Read Guarayu APOCALIPSIS 2 Bible Online

APOCALIPSIS 2 - Guarayu bible

APOCALIPSIS 2

¹“Eikwachia mbigwai ɨva pendar che reroyasar rärösar Éfeso pendar upe: ‘Akoi vɨreko va'e oakato kotɨ ñuvɨrïo ova yasɨtata, a'e akoi ogwata va'e oro apoprɨ tataendɨ rɨru yakatu rupi, aipo e'i imombe'u:

²Che aikwa opakatu mba'e pe rembiapo; pe poravɨkɨ pirätäsa iyavei pe yemovɨräkwäsa. Aikwa avei ndapeipotai ava naporäi va'e pe pa'üve yuvɨrekoi va'erä. Pesekoa'ä avei ava, ore Jesús ñe'ë mombe'usar oroiko e'i tëi va'e, ipare peikwa iporombopa tëisa yuvɨreko.

³Iyavei che aikwa peñemosañose peyemombaraɨsu peiko che raɨsupave, ndapekwerai ete ipɨpe.

⁴Che rumo aikwa oime mba'e nda'ei va'e che pɨ'a rupi pe rembiapo: ndapeyeaɨsu iri inungar yɨpɨndar.

⁵Sese peyemoma'endu'a yɨpɨndar pe rekokwer avɨye va'e rese; pemboasɨ mba'e pe rembiapo peyevɨ Tüpä upe; peyeaɨsu iri katu inungar yɨpɨndar. Anise ayevɨra peü, arokwapara oro apoprɨ tataendɨ rɨru pe sui akoi ndapeyevɨise Tüpä upe.

⁶Ko rumo mba'e pe rembiapo avɨye cheu, ndapeipotaise nicolaítas rembiapo mba'e, che avei ni'ä ndaipotai ete.

⁷¡Akoi osendu pota va'e, toyapɨsakaño Espíritu omombe'u va'e rese opakatu che reroyasar upe! Akoi oyemovɨräkwä va'e mba'e-mba'e tëi apoe'ɨ̇ agwä, ito'u amondora ɨvɨra a tekovesa resendar oime va'e teko orɨsave che Ru Tüpä pɨri.’ ”

⁸“Eikwachia avei mbigwai ɨva pendar che reroyasar rärösar Esmirna pendar upe: ‘Ko yɨpɨndar ipandar avei aipo e'i, akoi omano va'ekwer, a'e okwerayevɨ iri:

⁹Che aikwa pe yemombaraɨsusa, pe paraɨsusa avei; pe rumo mba'e yar nungar ite peiko ɨva pendar mba'e rese. Aikwa avei pe rese ava semirä tëi va'e, ore Tüpä rembiporavo judío oroiko e'i tëi va'e, a'e yuvɨrekoi Karugwar reroyasar tëi.

¹⁰Ndapesɨkɨyei chira pe paraɨsu agwä sui, esepia karugwar osokenda ukara amove pe pa'ü pendar sekoa'ä agwä; pe paraɨsu rane itera ni'ä opayandepo yovaive arɨ rupi peiko. Akoi peyemovɨräkwä tuprɨse sese, a'ese che amondora porerekosa tekovesa apɨre'ɨ̇ ndopai va'e peü.

¹¹¡Akoi osendu pota va'e, toyapɨsakaño Espíritu omombe'u va'e rese opakatu che reroyasar upe! Akoi ava oyemovɨräkwä va'e mba'e-mba'e tëi apoe'ɨ̇ agwä, a'e ndoiporarai chira imoñuvɨrïosa manosa oimese kuri.’ ”

¹²“Eikwachia avei mbigwai ɨva pendar che reroyasar rärösar Pérgamo pendar upe: ‘Aipo e'i akoi vɨreko va'e kɨse puku saimbe yovai va'e:

¹³Che aikwa pe rekosa, a'eve akoi Karugwar ogwapɨ öi; mborerekwar gwasu nungar imboyeroyaprɨ sekoi. Pe rumo peyemovɨräkwäño ite chupe che rekokwer rese peiko, ndapeseyai ete che rese pe yeroyasa yepe oyuka tëi che rekokwer mombe'u tuprɨsar Antipas evokoi tekwa Karugwar rekosave.

¹⁴Che rumo aikwa mba'e pe resendar: eipeve amove ava ndoyepepɨ potai ete Balaam porombo'esa sui yuvɨreko. A'e omboarakwa Balac Israel pendar mboangaipa uka agwä, toyuvɨro'uño mba'e ro'o seropove'ëprɨ mba'e ra'anga upendar tëi oya, toyemboagwasaño yuvɨreko oyapave avei.

¹⁵Iyavei amove ava pe pa'üve ndoyepepɨ potai ete nicolaíta porombo'esa sui yuvɨreko.

¹⁶Sese pemboasɨ pe rekokwerai, peyevɨ Tüpä upe, anise che aso poyavara peü, a'ese avavara chupe yuvɨreko che yuru pɨpe sui osë va'e kɨse puku pɨpe.

¹⁷¡Akoi osendu pota va'e, toyapɨsakaño Espíritu omombe'u va'e rese opakatu che reroyasar upe! Akoi ava oyemovɨräkwä va'e mba'e-mba'e tëi apoe'ɨ̇ agwä, semi'urä amondora ndasepiasai va'e maná iyavei amondora ita morochi va'e chupe, a'e ita rese ikwachiasara terer ipɨasu va'e, evokoi ava oipɨsɨ va'e gweraño oikwara.’ ”

¹⁸“Eikwachia avei mbigwai ɨva pendar che reroyasar rärösar Tiatira pendar upe: ‘Tüpä Ra'ɨrɨ akoi vɨreko va'e gwesa inungar tata rendɨgwer, ipɨ inungar akoi bronce rapɨprɨ aipo e'i imombe'u:

¹⁹Che aikwa mba'e opakatu pe rembiapo; aikwa pe poroaɨsusa, che rese pe yeroyasa, mba'e rese pe'añekosa iyavei pe yemovɨräkwäsa, aikwa avei kurïtëi mba'e perembiapo avɨye katu yɨpɨndar va'e sui.

²⁰Oime rumo mba'e pe rembiavɨ: peñemosaño evokoi kuña Jezabel pe pa'ü pendar upe, a'e akoi oñe'ë tëi anga'u va'e Tüpä rese viña, a'e rumo ombopa tëi oporombo'esa pɨpe che rembigwai iyemboagwasa-gwasa tëi uka agwä sereko iyavei o'u uka mba'e ro'o mba'e ra'anga tëi upe seropove'ëprɨ yuvɨreko chupe.

²¹Che amondo vɨte tëi arɨ chupe, tomboasɨ oangaipa Tüpä upe oyevɨ agwä che yapave viña; a'e kuña rumo ndopoi potai ete oyemboagwasa tëisa sui.

²²Evokoiyase kurïtëi che amomba'easɨ ukara supave ino, opa aveira ayuka uka imembrɨ eta; iyavei akoi sesendarer yuvɨrekoi va'e, a'e avei iparaɨsu katura yuvɨreko akoi noñekuñarö potaise ite yuvɨreko.

²³Egwë e'i opakatu che reroyasar oikwara yuvɨreko che aikwa tuprɨ ite opakatu ava pɨ'a ñemoñetasa iyavei ñepëi-pëi pe yakatu amondora pe rembiapokwer reprɨ peü.

²⁴Pe rumo opakatu Tiatira pendar ndaperoyai va'e ko porombo'e raisa, iyavei ndapeyembo'ei Karugwar arakwasa rese ndikwasai va'e, sese namondo iri chira ambuae che porokwaita peü.

²⁵Peyemovɨräkwä katu evokoi mba'e pereko va'e rese, akoi che ayevɨse voi vitu kuri.

²⁶Akoi ava oyemovɨräkwä va'e mba'e-mba'e tëi apoe'ɨ̇ agwä, oyapo va'e che remimbotar mano rupi ete, chupe amondora mborerekwar seko agwä opakatu ɨvɨ rupi,

²⁷inungar che Ru ombou che mborerekwarä cheu; egwë e'i aveira oporokwai opakatu tekwa rupi inungar akoi mbokoka gwarepochi apoprɨ pɨpe, mba'e rɨapɨipa uka agwä, avɨyera akoi mba'emoinda ñaɨ'u apoprɨ viña.

²⁸Iyavei amondora yasɨtata ko'ë rerusar chupe.

²⁹¡Akoi osendu pota va'e, toyapɨsakaño Espíritu omombe'u va'e rese opakatu che reroyasar yuvɨrekoi va'e upe!’ ”