. Iyakatu rumo mba'e tuprɨsa pɨpe pemboyevɨra chupe, evokoi nungar mba'e apo agwä rese ni'ä Tüpä pe poravo porovasasa pɨsɨ agwä.

¹⁰Esepia aipo e'i Ikwachiaprɨ pɨpe: “Akoi vɨreko pota va'e gwekokwer teko katuprɨsa pɨpe, pemombɨtu'u aveira peñe'ë raisa iyavei ndapeporombopai chira.

¹¹Pepoi mba'e naporäi va'e sui iyakatu rumo peyapora mba'e avɨye va'e, peseka teko tuprɨsa peyeupe narä pegwata supi.

¹²Esepia spiete, yande Yar osärö ava seko katuprɨ va'e iyavei osendu oyeupe yeruresa, ava mba'e tëi aposar rumo ndoipɨsɨi ete.”

¹³¿Ava pi'ä oikatura mba'e tëi apo yuvɨreko peü, esepia pekere'ɨ̇ño ite mba'e avɨye va'e apo yepi?

¹⁴Peparaɨsuse rumo mba'e pe rembiapo avɨye va'esa rese, ¡sovasaprɨ peiko! Sese peyembosɨkɨyei rene ava sui,

¹⁵pemboeteira rumo Cristo pe Yar sekosa rese pe pɨ'a pɨpe. Peyemoigätu voira ava pe remiarö rese oporanduse peü pe kere'ɨ̇sa pɨpe imombe'u tuprɨ agwä,

¹⁶egwë peyera rumo pe reko mbegwesa pɨpe imboeteisave. Peiko tuprɨra pe pɨ'añemoñetasa tuprɨ pɨpe, akoi oñe'ërai va'e pe Cristo reroyasa rekokwer rese, a'e yuvinochirä oñe'ë sui kuri.

¹⁷Tüpä oipotase pe yemombaraɨsu, avɨye katu mba'e avɨye va'e apo pɨpe yepi mba'e tëi apo rägwer sui.

¹⁸Esepia Cristo teiete omano yande angaipa repɨrä ñepëi reseve. Gweko maräne'ɨ̇ pɨpe egwë e'i ava rekokwerai rese opakatu pe reraso agwä Vu Tüpä upe. A'e omano gwete rese, ipare rumo okwerayevɨ gweko espíritu pɨpe.

¹⁹Ko pɨpe sui oso imombe'u opakatu ava ä sokendaprɨ yuvɨrekoi va'e upe;

²⁰a'e ava Noé rekosendar ndiporeroyai va'e yuvɨreko araka'e. Tüpä osärö gweko mbegwesa pɨpe sekokwer moigätu agwä viña Noé oyapo vɨteseve ɨarusu oiko, a'e ipɨpe oñepɨsɨrö mbosapɨ ova tëi yuvɨreko amarusu sui.

²¹A'e ɨ osä'angapo ɨ poroapirämosa, a'e omboyekwa yande ipɨsɨröprɨ yande rekosa. Poroapirämosa rumo ɨ pɨpe nda'ei yande rete moatɨrö agwä, ko rumo yaporandura Tüpä upe, yande pɨ'a ñemoñetasa moatɨrö agwä, ipɨpe sui evokoiyase yañepɨsɨröra yande Yar Jesucristo kwerayevɨsa pɨpe,

²²a'e oso ɨvave ogwapɨ öi Tüpä akato kotɨ, opakatu sembigwai eta, mborerekwareta, opakatu imborerekwasa ipirätä va'e avei ipovrɨ pendar yuvɨrekoi.