Read Guarayu 1 SAN PEDRO 5 Bible Online

1 SAN PEDRO 5 - Guarayu bible

1 SAN PEDRO 5

¹Che amboarakwa pota pe pa'ü pendar Jesús ñe'ë rärösar yuvɨrekoi va'e, inungar avei ni'ä che aiko asepia va'e ite yande Yar mombaraɨsu agwer, inungar a'e vɨreko teko orɨsa, egwë a'e aveira akoi yande Yar oyevɨse kuri.

²Pesärö tuprɨ katu ava Tüpä upendar imondoprɨ va'e peü; peyapora pe kere'ɨ̇sa pɨpe ite, a'e ni'ä Tüpä oipota, nda'ei ambuae yande kwaisa pɨpe tëi, nda'ei avei gwarepochi pota raisa pɨpe, peyapora rumo mboravɨkɨ pe kere'ɨ̇sa pɨpe ite.

³Ndapeikoi chira pe remiarö upe inungar mborerekwar gweko ɨvatesa pɨpe oporokwai pirätä va'e, pemboyekwara rumo pe rekokwer avɨye va'e chupe imbo'esa tuprɨ pɨpe.

⁴Evokoiyase akoi oyevɨse yande Yar, yande rärösar ɨvate katu va'e, a'ese peipɨsɨra mba'e porerekosa, teko orɨ porañete apɨre'ɨ̇ va'e.

⁵Iyavei pe mbɨa chi'ïvä'e peiko va'e, pemboyeroyara ava Jesús ñe'ë rärösar. Iyavei opakatu peyemboyeroyara pe reko mbegwesa pɨpe, esepia aipo e'i Ikwachiaprɨ pɨpe: “Tüpä ava oyeeko mboɨvateai va'e amotare'ɨ̇mbar sekoi, ava seko mbegwemi va'e upe rumo ombou oporovasasa.”

⁶Peyeeko mombegwe katu Tüpä pirätäsa povrɨve, evokoiyase a'e pe reko mboɨvatera kuri.

⁷Opakatu mba'e rese pe pɨ'añemoñeta atɨsa pemombe'ura Tüpä upe, esepia a'e pe rärösar ite sekoi.

⁸Pearakwa kañɨi rene peyesui, pema'emo'ä arɨ rupi peyese, esepia pe amotare'ɨ̇mbar Karugwar pe reko momarä pota yepi inungar yagwar oñarö va'e ogwata tëi oporoeka tamomarä ava oyapave.

⁹Sese peyemovɨräkwära Tüpä rese pe yeroyasa pɨpe, esepia peikwa ni'ä opakatu rupi avei yande rɨvrɨ eta Tüpä rese yuvɨrekoi va'e iparaɨsu ko nungar mba'e pɨpe yuvɨreko.

¹⁰Koiye peparaɨsu pare rumo, Tüpä teiete pe reko mo'ɨ̇vi tuprɨra, iyavei pe reko movɨräkwära, pe momirätä aveira pe yepepɨ irie'ɨ̇ agwä ichui. Tüpä ni'ä oporoaɨsusa pɨpe yande poravo oyeupe narä, yande yaso va'erä supi teko orɨ ndopai va'esave yaiko va'erä Jesucristo rese yande rekosa pɨpe.

¹¹Egwë te'i tasekoi gweko pirätäsa apɨre'ɨ̇ va'e pɨpe. Amén.

¹²Yande rɨvrɨ Silvano omboavɨye tuprɨ va'e ite okwaita yepi, a'e che pɨtɨ̇vɨïsa pɨpe ko ayapo imondo che rembikwachia ndipukuimi va'e pe mboarakwa katu agwä, ipɨpe toikwa tuprɨ katu yuvɨreko ko porovasasa oipɨsɨ va'e supiete omboyekwa va'e Tüpä poroaɨsusa che esave. ¡Peyemovɨräkwä tuprɨ evokoi poroaɨsusa rese!

¹³Iyavei Babilonia pendar Jesús reroyasar yuvɨrekoi va'e oyoya va'e pe rese iporavoprɨ, a'e ombou oma'endu'asa yuvɨreko peü. Marcos, inungar che ra'ɨrɨ avei ima'endu'a pe rese.

¹⁴Peyeovaupɨte avɨrave apo ñepëi-pëi pe yeaɨsusa pɨpe. Pe yande Yar Cristo reroyasar, peikora opakatu teko katuprɨsa pɨpe.