Read Guarayu APOCALIPSIS 6 Bible Online

APOCALIPSIS 6 - Guarayu bible

APOCALIPSIS 6

¹Ipare asepia akoi Ovesami a'e Cristo sekoi va'e omondoro yɨpɨndar va'e sello ñuvɨrïo ova kwachiar mboyasa sui. A'ese asendu avei ava irugätu yuvɨrekoi va'e pa'ü pendar oñe'ë pirätä, iñe'ë ndoyavɨi osunu va'e: “¡Erio!” e'i cheu.

²A'ese asepia kavayu morochi va'e, ava i'arɨ pendar vɨreko vɨrapar. Chupe imondosa yegwaka, egwë e'i a'e osë seko pirätä katu va'e ava reko reroyɨ agwä.

³Omondorose akoi Ovesami a'e Cristo sekoi va'e imoñuvɨrïosa sello, a'ese asendu imoñuvɨrïosa yuvɨrekove va'e pa'ü pendar ñe'ë: “¡Erio!” e'i va'e cheu.

⁴Ipare osë kavayu pirä va'e, a'e ava i'arɨ pendar oipɨsɨ pirätäsa mba'e tuprɨsa rerokwa agwä ɨvɨ pɨpendar ava sui toyeyuka-yuka tëi yuvɨreko oyapave; ipare imondosa kɨse puku chupe.

⁵Omondorose akoi Ovesami a'e Cristo sekoi va'e imombosapɨsa sello, a'ese asendu imombosapɨsa yuvɨrekove va'e pa'ü pendar ñe'ë aipo e'i cheu: “¡Erio!” Ama'e sese, a'ese asepia kavayu sü va'e, a'e ava i'arɨ pendar vɨreko opo pɨpe mba'e rä'asa.

⁶Ipare asendu irugätu yuvɨrekove va'e kotɨndar ñe'ë, a'e aipo e'i: “Ñepëi sa'ämbrɨ trigo serokwasa gwarepochi ñepëi arɨ resendar mboravɨkɨ reprɨ pɨpe, mbosapɨ sa'ämbrɨ rupindar cebada evokoiyase serokwasa avei ñepëi arɨ resendar mboravɨkɨ reprɨ pɨpe no; pemokañɨi rene mba'e kɨra uva rɨkwer aveino.”

⁷Akoi Ovesami a'e Cristo sekoi va'e omondorose imoirugätusa sello, a'ese asendu ava imoirugätusa ñe'ë aipo e'i: “¡Erio!” e'i cheu.

⁸Ama'e, ipare asepia kavayu iyu rasɨ va'e, ava i'arɨ pendar serer va'e Te'ögwer. Ipare sakɨkwei ou va'e oiko a'e serer Omano-va'e-rekosa, a'e chupe imondosa teko pirätäsa ɨvɨ imoirugätusa ya'okwer rupi igwata agwä ava yuka agwä vavasa pɨpe, tɨepore'ɨ̇ pɨpe, mba'erasɨ pɨpe, mba'e ɨpɨ pɨpe aveino.

⁹Akoi Ovesami a'e Cristo sekoi va'e omondorose imbopoyandeposa sello, a'ese asepia mba'e seropove'ëprɨ rendavrɨve ava ä, a'e yukasa va'e yuvɨreko Tüpä ñe'ëngagwer mombe'usa sui tëi seroyasa sui tëi aveino.

¹⁰A'e aipo e'i oñe'ë pirätä yuvɨreko: “Ore Yar Tüpä seko maräne'ɨ̇, supi tuprɨ va'e, ¿mba'ese vo eremombaraɨsura ore yukasarer yuvɨrekoi va'e ɨvɨ pɨpendar ore repɨsave?”

¹¹Ipare imondosa iyakatu turukwar morochi va'e, a'ese aipo e'i chupe pepɨtu'u vɨte rane, tayavɨyepa rane pe rɨvrɨ eta retakwer, Tüpä upe oporavɨkɨ va'e mba'e aposa pɨpe yukaprɨ pe nungar yuvɨreko.

¹²Akoi Ovesami a'e Cristo sekoi va'e omondorose imoñepëi ova sello, a'ese oime ɨvɨ rɨrɨi ipirätä va'e. Arɨ evokoiyase sü, avɨye akoi turukwar sü va'e mano sendar yemondesa iyavei yasɨ pirä inungar tuvɨ,

¹³yasɨtata evokoiyase opa ovɨapi ɨva sui ɨvɨ rese yuvɨreko, inungar akoi higo akrɨ ombosururu va'e ɨvɨtuai yepi.

¹⁴A'ese ɨva ndoyekwa iri inungar akoi kwachiar yeapoapɨprɨ va'e, opakatu tuprɨ avei ɨvɨtrɨ, ka'a pa'ü aveino osɨrɨ gwenda sui yuvɨreko.

¹⁵Mborerekwareta avei ko ɨvɨ pɨpendar yuvɨrekoi va'e opa tëi oñemi mba'ekwar pɨpe yuvɨreko, ita gwasu pa'ü rupi avei yuvɨreko no, oyoya gwasu seko ɨvate va'e, sundao rerekwareta, mba'e yar seko pirätä va'e, iyavei opakatu tuprɨ mbigwai eta, ava nda'ei va'e mbigwai avei;

¹⁶iyavei aipo e'i yuvɨreko ɨvɨtrɨ upe, itape gwasu upe avei: “¡Evɨapi ore arɨve, toroñemipa tëi Tüpä sui iyavei Ovesami a'e Cristo sekoi va'e sui akoi ombou va'e ko poronupasa ipirätä va'e oreu!

¹⁷Esepia oyepota ite Tüpä ñemoɨrösa yandeu, ¿uma pi'ä oikatura oyemovɨräkwä chupe?”