Read Guarayu APOCALIPSIS 19 Bible Online

APOCALIPSIS 19 - Guarayu bible

APOCALIPSIS 19

¹Ko ipare, asendu ava re'ɨi ñe'ë pirätä ɨvave aipo e'i va'e: “¡Imboeteiprɨ yande Yar tasekoi! Poropɨsɨrösa, teko porañetesa iyavei ipirätäsa a'e yande Ru Tüpä suindar,

²esepia ni'ä oyapo mba'e supiete va'e; opa avei omokañɨ ko kuña oyemboagwasa-gwasa tëi va'e nungar iyavei oyemondo-mondo tëisa pɨpe opa ava oseko momarä ɨvɨ pɨpendar yuvɨreko; oyepɨ avei a'e kuña rese Tüpä rembigwai omano va'ekwer repɨkave.”

³Ipare aipo e'i iri yuvɨreko no: “¡Imboeteiprɨ yande Yar tasekoi! Esepia ni'ä evokoi tekwa rätächi ndopai chietera.”

⁴Evokoiyase veinticuatro tuprɨ ɨva pendar ikwaiprɨ yuvɨrekoi va'e iyavei irugätu ɨva pendar yuvɨrekove va'e, a'e Tüpä mboeteisa pɨpe oyeaɨvɨ ɨvɨ rese, aipo e'i yuvɨreko: “¡Egwë te'i! ¡Imboeteiprɨ yande Yar tasekoi!”

⁵Evokoiyase Tüpä renda sui tuprɨ oyeendu ñe'ësa aipo e'i va'e: “¡Pemboetei yande Ru Tüpä sereko opakatu peroya va'e, seko ɨvɨ kotɨ katumi va'e, seko ɨvate va'e avei, iyavei opakatu seroyasar peiko va'e osɨkɨye va'e avei ichui tomboetei yuvɨreko!”

⁶Asendu avei ava re'ɨi ñe'ë, inungar akoi ɨtu gwasu rɨapu, ndoyavɨi avei osunu gwasu va'e. Aipo e'i: “¡Imboeteiprɨ yande Yar tasekoi! Esepia ni'ä yande Yar Tüpä omboɨpɨ oporokwai oiko gweko mba'e mboavaisare'ɨ̇sa pɨpe.

⁷Tayayembovɨ'a katu yaiko, iyavei tayamondo yande vɨ'aretesa, yande sapukaisa yande Ru Tüpä upe, esepia ni'ä, kurïtëi oyepota arɨ mendasa Ovesami a'e Cristo sekoi va'e upendar. Sembireko evokoiyase opa oyemoigätu oiko:

⁸chupe ipotasa iyemonde agwä turukwar sekose va'e pɨpe, ndikɨ'ai sendɨyai va'e pɨpe avei, esepia evokoi turukwar sekose va'e, a'e tekokwer ɨvɨïsa upendar a'e yuvɨrekoi Tüpä upendar.”

⁹Evokoiyase mbigwai ɨva pendar aipo e'i cheu: “Eikwachia ko ñe'ësa: ‘Sorɨvete katura akoi ava icho'oprɨ Ovesami a'e Cristo sekoi va'e mendasave yuvɨreko.’ ” Ipare aipo e'i iri cheu: “Ko ni'ä Tüpä ñe'ësa supi tuprɨ va'e ite.”

¹⁰Ipare añenopɨ'ä mbigwai ɨva pendar rovai imboetei agwä, a'e rumo aipo e'iño cheu: “Egwë erei rene, esepia che mbigwai ɨva pendar Tüpä suindar aiko, nde nungar iyavei nde rɨvrɨ eta nungar ogwata va'e Jesús ñe'ëngagwer rupi. Emboetei katu Tüpä eiko.” Esepia ni'ä evokoi Jesús ñe'ëngagwer omogere'ɨ̇ katu ite Tüpä ñe'ë mombe'usar sereko.

¹¹Evokoiyase asepia ɨva oyemboi va'e; a'eve avɨyeteramo tëi kavayu morochi va'e oyemboyekwa, evokoiyase ava sese oyeupi va'e rer: “Seko ɨ̇vɨi tuprɨ va'e iyavei Supi tuprɨ va'e, esepia gweko ɨ̇vɨisa pɨpe oporokwai iyavei oyapo vavasa oiko.

¹²Sesa evokoiyase ndoyavɨi ete akoi tata rendɨgwer, iyavei oakä rese seta vɨreko oyegwaka, iyavei vɨreko terer ikwachiaprɨ oyese a'e gweraño ite rumo oikwa.”

¹³Iturukwar evokoiyase imopiräprɨ tuvɨ pɨpe, serer evokoiyase: Tüpä Ñe'ëngagwer.

¹⁴Sundao re'ɨi ɨva pendar sakɨkwerɨve yuvɨrekoi, iturukwar sekose va'e päve morochi va'e, ndikɨ'ai va'e avei, a'e kavayu morochi va'e arɨve yuvɨrekoi.

¹⁵Iyuru pɨpe sui osë kɨse puku saimbe va'e opakatu ambuae-ae tekwa rupindar momarä agwä. A'e oyokwaira oamotare'ɨ̇sar gwarepochi apoprɨ opo pendar pɨpe. Iyavei osekoa'ära inungar uva opɨve otɨavɨi va'e yuvɨreko iyavei omboɨ'ura evokoi uva rɨkwer paraɨsu katusa resendar pɨpe. A'ese Tüpä mba'emboavaisare'ɨ̇ oñemoɨrö itera chupe.

¹⁶Oturukwar popɨ rese vɨreko ikwachiaprɨ o'ɨvɨpɨ rese avei aipo e'i va'e: “Mborerekwareta ɨvate katu va'e rerekwar iyavei ava Yar ɨvate katu va'e yar.”

¹⁷Ipare asepia ñepëi mbigwai ɨva pendar, opü'a va'e arɨsave o'ä, a'e säse pirätä opakatu vɨräi mba'e ro'ogwar upe oveve va'e ɨva rese: “¡Perio ko'ave peñemonu'ä opakatu Tüpä suindar karusa gwasusave,

¹⁸pe'u ko mborerekwareta ɨvate katu va'e ro'o, sundao eta rerekwar ro'o iyavei ava oikoete va'e ro'o, kavayu ro'o, i'arɨ pendar ro'o avei, opakatu ava ro'o ava nimañekosai va'e ro'o, mbigwai ro'o, seko ɨvɨ kotɨ katumi va'e ro'o, seko ɨvate va'e ro'o avei!”

¹⁹A'ese asepia mba'e ɨpɨ vai iyavei mborerekwareta ɨvate katu va'e ɨvɨ pɨpendar osundao reseve-seve, oñemonu'ä yuvɨreko ovava agwä evokoi kavayu arɨ pendar rese isundao rese aveino.

²⁰Ko mba'e ɨpɨ vai yɨpɨndar va'e sokendasa, oyoya evokoi Tüpä ñe'ë mombe'usar anga'u tëi va'e rese, a'e akoi oyapo va'e mba'e yavairai va'e yɨpɨndar mba'e ɨpɨ vai rovake. Evokoi mba'e yavairai va'e apo pɨpe ombopa-mbopa tëi ava, akoi seroyasar vɨreko va'e mba'e ɨpɨ vai rer oyese iyavei omboetei va'e sa'anga yuvɨreko. Evokoiyase ko mba'e ɨpɨ vai iyavei Tüpä ñe'ë mombe'usar anga'u tëi, opa imombosa sekove reseve ɨpa azufre okai va'e pɨpe yuvɨreko.

²¹Ambuae evokoiyase kavayu morochi va'e arɨ pendar yuru pɨpe sui osë va'e kɨse puku pɨpe opa omano yuvɨreko, evokoiyase opakatu vɨräi mba'e ro'ogwar opa so'o pɨpe oyemo'ɨ̇tarö yuvɨreko.