Read Gujarati Common Language Bible - પવિત્ર બાઇબલ C.L. યોબ 26 Bible Online

યોબ 26 - Gujarati Common Language Bible - પવિત્ર બાઇબલ C.L. bible

યોબ 26

¹તે પછી યોબે પ્રત્યુત્તર આપતાં કહ્યું;

²“મારા જેવા નિર્બળને તમે શી સહાય કરી? અને મારા અબળ હાથને કેટલો ટેકો આપ્યો?

³મારા જેવા અજ્ઞાનીને તમે કેવી સલાહ આપી, અને તમારા સાચા ડહાપણનું પ્રદાન કર્યું?

⁴પણ કોની સહાયથી તમે આ શબ્દો ઉચ્ચાર્યા? અને તમારી વાત માટે ક્યાંથી પ્રેરણા મળી?”

⁵ [1]“મૃતકોની દુનિયામાં રહેતા મૃતાત્માઓ કાંપે છે, મહાસાગરો અને તેમાં રહેનારાં ધ્રૂજે છે.

⁶ઈશ્વર સમક્ષ મૃત્યુલોક શેઓલ ખુલ્લું છે. અને અધોલોક અબાદ્દોનને [2] કંઈ ઢાંકણ નથી.

⁷ઈશ્વર ઉત્તરદિશાને અવકાશમાં વિસ્તારે છે, અને પૃથ્વીને શૂન્યાવકાશમાં લટકાવે છે.

⁸ઈશ્વર પાણીને ઘાડાં વાદળોમાં બાંધી દે છે, છતાં પાણીના બોજથી વાદળો ફાટી જતાં નથી.

⁹તે પૂનમના ચંદ્ર પર ધુંઘટ નાખે છે,અને વાદળો વડે ચંદ્રના મુખને ઢાંકે છે.

¹⁰સાગરની જળસપાટી પર વર્તુળાકાર ક્ષિતિજે તેમણે પ્રકાશ અને અંધકાર વચ્ચે સીમા સ્થાપી છે.

¹¹ઈશ્વરની ધમકીથી સ્તબ્ધ થઈને આકાશના સ્તંભો કાંપે છે.

¹²તેમણે પોતાના બળથી સમુદ્રનું મંથન કર્યું, અને પોતાની ચતુરાઈથી મહાનાગ રાહાબને વીંયો છે.

¹³તેમના વાયુએ સમુદ્રને ઝોળીમાં ભર્યો છે; તેમના ભૂજે ચંચળ નાગને વીંયો છે.

¹⁴પરંતુ આ તો તેમનાં પરાક્રમની ઝલક માત્ર છે; આપણે તો એનો મંદ રણકાર જ સાંભળીએ છીએ, પણ તેમના સામર્થ્યની ગર્જના કોણ જીરવી શકે?”