Read Guarayu APOCALIPSIS 5 Bible Online

APOCALIPSIS 5 - Guarayu bible

APOCALIPSIS 5

¹Che asepia kwachiar Tüpä vɨreko va'e oakato kotɨ, ikwachiaprɨ ipɨpe kotɨ, okar kotɨ aveino, imboyaprɨ ñuvɨrïo ova sello pɨpe.

²Ipare asepia mbigwai ɨva pendar seko ɨvate va'e, a'e oporandu pirätä oiko aipo e'i: “¿Ava upe pi'ä iyakatu kwachiar mboi agwä iyavei sello imboyeroyaprɨ mondoro agwä no?”

³Ndipoi ete rumo ɨva pendar, ɨvɨ pɨpendar, ɨvɨvrɨ pendar oikatu va'erä kwachiar pɨpira sepia agwä.

⁴Evokoiyase che ayase'o iteanga tëi, esepia ndipoi ete ñepëi ava avɨye va'e kwachiar pɨpira sepia agwä.

⁵A'ese ikwaiprɨ pa'ü pendar ñepëi aipo e'i cheu: “Ereyase'o iri eme, esepia ni'ä evokoi ava Yagwa pɨ̇ta Judá suindar, a'e akoi mborerekwar gwasu David suindar avei, a'e ni'ä karugwar osekoreroyɨ va'e, sese iya ite chupe ñuvɨrïo ova sello mondoro kwachiar pɨpira agwä avei.”

⁶Evokoiyase, asepia Tüpä rovai ɨva pendar irugätu yuvɨrekove va'e pa'üve ikwaiprɨ yuvɨrekoi va'e mbɨterve, ñepëi Ovesami a'e Cristo sekoi va'e, i'äi avɨye seropove'ëprɨ. A'e ni'ä vɨreko ñuvɨrïo ova tuprɨ sächi, ñuvɨrïo ova tuprɨ avei sesa; a'e evokoiyase ñuvɨrïo ova tuprɨ Tüpä espíritu yuvɨrekoi opakatu ɨvɨ rupi imbogwataprɨ.

⁷Ipare evokoi Ovesami a'e Cristo sekoi va'e oso, oipɨsɨ kwachiar evokoi tenda arɨve ogwapɨ va'e yakato kotɨ sui;

⁸kwachiar pɨsɨ pare, evokoi irugätu yuvɨrekove va'e, iyavei veinticuatro tuprɨ ikwaiprɨ, a'e oñenopɨ'äpa Ovesami Cristo sekoi va'e rovai yuvɨreko. Oyakatu ñepëi-pëi vɨreko arpas yuvɨreko, itaɨsɨ rɨru oro apoprɨ, a'e avei omboapɨpo tuprɨ sereko yuvɨreko, a'e itaɨsɨ ni'ä Tüpä reroyasar yeruresa.

⁹Iyavei osapukai ipɨasu va'e sapukaisa yuvɨreko: “Ndeu iyakatu ite kwachiar pɨsɨ agwä, imboyaprɨ mondoro agwä aveino, esepia ni'ä nde yukaprɨ seropove'ëprɨ ereiko; evokoiyase nde ruvɨ pɨpe eremboepɨpa Tüpä upe narä opakatu ava ambuae-ae tëi va'e, iñe'ë ambuae-ae tëi va'e avei, ñepëi-pëi tekwa yakatu rupindar, ɨvɨ rupindar avei yuvɨreko.

¹⁰Iyavei eremomborerekwa uka Tüpä upe narä, eremondo avei pa'i seko agwä yande Yar Tüpä upe narä, ipare a'e oporokwaira opakatu ɨvɨ rupi yuvɨreko.”

¹¹Ipare asepia, asendu avei mbigwai ɨva pendar re'ɨi ñe'ë evokoi oyere tuprɨ va'e tenda rese yuvɨreko iyavei evokoi yuvɨrekove va'e ñe'ë, ikwaiprɨ ñe'ë va'e avei. A'eve seta iteanga yuvɨrekoi,

¹²a'e aipo e'i oñe'ë pirätä yuvɨreko: “¡Ko Ovesami a'e Cristo sekoi va'e yukapɨrer a'e chupe iyakatu ite mborerekwasa pɨsɨ agwä, opakatu porerekosa avei, mba'ekwasa iyavei pirätäsa, mboyeroyasa, poromboeteisa, sapukaisa pɨsɨ agwä aveino!”

¹³A'ese asendu avei opakatu Tüpä rembiapo ɨvave yuvɨrekoi va'e, ɨvɨ pɨpendar, ɨvɨvrɨ rupindar iyavei paragwasu pɨpendar, aipo e'i yuvɨreko: “¡Akoi ogwapɨ va'e tenda porañetesave iyavei Ovesami a'e Cristo sekoi va'e rendave, a'e timboeteisa, toipɨsɨ avei teko porañetesa iyavei pirätäsa, opakatu apɨre'ɨ̇ va'erä yepi!”

¹⁴Evokoi irugätu ava yuvɨrekove va'e aipo e'i yuvɨreko: “¡Amén!” Iyavei ikwaiprɨ veinticuatro tuprɨ yuvɨrekoi va'e, a'e oñenopɨ'ä yuvɨreko sovai imboeteisave.