Read Guarayu 3 SAN JUAN 1 Bible Online

3 SAN JUAN 1 - Guarayu bible

3 SAN JUAN 1

¹Che ikwaiprɨ, aikwachia ko che ñe'ë ndeu, che mborɨpar, che rembiaɨsu Gayo, che supiete oroaɨsu yepi.

²Che rɨvrɨ che rembiaɨsu, kurïtëi nde rekokwer erereko tuprɨ Tüpä rese, che ayerure nde rese opakatu nde reko tuprɨ agwä iyavei oime e'ɨ̇ agwä mba'erasɨsa ndeu.

³Che avɨ'arete asenduse yande rɨvrɨ ñe'ë, yugweruse ko'ave nde rekokwer mombe'use yuvɨreko cheu.

⁴Ndipoi ete ni'ä ambuae ñe'ësa asendu va'e che mbovɨ'arete katu va'e che ra'ɨreta ogwatase ko porombo'esa supiete va'e rupi yuvɨreko.

⁵Che rɨvrɨ che rembiaɨsu, ereyapo tuprɨ opakatu mba'e yande rɨvrɨ eta upe ambuae tekwa pendar oyepota va'e upe avei.

⁶A'e omombe'u ore ñemonu'äsave opakatu nde poroaɨsusa resendar yuvɨreko oreu. Eyapo katu mba'e ikatuprɨ va'e; eipɨtɨ̇vɨï katu chupe mba'e ipane va'e rese igwataño agwä Tüpä remimbotar rupi yuvɨreko.

⁷Esepia a'e ogwata yuvɨreko Jesucristo rer pɨpe, ndoipɨsɨi ete rumo mba'e ipane va'e opɨtɨ̇vɨï agwä yuvɨreko ava Tüpä reroyasare'ɨ̇ sui.

⁸Sese yande egwë ya'era yaiko evokoi nungar upe ñe'ësa supiete va'e rese ipɨtɨ̇vɨï agwä.

⁹Che aikwachia che ñe'ë eipeve Tüpä reroyasar upe, Diótrefes rumo ndovɨroyai ore mborerekwasa, esepia a'e oipotarai mborerekwar gweko agwä.

¹⁰Evokoiyase asose eipeve, amboarakwara opakatu Tüpä vɨroya va'e rovai sembiapoai rese. Esepia a'e oñe'ë-ñe'ë tëi ore rese, nda'ei a'e gweraño, ndoipɨsɨ potai avei gwëtäve yande rɨvrɨ eta oyepota va'e, iyavei ndoipotai ambuae upe ipɨsɨ agwä sëtäve, akoi oipɨsɨse, omombo voiño ite ñemonu'äsa sui.

¹¹Che rɨvrɨ che rembiaɨsu, ereikoi rene evokoi ava rekokwer nungar, ereikora rumo ava avɨye va'e rekokwer rupi. Esepia oyapo va'e mba'e avɨye va'e, a'e Tüpä suindar, akoi oyapo va'e rumo mba'e naporäi va'e, a'e ndoikwai va'e Tüpä.

¹²Opakatu, Demetrio avɨye ite e'i yuvɨreko. A'e supiete aipo e'i; aipo avei ore oromombe'u. Nde ni'ä ereikwa ite ore oromombe'u mba'e supiete va'e.

¹³Che ni'ä amombe'u pota seta mba'e ndeu, namombe'u potai rumo kwachiar pɨpe tëi,

¹⁴esepia aso pota ite nde repia, a'ese voi yañemoñetara oyeovai ete.

¹⁵Eiko tuprɨ. Yande mborɨpar ko'a pendar omondo oma'endu'asa yuvɨreko ndeu. Iyavei eyapo mba'e ikatuprɨ va'e, emombe'u nde teiete che ma'endu'asa ñepëi-pëi yande mborɨpareta upe eipeve.