Read Guarayu JUDAS 1 Bible Online

JUDAS 1 - Guarayu bible

JUDAS 1

¹Che Judas, aiko Jesucristo rembigwai, Santiago rɨvrɨ. Che aikwachia ko che ñe'ë peü. Pe ni'ä yande Ru Tüpä rembiaɨsu semienoi peiko. Jesucristo ni'ä perärö opakatu mba'e-mba'e tëi sui.

²Peipɨsɨ pe reko tuprɨ agwä pe raɨsusa pɨpe.

³Che rɨvrɨ eta che rembiaɨsu, yɨpɨndar che pɨ'a ñemoñeta ite yande pɨsɨrösa resendar kwachia agwä peü viña; ipare rumo che pɨ'a ñemoñeta iri iyaño revo che aikwachia pe yemovɨräkwä tuprɨ katu agwä yembo'esa yaroya va'e rese. A'e yembo'esa yaroya va'e ñepëi reseve imondoprɨ opakatu yandeu.

⁴Esepia amove ava iporombopa serai va'e yuvɨroike anga'u ava pe pa'üve araka'e suive rumo ikwachiaprɨ yɨpɨ suive ite imokañɨsara. A'e ava ndasekoporäi va'e, Tüpä avɨye ite ndoyapoi chietera mba'e yandeu, sese oyapoño mba'e tëi yuvɨreko, Jesucristo nda'ei yande Rerekwar e'iño yuvɨreko.

⁵Che opomoma'endu'a pota iri akoi peikwa tuprɨ va'e rese, amombe'u iri peü yande Yar, vɨnose pare Egipto sui tekwa Israel, ipare rumo opa omokañɨ vɨroyasare'ɨ̇.

⁶Iyavei mbigwai eta nomboavɨyei va'e okwaita, ipɨpe sui oseya oporavɨkɨsa teko katuprɨsa yuvɨreko, Tüpä rumo omombɨta pɨ̇tümimbi save ndopai va'e save arɨ kañɨse narä kuri.

⁷Iyavei ambuae mbigwai eta, iyavei Sodoma pendar Gomorra pendar iyavei a'e tekwa ɨvɨrindar oyemondo oyemboagwasa-gwasa tëi agwä yuvɨreko, iyavei oyeeraso uka mba'e-mba'e tëi pɨpe yuvɨreko. Ipɨpe sui oiporara tata gwasu apɨre'ɨ̇ va'e yuvɨreko a'e opɨta opakatu yande yembosɨkɨye agwä.

⁸Egwë e'i avei ni'ä, evokoi nungar ava, yuvɨrekoi va'e okeraisa pɨpe, omongɨ'a gwetekwer yuvɨreko, ndovɨroyai yande Yar mborerekwasa yuvɨreko iyavei iñe'ë marä-marä tëi ɨva pendar ɨvate katu va'e mborerekwasa rese yuvɨreko.

⁹A'ese Miguel mbigwai ɨva pendar rerekwar, ovava karugwar rese yuvɨreko Moisés retekwer rese, ndiyai rumo iñe'ë marä agwä, aipo e'i chupe: “¡Tüpä oikwara ko rese ndeu!”

¹⁰Evokoi ava yuvɨrekoi va'e oñe'ë tëi va'e mba'e ndosendukwai; iyavei ko mba'e oikwa va'e oyesui tëi, inungar mba'e mɨmba ndipɨ'a ñemoñetai va'e oyesui tëi imba'ekwa, a'e oiporu yuvɨreko oyemokañɨ agwä tëi.

¹¹¡Iparaɨsu yuvɨreko!, Caín rekokwer rupi tuprɨ avei oyapo mba'e yuvɨreko. Inungar Balaam gwarepochi pota raisave pɨpe tëi oyavɨ gwekokwer, inungar avei Coré, omano oporeroya e'ɨ̇sa pɨpe.

¹²Pe poromochi gwasu pieta avɨye va'e save peyapo mba'e pemboetei va'esave, a'eve okaru oɨ'u ovɨ'asave ndoyuvɨnochi ete yuvɨreko. Evokoi ovesa rärösar oyese tëi i'añeko va'e yuvɨreko. Inungar ɨva kɨ'a ndovɨrekoi va'e ɨ, ɨvɨtu remimombo tëi. Inungar ɨvɨra ndi'ai va'e o'asa rupi, ñuvɨrïo rupi ipiru va'e evokoiyase a'e sapo'oprɨ.

¹³Inungar avei akoi ɨtu paragwasu pɨpe, omombo tɨyui va'e oyesui yepi. Egwë e'i avei sembiapo poromochisa. Inungar yasɨtata amove omokañɨ va'e gwaper sui a'e okañɨ tëi va'erä koiye pɨ̇tümimbisave apɨre'ɨ̇ yuvɨreko.

¹⁴Iyavei Henoc, Adán rakɨkwerindar imoñuvɨrïo ova rupi oyesu va'e, a'e oñe'ë evokoi nungar ava naporäi va'e rekokwer rese: “Che asepia che Yar, ouse mbigwai ɨva pendar re'ɨi-re'ɨi rese

¹⁵opakatu ava rekoa'ä agwä iyavei ikañɨ mombe'u agwä opakatu mba'e-mba'e tëi aposar upe opakatu oñe'ë-ñe'ë tëi yamotare'ɨ̇save yuvɨrekoi va'e upe avei.”

¹⁶Opakatu rese oñe'ë yuvɨreko, oñe'ë-ñe'ë tëi iyavei oseka oyeupe narä mba'e gwemimbotar tëi apo agwä. A'e oyemboɨvateai va'e, iyavei oñe'ë tuprɨai anga'u tëi ambuae ava upe imba'e rerokwa agwä ichui.

¹⁷Pe rumo che rɨvrɨ eta, peyemoma'endu'a akoi yande Yar Jesucristo ñe'ë mombe'usar ñe'ëngagwer rese

¹⁸aipo e'i chupe: “Kuri arɨ kañɨ renonde oimerä ava vɨroɨröai va'e, yuvɨrekoira gwemimbotarai gwembiapoai rupi.”

¹⁹A'e ava ni'ä omboya'o-ya'o ukara ava yuvɨreko; gwekokwer ɨvɨ pɨpendar tëi vɨreko va'e, a'e ni'ä ndovɨrekoi Tüpä Espíritu yuvɨreko.

²⁰Pe rumo che rɨvrɨ eta, peyemovɨräkwä pe poreroyasa maräne'ɨ̇ va'e rese. Peyerure Espíritu Maräne'ɨ̇ pe rärösa pɨpe.

²¹Peñearö tuprɨ Tüpä pe raɨsusa pɨpe pesärö vɨteño yande Yar Jesucristo, yande paraɨsuerekosa pɨpe, omboura tekovesa apɨre'ɨ̇ va'e yandeu.

²²Pesaɨsu katu ava ndovɨroya tuprɨi va'e Jesús yuvɨreko.

²³Peipɨtɨvɨïra ava karugwar ratave ivɨapi rägwer sui, ambuae peiparaɨsuerekora, pesɨkɨyera rumo ichui, ndapeipotai chira iturukwar esepia gwekokwerai pɨpe omongɨ'a gwetekwer yuvɨreko.

²⁴Yande Ru Tüpä ñepëi, Pɨsɨrösar yandeundar, vɨreko pirätäsa pe rärö agwä angaipa pɨpe pe vɨapi e'ɨ̇ agwä, iyavei pemboyekwara perekokwer porañetesa perovapɨpo avei pevɨ'aretesa pɨpe opakatu rovake. A'e imboeteiprɨ tasekoi, egwë te'i timboyeroyasa seko pirätäsa iyavei imborerekwasa, yande Yar Jesucristo sui, yɨpɨsui, kurïtëi apɨre'ɨ̇ va'erä. Amén.