Read Guhu Samane Paanaiteta 5 Bible Online

Paanaiteta 5 - Guhu Samane bible

Paanaiteta 5

¹Qate Ohongai poro qere ota qooro oomi boto pobi nohota gee senginoma teei oomi ana moota. Moohimi oho qetaqetai nakuta oota ma sasata dzapa ma pasarai oomi oho geeba sebenike ee dzusama suutomi oota.

²Oomi angero beedzaenoma teei sokateqi hiireta, Apei geeba erake isanate sengi geemaqu?

³Oke hiireqi qiri eetemi eehe, qusu ma ttoka minarata abi teei sengi oke geemaqa oho mee isaitaquho isaki te oorara.

⁴Abi oonomai bamu naatemi ana Dzohanei dzasa minake eete tti hiireta.

⁵Tti hiiremi abi mimihota teei ana pobi hiireta, Maqa, eto tti hiibaino. Dzutaho quni ma manihota teei oho isaki oorai oi Tabitiho sooro ma saina noke qesai hee, Dzutaho Raioniqi hiirorai noi suqobidza maikhata. Oonita noi sengi geeba sebeninoma oke geehiqa gee isaitaquho isaki ooraita mooro.

⁶Oiqi hiiremi ana moomi poro qereta qaraqaraho isaki eserisa eseri nokoho bisa ma abi mimi 24 nokoho bisa qapunipamuta abiho Hoo Dzooba teei qooro oota. Oonihe noho samai sipisipi khatake kahosaho quba kiridza qeeroraiho tomidza naatemi noho nese sebeni ma qiba toqena sebeni oota (oi Ohongaho Sumasai ttoka ma haba gama igabiroraiho qahura naateta).

⁷Oonita napaho Hoo Dzooba noi poro qereta baaqi Ohonga maiho boto pobita gee bamenoma senginoma oke aimata.

⁸Aihimi qaraqaraho isaki eserisa eseri ma abi mimi 24 nokoi Hoo Dzooba napaho, oko toro nohota pomai kotorota. Pomai kotoroqi goriho ttuba samane nokome ota mootomi oho nakuta ura moromoronoma peiteta, oio qaheuba abi minarai hasa ma pupu dzoobirorai oho qahurani.

⁹Qate paha nokoi kui nokome aimaqi Hoo Dzooba napahoho dzapa qiraiteqi naa usaqe erake hiireta,Buububuu! Nii Ohongaho quba eeteqiabi noo maina paina haba samaneta ooraima quni ma mani samane nokoke ingonaitareiqidzuu niimeke perebiretaoho qubake nii niiqe gee senginoma geebanomaoke aima geemaquho isaki oorai, dzoobe!

¹⁰Nii abi samaneke ingonaiteqihiiremi nokoi Ohongaho quba eeteqittiihu barabara abi tupu mina naate ooraiqittoka ma haba minarake soopara eetorakoi, uububuu!

¹¹Naa oke hiire qaasuhimi ana moo nookami angero kitu ma hoho mina, hattatti ttauseni heagopago nokoi poro qere ma qaraqaraho isaki eserisa eseri ma abi mimi 24 oke gama rome biireta.

¹²Rome biireqi garuruiqi Hoo Dzooba napahoke hee,Meenipamu, abi niike kabira bagenomaho isakitadzuubetetanita beedzae ma tatangama ttuma ma gesina ma dzapa pobi ma agoagoma dzakapa oi gama niihoi keke!

¹³Oiqi hiiremi idze! Ana nookami Ohongaho boto popo minara oi qusuna ma katana, ma obana ma torana, ma ika ma ikana, oi gama too teenaite kaitomaqi hiireta,Oore, nee ma bau, beedzae ma tatangama dzapa pobi minaraoi Ohonga mai poro qerena qoororaima Khatai abiho Hoo Dzooba naate oorainopoqaho isaki kekeni!

¹⁴Noo oke quba minarai hiiremi qaraqaraho isaki eserisa eseri nokoi totoho oke qaupuiteqi hee, Oi meenipamu ooniqi hiiremi paha abi mimi 24 nokoi gama pomai kotoroqi Ohongaho hasama gegema hiireta.