Read Guarayu 1 SAN JUAN 1 Bible Online

1 SAN JUAN 1 - Guarayu bible

1 SAN JUAN 1

¹Ko kwachiar pɨpe oromombe'u peü yɨpɨsuive sekoi va'e, a'e orosendu orosepia avei ore resa pɨpe. Esepia orosepia iyavei oropoko sese. A'e ni'ä Tüpä Ñe'ë tekovesa resendar.

²Ko tekovesa oyemboyekwa va'e, orosepia iyavei a'e sekokwer oromombe'u, a'e tekovesa apɨre'ɨ̇ oromombe'u va'e peü, a'e Vu rese sekoi oyemboyekwa va'e oreu.

³Oromombe'u ñe'ësa orosepia va'e orosendu va'e avei peü, ipɨpe sui peiko va'erä orerese, inungar ore oroiko yande Ru Tüpä rese, Ta'ɨrɨ Jesucristo rese avei.

⁴Evokoiyase kurïtëi oroikwachia evokoi mba'e peü yande yembovɨ'arete katu agwä.

⁵Ko ñe'ësa rese Jesucristo ore mbo'e, a'e oromombe'u va'erä peü: yande Ru Tüpä ni'ä tesapesa sekoi sese ndipoi ete pɨ̇tümimbi va'e.

⁶Che aiko tuprɨ Tüpä rese ya'ese, yaikoño rumo angaipa pɨpe, a'e inungar pɨ̇tümimbi va'e, a'ese yande remirä tëi iyavei ndayayapoi mba'e supi tuprɨ va'e.

⁷Yaikose rumo tesapesa pɨpe inungar yande Ru Tüpä sekoi tesapesa, evokoiyase yaiko tuprɨra yande yeupe. Iyavei suvɨ yande moatɨrö opakatu angaipa sui.

⁸Iyavei, ndarekoi angaipa che pɨ'a pɨpe ya'e tëise, yande ae yayembopa ipɨpe, evokoiyase mba'e supiete va'e ndayarekoi yandeyese;

⁹akoi yamombe'use yande angaipagwer Tüpä upe, a'ese a'e omboura oñeröisa yande angaipa rese yandeu, iyavei omoatɨröra opakatu mba'e-mba'e tëi yandesui. Esepia, a'e seko ɨ̇vi va'e.

¹⁰Iyavei che ndacheangaipai ete ya'e tuprɨ tëise yaiko, evokoiyase Tüpä semirañeteai va'e nungar yareko, ipɨpe ndayaroyai iñe'ëngagwer.