Read Gujarati Common Language Bible - પવિત્ર બાઇબલ C.L. યોબ 18 Bible Online

યોબ 18 - Gujarati Common Language Bible - પવિત્ર બાઇબલ C.L. bible

યોબ 18

¹તે પછી બિલ્દાદ શૂહીએ પ્રત્યુત્તર આપતાં કહ્યું.

²યોબ, ક્યાં સુધી તું શબ્દોની જાળ બિછાવીશ? થોડુંક સમજે તો અમને તારી સાથે બોલવાનું ફાવે.

³શા માટે તું અમને જનાવર જેવા ગણે છે? શું અમે તારી દષ્ટિમાં બુદ્ધિહીન છીએ?

⁴તું તારા ક્રોધાવેશમાં તારી જાતને ઘાયલ કરી નાખે, તો પણ તારે લીધે કંઈ પૃથ્વી વેરણખેરણ કરી નંખાશે, અથવા તને સંતોષવા કંઈ પહાડો ખસેડાશે?

⁵સાચે જ દુષ્ટનો દીવો ઓલવી નાખવામાં આવશે, અને તેના અગ્નિની જ્યોત ફરી પ્રજ્વલિત થશે નહિ.

⁶તેના તંબૂમાંનો પ્રકાશ તદ્દન ઝાંખો પડી જશે; અને તેની પાસેનો દીવો બૂઝાઈ જશે.

⁷તેનાં ધમધમતાં પગલાં ધીમાં પડી જશે, તે પોતાની જ કુયુક્તિઓમાં ફસાઈ જશે.

⁸તેના પોતાના જ પગ તેને જાળમાં સપડાવશે, અને તે જાતે જ ફાંદામાં પડશે.

⁹ફાંસો તેની એડીને જકડી લેશે અને પાશ તેને બાંધી દેશે.

¹⁰તેને માટે જમીન પર જાળ બિછાવવામાં આવી છે, અને તેના માર્ગમાં છટકું ગોઠવાયું છે.

¹¹આતંકો તેને ચોમેરથી ડરાવે છે, અને તેનાં પગલાંનો પીછો કરે છે.

¹²તેની શક્તિ ભૂખથી ક્ષીણ થઈ છે અને તે ઠોકર ખાય એની જ રાહ વિપત્તિ જુએ છે.

¹³વ્યાધિ તેના અંગોની ચામડીને સડાવે છે અને મૃત્યુનો પ્રથમજનિત તેના અવયવોને કોચી ખાય છે.

¹⁴તેના સલામત તંબૂમાંથી તેને ખેંચી કાઢવામાં આવ્યો છે; આતંકના રાજા સમક્ષ તે ઘસડી જવાયો છે.

¹⁵તેના તંબૂને આગ લગાડવામાં આવી છે, [1] અને તેના નિવાસ પર ગંધક વેરવામાં આવ્યો છે.

¹⁶નીચે તેનાં મૂળ સુકાઈ રહ્યાં છે, અને ઉપર તેની ડાળીઓ કરમાઈ રહી છે.

¹⁷દુનિયામાંથી તેની યાદગીરી નષ્ટ થઈ છે, અને શેરીમાં તેનું નામનિશાન રહ્યું નથી.

¹⁸તેને પ્રકાશમાંથી અંધકારમાં ધકેલી દેવામાં આવે છે, અને આ સંસારમાંથી તેને હાંકી કાઢવામાં આવે છે.

¹⁹પોતાના લોકોમાં તેને કોઈ સંતતિ કે વારસદાર નથી, અને તેના નિવાસમાં તેની પાછળ કોઈ વસનાર નથી.

²⁰પશ્ર્વિમના લોકો તેની પડતીથી હાહાકાર કરે છે, અને પૂર્વના લોકો ભયથી ધ્રૂજી ઊઠે છે.

²¹દુષ્ટોના નિવાસોનો એવો જ અંજામ આવે છે, અને ઈશ્વરની અવજ્ઞા કરનારની એ જ દશા થાય છે.”