Read Guarayu APOCALIPSIS 12 Bible Online

APOCALIPSIS 12 - Guarayu bible

APOCALIPSIS 12

¹Evokoiyase ɨva rese oyekwa mba'e poromondɨisa tuvicha va'e: oime kuña iturukwar inungar arɨ rendɨgwer, avɨye opɨ̇ro va'e yasɨ rese o'ä, oakä yegwaka rese opayandepo yovaive ñuvɨrïo tuprɨ yasɨtata vɨreko.

²Iyavei kuña ipuru'a va'e, säse tëi omembrɨ i'a pota agwä oyesui, esepia ni'ä, oiporara ite tasɨkwer.

³Ipare koiye katu oyekwa iri ambuae poromondɨisa ɨva rese: ñepëi mba'e ɨpɨ pirä va'e, a'e ñakä ñuvɨrïo ova tuprɨ, sächi evokoiyase imboopayandepo yovaivesa iyavei vɨreko yegwaka oakä yakatu.

⁴Sugwai evokoiyase ombotɨrɨrɨ yasɨtata ɨva pendar imombosapɨsa sui ñepëi iya'okwer seraso, ipare opa omombo ɨvɨve. A'ese mba'e ɨpɨ evokoiyase opɨta osärö kuña imembɨra pota va'e o'ä, ta'upaño voi imembrɨ o'a ramoseve e'i viña.

⁵Ipare a'e kuña membrɨ o'a kuimba'emi ichui, a'e mborerekwar vɨrekora mbokoka gwarepochi apoprɨ, ipirätä katu va'e sekoira opakatu ava ɨvɨ rupindar upe. Ipare rumo serokwasa imembrɨ ichui serasosa Tüpä renda porañetesa va'e rovai;

⁶kuña evokoiyase oñemi ɨvɨ iporupɨre'ɨ̇save oso, a'eve omoigätu Tüpä iyemboerekwa agwä, ikaru agwä avei mil doscientos sesenta arɨ rupi.

⁷Oime avei vavasa ɨvave: a'ese mbigwai ɨva pendar ɨvate katu va'e Miguel gweru ambuae mbigwai ɨva pendareta ovava va'erä mba'e ɨpɨ oporomokañɨ va'e upe. Ipare ovava mba'e ɨpɨ naporäi va'e mbigwai ɨva pendar upe yuvɨreko,

⁸ndoikatui ete rumo sekopɨ agwä, sese ndipoi ete ɨvave seko agwä yuvɨreko.

⁹Egwë e'i imboyepepɨsa mba'e ɨpɨ oporomokañɨ va'e reko pirätäsa sembigwai eta reseve, opa imombosa ɨvɨ pɨpe yuvɨreko, evokoi mboi vai, a'e Karugwar Ndipɨ'ai va'e, evokoi ni'ä ava ombopa-mbopa tëi va'e opakatu ɨvɨ pɨpe yuvɨreko.

¹⁰Evokoiyase asendu ñe'ësa ipirätä va'e ɨvave aipo e'i: “Kurïtëi oime poropɨsɨrösa, pirätäsa iyavei yande Tüpä mborerekwasa, Poropɨsɨrösar mborerekwasa aveino; esepia ni'ä, imboyepepɨsa ɨva sui akoi oseka-seka va'e yande rɨvrɨ Tüpä reroyasareta pɨ̇tü, arɨ yakatu rupi oseko momarä va'e sereko yande Yar Tüpä rovai.

¹¹Yande rɨvrɨ osekoreroyɨ yuvɨreko Ovesami a'e Cristo sekoi va'e ruvɨ pɨyere pɨpe sui akoi sekokwer mombe'u tuprɨsa pɨpe sui aveino; esepia ni'ä ndosɨkɨyei ete gwetekwer mokañɨ agwä, a'e rumo oyemoigätu voi ete omano agwä yuvɨreko.

¹²¡Peyembovɨ'a katu pe ɨva pendar, opakatu peiko va'e a'eve! ¡Pe rumo, peparaɨsu katura ɨvɨ pɨpe, paragwasu pɨpe avei yuvɨrekoi va'e, esepia ni'ä karugwar oikwa ite gweko puku e'ɨ̇ agwä ko ɨvɨ pɨpe, ogweyɨ peü oñemoɨrösa pɨpe mba'e tëi apo agwä!”

¹³Ipare mba'e ɨpɨ oporomokañɨ va'e oikwase imomboprɨ gwekose ɨvɨ rese, a'ese omoña kuña imembrɨ kuimba'emi reseve yamotare'ɨ̇sa pɨpe.

¹⁴Evokoi kuña upe rumo imondosaño ñuvɨrïo vɨra gwasu pepo iveve agwä, chupendar ɨvɨ imoigätuprɨ ava pore'ɨ̇save seko agwä, amombrɨ mba'e ɨpɨ oporomokañɨ va'e sui, a'eve oyopoi mbosapɨ aravɨter yemombɨtesa rupive.

¹⁵Ipare mba'e ɨpɨ oporomokañɨ va'e oyuru rupi omombo ɨ kuña rakɨkwei ɨai apo imokañɨ agwä;

¹⁶oime rumo ɨvɨ ko kuña pɨtɨ̇vɨïsar, a'e oyeka ipare opa omoko ɨai evokoi mba'e ɨpɨ oporomokañɨ va'e rembiapo.

¹⁷Evokoiyase mba'e ɨpɨ, oñemoɨrö iteanga kuña upe, ipare oso ovava ambuae ichuindar re'ɨi rese, a'e omboyeroya va'e ite Tüpä porokwaita yuvɨreko iyavei yuvɨrekoi tuprɨ va'e Jesús remimombe'u rupi.

¹⁸Ipare mba'e ɨpɨ oporomokañɨ va'e opɨta paragwasu popɨve o'ä.