Read Gujarati Common Language Bible - પવિત્ર બાઇબલ C.L. યોબ 13 Bible Online

યોબ 13 - Gujarati Common Language Bible - પવિત્ર બાઇબલ C.L. bible

યોબ 13

¹“તમે કહો છો એ તો મેં મારી આંખોએ જોયું છે; મારા પોતાના કાનોથી એ બધું સાંભળ્યું છે અને સમજ્યો છું.

²તમે જાણો છો તે હું પણ જાણું છું. હું તમારાથી કંઈ ઊતરતો નથી.

³પરંતુ મારી દાદ તો સર્વસમર્થ સામે છે, તમારી સામે નહિ! ઈશ્વરની સામે જ મારે મારા દાવાની દલીલો રજૂ કરવી છે!

⁴પણ તમે જુઠાણાંને ઓપ ચડાવો છો. તમે બધા જ ઊંટવૈદ જેવા છો!

⁵તમે ચૂપ રહો તો કેવું સારું! કારણ, એમાં જ તમારું શાણપણ છે.

⁶હવે મારી દલીલો સાંભળો, અને મારા મુખની દાદ પ્રત્યે લક્ષ આપો.

⁷શું તમે ઈશ્વરનો પક્ષ લેવા જૂઠાણાં ઉચ્ચારશો? અને તેમનો પક્ષ લેવા માટે કપટી વાતો બોલશો?

⁸શું તમે ઈશ્વરની હિમાયત કરીને પક્ષપાત કરશો? શું તમે ઈશ્વર વતી વકીલાત કરશો?

⁹જો ઈશ્વર તમારી ઝડતી લે તો તે તમારા લાભમાં થશે? માણસોને છેતરી શકાય તેમ તમે ઈશ્વરને છેતરી શકશો?

¹⁰ભલેને તમે ગુપ્તમાં પક્ષપાત દાખવતા હો તો ય તે તમને સખત ઠપકો આપશે!

¹¹શું તેમના દૈવી પ્રતાપનો તમને ડર નહિ લાગે? શું તેમનો આંતક તમારા પર નહિ ઊતરે?

¹²તમારાં સૂત્રો રાખ જેવાં નકામાં છે, અને તમારી બચાવની દલીલો માટીના કિલ્લા જેવી તકલાદી છે.

¹³ચૂપ રહો, મને બોલી લેવા દો. પછી ભલે મારું જે થવાનું હોય તે થાય!

¹⁴હું મારા જાનનું જોખમ વહોરવા તૈયાર છું, [1] હું મારા જીવને આખરી દાવમાં હોડમાં મૂકવા તૈયાર છું.

¹⁵અરે, તે મને રહેંસી નાખશે. હવે કોઈ આશા રહી [2] નથી. તેમ છતાં, હું મારી વર્તણૂકનો તેમની સમક્ષ બચાવ રજૂ કરીશ.

¹⁶કદાચ, એ જ રીતે મારો છુટકારો થશે, કારણ, કોઈ અધર્મી ત્યાં ઈશ્વર સમક્ષ હાજર થઈ શકશે નહિ.

¹⁷મારી વાત ધ્યનથી સાંભળો, અને મારા નિવેદન તરફ લક્ષ આપો.

¹⁸જુઓ, મેં મારો દાવો રજૂ કર્યો છે; મને ખાતરી છે કે હું નિર્દોષ જાહેર કરાઈશ.

¹⁹મારી સામે કોઈ આરોપ મૂકનાર છે? તો હું ચૂપ રહેવા અને મરવા તૈયાર છું.

²⁰હે ઈશ્વર, તમારી પાસે મારે માત્ર બે જ માગણી છે; એ સ્વીકારો તો હું તમારાથી મારું મુખ સંતાડીશ નહિ:

²¹તમારો હાથ [3] મારા ઉપરથી દૂર કરો, અને તમારા આતંકથી મને થથરાવો નહિ.

²²પછી મને પડકરો એટલે હું જવાબ આપીશ; પહેલાં મને બોલવા દો, પછી તમે પ્રત્યુત્તર આપો.

²³મારા અપરાધ અને પાપ કેટલાં છે? મારા ગુના અને મારાં પાપ મને જણાવો.

²⁴તમે શા માટે મારાથી તમારું મુખ સંતાડો છો? અને શા માટે મને તમારો શત્રુ ગણો છો?

²⁵હું તો ધ્રૂજતા પાંદડાં જેવો છું; મને કેમ હેરાન કેમ કરો છો? હું તો સૂકા તણખલા સમાન છું; તમે મારી પાછળ કેમ પડયા છો?

²⁶તમે મારી વિરુદ્ધ આકરો આરોપ લખાવો છો, અને મારી યુવાનીમાં થયેલા દોષો ગણી બતાવો છો.

²⁷જો કે હું સડી ગયેલી વસ્તુની જેમ નષ્ટ થતો જાઉ છું અને ઉધઈએ કોરી ખાધેલા વસ્ત્રની જેમ ર્જીણ થતો જાઉં છું. તો પણ તમે મારા પગે બેડી બાંધો છો અને કયા માર્ગે મારું પગેરું જાય છે તે જાણવા મારા પગના તળિયે ડામનાં નિશાન [4] લગાડો છો.