Read Guarayu APOCALIPSIS 13 Bible Online

APOCALIPSIS 13 - Guarayu bible

APOCALIPSIS 13

¹Ipare asepia paragwasu pɨpe sui osëse mba'e ɨpɨ vai, a'e ñuvɨrïo ova tuprɨ ñakä va'e iyavei opayandepo yovaive tuprɨ sächi. Gwächi yakatu evokoiyase vɨreko ñepëi-pëi oyegwaka, iyavei oakä yakatu vɨreko terer ikwachiaprɨ Tüpä reroɨrösave yuvɨreko.

²Ko mba'e ɨpɨ vai asepia va'e avɨye tuprɨ akoi yagwar iparaü va'e; iyavei ipɨ avɨye tuprɨ oso pɨ, iyuru evokoiyase avɨye yagwa pɨ̇ta. Mba'e ɨpɨ oporomokañɨ va'e evokoiyase omondo opirätäsa iyavei omborerekwasa chupe.

³Ñepëi mba'e ɨpɨ vai akä oyeapicha gwasu va'e ndoyavɨi omano va'erä ite viña; a'e rumo okwera tuprɨ iriño evokoiyase opakatu gwasu ava sepiase, ndoyembovɨ'ai, ichui vɨroya katu yuvɨreko.

⁴Omboetei gwasu mba'e ɨpɨ oporomokañɨ va'e sereko yuvɨreko, esepia omondo omborerekwasa mba'e ɨpɨ vai upe, ipare a'e avei omboeteiai yuvɨreko, aipo e'i: “¿Oime pi'ä ava ko mba'e ɨpɨ vai nungar, iyavei uma pi'ä oikatura ovava va'erä chupe?”

⁵Iyavei mba'e ɨpɨ vai upe ipotasa iyemboɨvateai agwä oñe'ë pɨpe ava rovake Tüpä reroɨrö agwä aveino, iyavei mborerekwar gwasu seko agwä cuarenta y dos yasɨ rupi.

⁶Egwë e'i iñe'ë marä-marä tëi Tüpä rese, iñe'ë-ñe'ë tëi avei serer maräne'ɨ̇ rese, sëtä rese ɨva pendar rese aveino.

⁷Imondosa avei chupe vavasa apo uka agwä Tüpä upendar ava eta upe sekopɨ agwä; imondosa avei mborerekwar seko agwä chupe ava ambuae-ae tëi va'e upe, sekwa ambuae va'e upe ambuae tëi iñe'ë va'e upe, ambuae ɨvɨ rupindar upe aveino.

⁸Ipare omboeteiai sereko yuvɨreko opakatu ava ɨvɨ pɨpendar akoi ɨvɨ apoe'ɨ̇ suive ndovɨrekoi va'e gwerer Ovesami a'e Cristo sekoi va'e kwachiar tekovesa resendar pɨpe, a'e ni'ä akoi yukapɨrer.

⁹Akoi osendu pota va'e, toyapɨsakaño ko ñe'ësa rese:

¹⁰“Akoi ava seraso pɨrä poroekendasave, a'e sokendasa ñoitera; iyavei akoi ava omano va'erä kɨse puku pɨpe, kɨse puku pɨpe avei yukasara.” Ko pɨpe oyekwa Tüpä rese yeroyasa iyavei ipirätäsa ava rese yuvɨreko.

¹¹Ipare asepia ambuae mba'e ɨpɨ vai osë va'e ɨvɨvrɨ sui. Ko vɨreko ñuvɨrïo gwächi ndoyavɨi tuprɨ ovesa rächi, mba'e ɨpɨ oporomokañɨ va'e ñe'ë pɨpe rumo oñe'ë oiko.

¹²A'e vɨreko opakatu evokoi yɨpɨndar va'e mba'e ɨpɨ vai mborerekwasa sovake, iyavei ava ɨvɨ pɨpendar yuvɨrekoi va'e upe omboetei uka yɨpɨndar mba'e ɨpɨ vai, a'e akoi okwera tuprɨ va'e oyeapichasa oyuka rägwer sui.

¹³Iyavei oyapo seta mba'e poromondɨisa mba'e mboyekwa agwä. Ɨva sui avei oitɨ uka tata ɨvɨve imbou opakatu ava rembiepiave.

¹⁴Ombopa tëi ava ɨvɨ pɨpendar yuvɨrekoi va'e mba'e poromondɨisa pɨpe evokoi imondosa va'e yapo agwä chupe yɨpɨndar mba'e ɨpɨ vai rovai, ipare oporokwai yapichaprɨ okwera tuprɨ va'e ra'angapo agwä imboeteisave.

¹⁵Ipare imoñuvɨrïosa mba'e ɨpɨ upe imondosa pirätäsa tekovesa mondo agwä evokoi yɨpɨndar sa'anga upe, toñe'ë toyuka uka avei ava opakatu omboetei e'ɨ̇sar oyapave.

¹⁶Ipare ava opakatu yuvɨrekove va'e upe, seko mbegwemi va'e upe, seko ɨvate va'e upe avei, mba'e yar upe, iparaɨsu va'e upe, ava nimañekoprɨi va'e upe, mbigwai tëi upe, sese ikwachiasara ipo i'akato kotɨndar rese, anise ɨsɨva rese yuvɨreko.

¹⁷A'ese ava ndipoi ete oikatu va'e mba'e rerokwa, anise mba'e mondo agwä avei, akoi ndovɨrekoise mba'e ɨpɨ vai rer, anise serer retakwer ndovɨrekoise oyese.

¹⁸Iya pereko mba'ekwasa ko rendukwa tuprɨ agwä; akoi osendukwa va'e toikwa tuprɨ mba'e ɨpɨ vai rer retakwer. Evokoi ni'ä ava rer retakwer, a'e seiscientos sesenta y seis tuprɨ.