Read Gujarati Common Language Bible - પવિત્ર બાઇબલ C.L. નિર્ગમન 36 Bible Online

નિર્ગમન 36 - Gujarati Common Language Bible - પવિત્ર બાઇબલ C.L. bible

નિર્ગમન 36

¹“બસાલએલ, ઓહોલીઆબ અને અન્ય સર્વ કારીગરો જેમને પ્રભુએ સર્વ વસ્તુઓ બનાવવા કૌશલ્ય અને સમજશક્તિ આપ્યાં છે તેમણે સર્વ વસ્તુઓ પ્રભુની આજ્ઞા પ્રમાણે જ બનાવવી.”

²બસાલએલ, ઓહોલીઆબ તથા પ્રભુએ જેમને કૌશલ્ય બક્ષ્યું હતું તથા જેઓ મદદ કરવા તૈયાર હતા તેવા સૌને બોલાવીને મોશેએ કાર્ય શરૂ કરવા જણાવ્યું.

³પવિત્ર મંડપની રચના માટે જે સર્વ અર્પણો ઇઝરાયલીઓ લાવ્યા હતા તે મોશેએ તેમને આપ્યાં. પણ ઇઝરાયલીઓએ તો દર સવારે મોશે પાસે અર્પણો લાવવાનું ચાલુ રાખ્યું.

⁴ત્યારે પવિત્ર મંડપનું કામ કરતા સર્વ કુશળ કારીગરોએ મોશે પાસે જઈને કહ્યું,

⁵“પ્રભુએ જે કાર્ય કરવાની આજ્ઞા આપી છે તે માટે લોકો રાજીખુશીથી જોઈએ તે કરતાં પણ વધારે વસ્તુઓ લાવ્યા છે.”

⁶તેથી મોશેએ આખી છાવણીમાં એવી જાહેરાત કરાવી કે હવે કોઈ વ્યક્તિ પવિત્ર મંડપ માટે અર્પણ લાવે નહિ. તેથી તે પછી લોકો કંઈ લાવ્યા નહિ.

⁷કારણ, તેઓ જે સાધનસામગ્રી લાવ્યા હતા તે કામ પૂર્ણ કરવા માટે જોઈએ તે કરતાં વધારે હતી.

⁸કારીગરોમાંથી સૌથી નિપુણ કારીગરોએ મુલાકાતમંડપ બનાવ્યો. તેમણે વાદળી, જાંબુડી તથા ઘેરા લાલ રંગના રેસા તથા ઝીણા કાંતેલા અળસી રેસાના દસ પડદામાંથી તે મંડપ બનાવ્યો. વળી, પડદા પર નિપુણ કારીગરીથી કરુબોની આકૃતિઓનું ભરતકામ કરેલું હતું.

⁹દરેક પડદો એક સરખા માપનો, એટલે કે બાર મીટર લાંબો અને બે મીટર પહોળો હતો.

¹⁰તેમણે પાંચ પડદા એકબીજાની સાથે સીવીને તેનો એક સમૂહ બનાવ્યો અને બીજા પાંચ પડદાને પણ એકબીજા સાથે સીવીને બીજો સમૂહ બનાવ્યો.

¹¹દરેક સમૂહની બહારની કિનાર પર તેમણે વાદળી રંગના કપડામાંથી નાકાં બનાવ્યાં.

¹²તેમણે એકબીજાની સામસામે આવે એ રીતે પ્રથમ સમૂહના પ્રથમ પડદા પર પચાસ નાકાં અને બીજા સમૂહના છેલ્લા પડદા પર પચાસ નાકાં બનાવ્યાં.

¹³પછી તેમણે એ બન્‍ને સમૂહોને જોડીને એક સળંગ પડદો બનાવવા સોનાની પચાસ કડીઓ બનાવી.

¹⁴પછી બકરાના વાળમાંથી બનાવેલ અગિયાર પડદામાંથી તેમણે મંડપ માટે આચ્છાદન બનાવ્યું.

¹⁵આ અગિયારેય પડદા એક જ માપના, એટલે 13 મીટર લાંબા અને 2 મીટર પહોળા હતા.

¹⁶તેમણે પાંચ પડદા એક સાથે સીવ્યા અને બાકીના છ પડદા એક સાથે સીવ્યા.

¹⁷પ્રથમ સમૂહના છેલ્લા પડદાની બહારની કિનાર ઉપર તેમણે પચાસ નાકાં બનાવ્યાં અને બીજા સમૂહના પણ છેલ્લા પડદાની કિનાર પર પચાસ નાકાં બનાવ્યાં.

¹⁸તે સમૂહોને જોડી દઈને આખા મંડપનું આચ્છાદન બનાવવા તેમણે તાંબાની પચાસ કડીઓ બનાવી.

¹⁹વળી, તેમણે ઘેટાંના લાલ રંગેલા ચામડાંનું એક અને બહારના આચ્છાદન માટે ઉત્તમ પ્રકારનું મુલાયમ ચામડાનું બીજું એમ બીજાં બે આચ્છાદનો બનાવ્યાં.

²⁰તેમણે મંડપ માટે બાવળના લાકડાંનાં ઊભાં પાટિયાં બનાવ્યાં.

²¹દરેક પાટિયાની લંબાઈ 4 મીટર અને પહોળાઈ 66 સેન્ટીમીટર હતી.

²²વળી, દરેક પાટિયામાં એકબીજાને સમાન્તર અને સરખા માપનાં બે સાલ હતાં.

²³તેમણે દક્ષિણ બાજુ માટે વીસ પાટિયાં અને તેમની નીચે મૂકવા માટે 40 કૂંભીઓ બનાવ્યાં.

²⁴તેમણે દરેક પાટિયાનાં બે સાલ માટે બે કૂંભીઓ બનાવી હતી.

²⁵વળી, મંડપની ઉત્તર બાજુ માટે વીસ પાટિયાં

²⁶તથા દરેક પાટિયાં નીચે બે એમ ચાંદીની કુલ ચાળીસ કૂંભીઓ બનાવી.

²⁷મંડપની પાછળની બાજુએ એટલે પશ્ર્વિમ બાજુ માટે તેમણે છ પાટિયાં બનાવ્યાં

²⁸અને ખૂણાને માટે બે પાટિયાં બનાવ્યાં.

²⁹ખૂણાના પાટિયાં નીચેથી ઉપર સુધી સળંગ જોડાયેલાં અને એક કડામાં બેસાડેલાં હતાં. બન્‍ને ખૂણાનાં પાટિયાં એ જ પ્રમાણે બનાવેલાં હતાં.

³⁰આમ ચાર ખૂણા માટે આઠ પાટિયાં હતાં અને દરેક પાટિયા નીચે બે એમ ચાંદીની કુલ સોળ કૂંભીઓ હતી.

³¹તેમણે બાવળના લાકડાંની 15 વળીઓ બનાવી: મંડપનાં એકબાજુનાં પાટિયાં માટે પાંચ,

³²બીજી બાજુનાં પાટિયાં માટે પાંચ, અને પશ્ર્વિમ બાજુએ મંડપની પાછળનાં પાટિયાં માટે પાંચ વળીઓ બનાવી. તેમણે વચલી વળી પાટિયાંની મધ્યમાં મંડપના એક છેડાથી બીજા છેડા સુધી મૂકી.

³³તેમણે પાટિયાંને સોનાથી મઢી લીધાં અને તેમાં વળીઓ બેસાડવા માટે સોનાનાં કડાં બનાવ્યાં.

³⁴વળીઓને પણ તેમણે સોનાથી મઢી લીધી.

³⁵તેમણે વાદળી, જાંબુડી અને ઘેરા લાલ રંગના રેસા તથા ઝીણા કાંતેલા અળસીરેસાનો પડદો બનાવ્યો અને તેના પર નિપુણ કારીગરીથી કરુબોની આકૃતિઓનું ભરતકામ કર્યું.

³⁶આ પડદા માટે તેમણે બાવળનાં લાકડાંના ચાર સ્તંભો બનાવ્યા અને તેમને સોનાથી મઢયા. વળી, તેમની કડીઓ સોનાની હતી. આ સ્તંભો માટે તેમણે ચાંદીની ચાર કૂંભીઓ બનાવી.

³⁷મંડપના પ્રવેશદ્વાર માટે તેમણે વાદળી, જાંબુડી અને ઘેરા લાલ રંગના રેસા તથા ઝીણા કાંતેલા અળસી રેસાનો પડદો બનાવ્યો અને તેને ભરતકામથી શણગાર્યો.

³⁸આ પડદા માટે તેમણે પાંચ સ્તંભો બનાવ્યા. એમનાં કડીઓ, ટોચ અને સ્તંભ સોનાથી મઢી લીધાં. આ સ્તંભો માટે તેમણે તાંબાનીની પાંચ કૂંભીઓ બનાવી.