Read Guarayu APOCALIPSIS 3 Bible Online

APOCALIPSIS 3 - Guarayu bible

APOCALIPSIS 3

¹“Eikwachia avei mbigwai ɨva pendar che reroyasar rärösar Sardes pendar upe: ‘Akoi ava vɨreko va'e ñuvɨrïo ova tuprɨ Tüpä espíritu iyavei akoi ñuvɨrïo ova tuprɨ yasɨtata no aipo e'i imombe'u: Che aikwa mba'e opakatu pe rembiapo, aikwa avei manosa pɨpe tëi peikose yepe oikove va'e nungar peiko viña.

²Peyemopoäse katu peiko iyavei pemongere'ɨ̇ katu akoi vɨroya vɨte va'e, esepia oyepepɨpa pota ite yuvɨreko viña, supiete mba'e pe rembiapo che Ru Tüpä rovake, nda'ei supi tuprɨ va'e.

³Peyemoma'endu'a akoi porombo'esa peipɨsɨ va'e rese; pepoi rene ichui peyevɨ katu Tüpä upe. Ndapeyemovɨräkwäise rumo, asora peü inungar imondarai va'e, egwë a'era vicho pe resapɨ'a.

⁴Oime rumo amove ava pe pa'ü pendar ndoyapoi ete angaipa yuvɨreko, evokoiyase inungar ava ogwata va'e oturukwar morochi va'e rese, egwë e'i aveira a'e gweko maräne'ɨ̇ pɨpe ogwata che rupi, esepia a'e iya ite egwë e'ira yuvɨreko.

⁵Akoi ava oyemovɨräkwä va'e mba'e-mba'e tëi apoe'ɨ̇ agwä, a'e sese imondesara turukwar morochi va'e, a'e serer namboye'oi chira kwachiar tekovesa resendar pɨpe sui, asenoira rumo che Ru rovai iyavei sembigwai ɨva pendareta rovake avei kuri.

⁶¡Akoi ava osendu pota va'e, toyapɨsakaño Espíritu omombe'u va'e rese che reroyasar yuvɨrekoi va'e upe!’ ”

⁷“Eikwachia avei mbigwai ɨva pendar che reroyasar rärösar Filadelfia pendar upe: ‘Ko seko maräne'ɨ̇ va'e, supi tuprɨ va'e ite, vɨreko va'e mborerekwasa araka'endar mborerekwar gwasu David nungar, akoi omboise okenda, ñepëi yepe ava nomboyai chietera; iyavei akoi omboyase, ñepëi yepe ava nomboi chiaveira:

⁸Che rumo aikwa mba'e opakatu pe rembiapo; esepia, che amondo pe rovake inungar okenda imboiprɨ peü pemombe'u va'erä che rekokwer, a'e ñepëi yepe ava nomboyai chietera yuvɨreko, esepia, yepe pe nipirätä tuprɨi va'e, peroya ite rumo che ñe'ë iyavei ndacheñomi ete ava sui peye.

⁹Ko Karugwar reroyasar semirä tëi va'e, ore Tüpä rembiporavo judío oroiko, e'i tëi va'e, nda'ei rumo a'e ite va'e yuvɨrekoi, a'e amoñenopɨ'äpa ukara pe rovai, toikwa yuvɨreko che pe raɨsusa che yapave.

¹⁰Esepia peroya ite che porokwaita, peyemovɨräkwä ite evokoi mba'e tëi upe peiko, evokoiyase che opoepɨra akoi arɨ tekoa'äsa ouse opakatu ɨvɨ rupindar upe kuri.

¹¹Ayevɨ poyavara. Peyemovɨräkwä katu Tüpä reroyasa pereko va'e rese, evokoiyase ñepëi yepe ava ndovɨrokwai chietera Tüpä suindar porerekosa pe sui.

¹²Akoi oyemovɨräkwä va'e mba'e-mba'e tëi apoe'ɨ̇ agwä yuvɨreko, a'e che Ru pɨri narä ite yuvɨrekoira, a'e evokoiyase inungar-ra che Ru Tüpä rëtä vɨräkwäsa ndopai va'e yuvɨreko; sese aikwachia ukara che Ru Tüpä rer che Ru Tüpä rekwa rer aveino, a'e Jerusalén pɨasu, evokoi ou va'erä ɨva pendar che Ru Tüpä sui; aikwachia aveira che rer ipɨasu va'e yuvɨreko sese.

¹³¡Akoi ava osendu pota va'e, toyapɨsakaño Espíritu omombe'u va'e rese che reroyasar yuvɨrekoi va'e upe!’ ”

¹⁴“Eikwachia avei mbigwai ɨva pendar che reroyasar rärösar Laodicea pendar upe: ‘Ko aipo e'i ñe'ësa supiete va'e mombe'u seko katuprɨ va'e, esepia ichui ni'ä Tüpä oyapo opakatu mba'e ɨvɨ pɨpendar:

¹⁵Che aikwa mba'e opakatu pe rembiapo. Pe inungar ɨ nda'ei so'ɨ̇sa va'e iyavei nda'ei saku va'e. Ɨ saku raimi tëi va'e nungar peiko pe rembiapo pɨpe. ¡Ñepëi reseve va'e rumo aipota, nda'ei igwayɨ tëi va'e!

¹⁶Pe rekokwer rumo inungar igwayɨ tëi va'e, sese opomboyevɨñora cheyesui.

¹⁷Esepia pepɨ'añemoñeta che mba'e yar ite opakatu mba'e areko, nipanei ete mba'e cheu peye viña; pe rumo ndapeikwai pe paraɨsusa che Ru rovake inungar ndasesapɨsoi va'e, iyavei ndapeyavɨi nditurukwai va'e peiko.

¹⁸Sese opomboarakwa; peseka ɨva pendar oro tatave imoatɨröprɨ nungar che sui pe paraɨsue'ɨ̇ iri agwä che Ru rovake; peseka avei turukwar morochi va'e teko tuprɨsa peyeupe che suindar nani tuprɨ va'e nungar pɨpe pe reko e'ɨ̇ agwä, pechi e'ɨ̇ agwä avei inungar ava oseka mosa gwesa upe narä osareko iri agwä, egwë peye aveira.

¹⁹Che añe'ë pirätä seko mo'ɨ̇vi agwä che rembiaɨsu upe yepi. Peyemongere'ɨ̇ katu, pemboasɨ avei pe rekokwer che Ru Tüpä upe pe yevɨ agwä.

²⁰Esepia, inungar ava okenda omotära okendɨpɨve o'ä viña, egwë a'e pe pɨ'ave vichiko; pesenduse che ñe'ë, pemboira cheu. Che evokoiyase aikera pe pɨri, yakarura oyepɨri.

²¹Akoi ava oyemovɨräkwä va'e mba'e-mba'e tëi apoe'ɨ̇ agwä yuvɨreko, a'e ambogwapɨ ukara che ɨpɨve imoi che porokwaisave, inungar che mba'e tëi reko reroyɨ pare, agwapɨ che Ru ɨpɨve vïte.

²²¡Akoi ava osendu pota va'e, toyapɨsakaño Espíritu omombe'u va'e rese che reroyasar yuvɨrekoi va'e upe!’ ”