Read Guarayu APOCALIPSIS 1 Bible Online

APOCALIPSIS 1 - Guarayu bible

APOCALIPSIS 1

¹Tüpä omboyekwa Jesucristo upe mba'e oime va'erä koiye katu, a'e evokoiyase oikwa ukara vɨroyasar upe. Iyavei Jesucristo omombe'u mbigwai ɨva pendar upe Juan upe oikwa uka va'erä,

²a'e supiete omombe'u opakatu mba'e osepia va'ekwer iyavei omombe'u evokoi Tüpä ñe'ëngagwer akoi Jesucristo oikwa uka tuprɨ va'e mba'e supiete va'e.

³Sorɨvete katura akoi ava oyerokɨ va'e ko Tüpä suindar ñe'ësa rese, akoi ava oyapɨsaka tuprɨ va'e sese, vɨroya va'e avei ikwachiaprɨ pɨpendar yuvɨreko, esepia arɨ kañɨ vɨrovɨ ite yandeu.

⁴Che Juan, aikwachia Jesús reroyasar ñuvɨrïo ova tekwa Asia ɨvɨ rupindar yuvɨrekoi va'e upe. Peipɨsɨ porovasasa, teko tuprɨsa Tüpä suindar ou va'erä sui; ñuvɨrïo ova espíritu suindar aveino, a'e yuvɨno'äi va'e senda porañete va'e rovai,

⁵iyavei Jesucristo suindar, evokoi omombe'u tuprɨ va'e ñe'ësa supi va'e, a'e akoi yɨpɨndar okwerayevɨ va'e iyavei mborerekwar ɨvate katu va'e sekoi opakatu ambuae-ae tëi mborerekwar sui. A'e Cristo yande raɨsu iyavei yande pɨsɨrö yande angaipa sui vuvɨ pɨpe,

⁶iyavei yande rereko mborerekwarä; pa'igwä aveino Vu Tüpä upe yande poravɨkɨ agwä. ¡Egwë te'i imboeteiprɨ tasekoi opirätäsa pɨpe apɨre'ɨ̇ va'erä! Amén.

⁷¡Esepia Cristo ɨva kɨ'a rese oura kuri! A'ese opakatu ava osepiara yuvɨreko, yamotare'ɨ̇sarer, oikutu va'ekwer avei; iyavei opakatu tekwa ɨvɨ pɨpendar a'ese oyase'o tëira sepiase yuvɨreko. Egwë e'i etera kuri, amén.

⁸“Che aiko yɨpɨndar iyavei ipandar,” aipo e'i yande Yar Tüpä opakatu mba'e mboavaisare'ɨ̇ evokoi yɨpɨve va'e ite, kurïtëindar apɨre'ɨ̇ va'e avei.

⁹Che Juan, pe rɨke'ɨrɨ aiko, iyavei che pe nungar Tüpä povrɨ pendar aiko, che paraɨsu avei vichiko Jesucristo rese che rekosave che ñemosasa pɨpe. Che rokendasa vichiko ka'a pa'ümi paragwasu avɨterve Patmos serer va'esave Tüpä ñe'ëngagwer mombe'usa pɨpe sui tëi, Jesucristo rekokwer mombe'usa pɨpe sui tëi aveino.

¹⁰Akoi yande Yar arɨ pɨpe Espíritu povrɨve aikose, asendu che rakɨkwei oñe'ë pirätä va'e avɨye akoi mimbɨ ñe'ë,

¹¹aipo e'i cheu: “Eikwachia mba'e eresepia va'e, ipare emondopa ñuvɨrïo ova tekwa pendar che reroyasar ɨvɨ Asia rupindar upe: Éfeso ve, Esmirna ve, Pérgamo ve, Tiatira ve, Sardis ve, Filadelfia ve, iyavei Laodicea ve.”

¹²Che evokoiyase ayemboyere sese uma pi'ä oñe'ë cheu che yapave; a'ese asepia ñuvɨrïo ova tuprɨ oro apoprɨ tataendɨ rɨru,

¹³iyavei asepia ipa'üve mbɨa avɨye tuprɨ ava ite viña, iturukwar pukukwer ipɨ rupi tuprɨ ite sese, sumbɨkwasa evokoiyase oro apoprɨ tataendɨ rɨru ipochi'a rupi tuprɨ ite oyepota.

¹⁴Iyavei i'a morochi iteanga inungar akoi mba'e saviyu va'e, inungar avei yesapɨ morochi va'e, sesa evokoiyase avɨye tuprɨ tata rendɨgwer.

¹⁵Ipɨ evokoiyase sendɨyai ete, avɨye akoi bronce okai va'e tatave; iyavei iñe'ë ipirätä iteanga inungar ɨtu rɨapugwer.

¹⁶Oakato kotɨ vɨreko ñuvɨrïo ova tuprɨ yasɨtata, iyavei iyuru sui osë kɨse puku saimbe yovai va'e. Sova evokoiyase avɨye arɨ rendɨgwer ipirätä va'e.

¹⁷Sepia ramoseve, avɨapi ipɨve inungar omano va'e. A'e rumo omondo opo oakato kotɨ che rese aipo e'i cheu: “Ani eresɨkɨyera; esepia che aiko yɨpɨndar ipandar va'e,

¹⁸iyavei aikove vɨte va'e. Yepe amano viña, kurïtëi rumo aikove iri ndopai va'erä ite che rekokwer. Che areko che mborerekwasa ava rekokwer mokañɨ agwä.

¹⁹Sese eikwachia ko mba'e eresepia va'e: kurïtëi oime va'e iyavei oime va'erä mba'e koiye katu.

²⁰Ko akoi eresepia mba'e ndikwasai va'e ñuvɨrïo ova yasɨtata che akato kotɨndar, iyavei ñuvɨrïo ova tuprɨ oro apoprɨ tataendɨ rɨru: ñuvɨrïo ova yasɨtata a'e mbigwai ɨva pendar, iyavei ñuvɨrïo ova tekwa, evokoiyase oro apoprɨ tataendɨ rɨru, a'e yuvɨrekoi ñuvɨrïo ova tuprɨ tekwa pɨpendar che reroyasar.”