Read Guarayu 1 SAN PEDRO 4 Bible Online

1 SAN PEDRO 4 - Guarayu bible

1 SAN PEDRO 4

¹Sese peikora, inungar Cristo oiporara mba'e rasɨkwer gwete rese, pe avei egwë peyera peiko chupe narä. Esepia akoi ava oiporara va'e mba'e raɨsɨkwer gwete rese oseya ite angaipa yuvɨreko,

²ipɨpe sui ndoyuvɨreko iri chira arɨ rupi ava tëi pɨ'a ñemoñetasa pɨpe, Tüpä remimbotar rupi ete rumo oyapo pota mba'e ko ɨvɨ pɨpe yuvɨrekoi vɨtese.

³Egwë peye puku rane ni'ä pe rembiapoai pɨpe peiko ava Tüpä reroyasare'ɨ̇ rekokwer nungar rupi tuprɨ. A'ese mba'e-mba'e tëi peyapo pe pɨ'añemoñeta raisa pɨpe, savaɨposa, pietasave pe räse tëi pɨpe pe arakwasa pemokañɨ peɨ'u tëisa pɨpe, pemboetei avei mba'e ra'anga tëi peiko.

⁴Kurïtëi rumo pe mborɨparer, ndoyembovɨ'ai tëi pe rese, ndapeiko irise supi semimbotarai apo agwä, a'e oñe'ë-ñe'ë tëi yuvɨreko pe rekokwer pɨasu rese.

⁵A'e chupe rumo oimerä porandusa, esepia yande Yar oyemoigätu opakatu ava rekokwer rese oporandu agwä omano va'e upe, oikove vɨte va'e upe avei kuri.

⁶Sese ni'ä ko ñe'ësa pɨsɨrösa resendar imombe'usa ava omano va'e upe, yuvɨrekoi va'erä espíritu pɨpe, Tüpä remimbotar rupi, yepe ko ɨvɨ pɨpe yuvɨrekoira mba'e tëi pɨpe viña, inungar ambuae ava oyapo yuvɨreko.

⁷Vɨrovɨ rumo arɨ ipa va'e opakatu mba'e kañɨ agwä. Sese peikora yapɨsakasa pɨpe yeruresa pɨpe avei.

⁸Ko katu peyeaɨsura opakatu tuprɨ ite pe pɨ'a pɨpe, esepia poroaɨsusa oimese a'ese avei seta oimerä ñeröisa angaipa upe.

⁹Peipɨsɨ tuprɨ ava yuvɨraso va'e pe rëtäve, mba'e rese pi'ä ko ou peyei rene pe pɨ'añemoñeta pɨpe pe pɨri ou va'e upe.

¹⁰Ñepëi-pëi peipɨsɨ va'e opakatu mba'e kwasa Tüpä suindar, pemondo katu mba'e avɨye va'e peikatugwer rupi ambuae ava upe.

¹¹Akoi ava oñe'ë tuprɨai va'e, a'e tomombe'u Tüpä ñe'ë ite. Akoi peporopɨtɨ̇vɨï potase, peyapoño Tüpä ombou va'e pirätäsa pɨpe peü. Opakatu mba'e peyapo va'e, peyapo katu Jesucristo rer pɨpe Tüpä mboetei agwä, esepia chupendar ite imboeteisa iyavei imborerekwasa apɨre'ɨ̇ va'erä ite. Amén.

¹²Che rɨvrɨ eta, che rembiaɨsu, ndapeyesapɨ'a ukai chira, akoi oimese mba'e-mba'e tëi tekoa'äsa pɨpe peü, inungar ndipoi chietera mba'e cheu peyera viña.

¹³Peyembovɨ'areteñora Cristo paraɨsu agwer rerekosa pɨpe, esepia yande rereko yande Yar yemombaraɨsu agwer nungar pɨpe yuvɨreko, evokoiyase yayembovɨ'arete itera akoi yande Yar oyevɨse gweko pirätäsa pɨpe.

¹⁴Iñe'ë maräse yuvɨreko peü Cristo reroyasar pe rekosa rese, sovasaprɨ peiko. Esepia Tüpä Espíritu gweko porañetesa pɨpe sekoi ete pe rese.

¹⁵Akoi pe pa'ü pendar omombaraɨsuse yuvɨreko, nda'ei chira rumo iporapichisa rese, nda'ei chiaveira imondasa sui, mba'e tëi aposa rese, nda'ei chiaveira ambuae ava mba'e rese iñemañeko tëisa sui egwë e'ira serekosa.

¹⁶Ko rumo akoi peparaɨsuse Cristo reroyasar pe rekosa pɨpe, ndapechï chietera. Pesapukaira rumo Tüpä upe imboeteisa pɨpe serer pereko va'e rese.

¹⁷Supiete kurïtëi oyepota arɨ Tüpä oporandu agwä opakatu ava gwekwa pendar rekokwer rese. Iyavei yandeu rane omboɨpɨse porandusa, ¿marä e'ira pi'ä evokoiyase Tüpä ñe'ëngagwer reroyasare'ɨ̇ yuvɨreko kuri?

¹⁸Supiete yavai ete seko katuprɨ va'e ñepɨsɨrö agwä, ¿marä e'ira pi'ä evokoiyase ava ndasekoporäi va'e angaipa viyar yuvɨrekoi va'e upe?

¹⁹Sese peyemomborarase Tüpä remimbotar rupi, iyakatu pegwataño itera mba'e avɨye va'e pɨpe, iyavei peyemondo itera yande Tüpä upe a'e pe ä rärö agwä, esepia a'e ni'ä yeroyasa ite sekoi.