Read Gujarati Common Language Bible - પવિત્ર બાઇબલ C.L. યોબ 27 Bible Online

યોબ 27 - Gujarati Common Language Bible - પવિત્ર બાઇબલ C.L. bible

યોબ 27

¹યોબે ફરીથી પોતાનો સંવાદ જારી રાખતાં કહ્યું:

²“જીવંત ઈશ્વરના સોગંદ, તેમણે મારો હક્ક છીનવી લીધો છે, અને સર્વસમર્થે મારું દિલ દુભાવ્યું છે.

³જ્યાં સુધી મારા જીવમાં જીવ છે અને મારી નાસિકામાં ઈશ્વરદત્ત શ્વાસ ફૂંક્તો હશે,

⁴ત્યાં સુધી મારા હોઠ જૂઠાણું ઉચ્ચારશે નહિ, અને મારી જીભ કપટનો હરફ પણ ઉચ્ચારશે નહિ.

⁵ઈશ્વર એવું થવા ન દો કે હું તમને સાચા ઠરાવું, એથી ઊલટું, હું નિર્દોષ છું એવા મારા દાવાને મરતાં સુધી વળગી રહીશ.

⁶હું નિર્દોષ છું એ વાત પકડી રાખીશ અને તેને છોડી દઈશ નહિ, મારી જિંદગીમાં કોઈ દિવસ મારો અંતરાત્મા ડંખ્યો નથી.

⁷મારા શત્રુઓ દુર્જનનો અંજામ પામે, અને મારા વિરોધીઓ અપરાધીની સજા ભોગવે!

⁸ઈશ્વર અધર્મીનો અંત આણે, અને તેનો જીવ ઉઠાવી લે ત્યારે તેને માટે શી આશા હોય છે?

⁹તેના પર સંકટ તૂટી પડે, ત્યારે શું ઈશ્વર તેનો પોકાર સાંભળશે?

¹⁰ત્યારે શું તે સર્વસમર્થમાં આનંદ માણશે અને ઈશ્વર પ્રત્યે પ્રાર્થના સર્વદા જારી રાખશે?

¹¹હું તમને ઈશ્વરના સામર્થ્ય વિષે શીખવીશ, સર્વસમર્થની યોજના હું તમારાથી છુપાવીશ નહિ.

¹²સાચે જ તમે બધાએ ઈશ્વરનું કાર્ય નિહાળ્યું છે, છતાં તમે વાહિયાત વાત કેમ કરો છો?”

¹³ [1]“ઈશ્વર પાસેથી દુષ્ટોને આ પ્રમાણે બદલો મળે છે, અને સર્વસમર્થ પાસેથી જુલમગારો આ વારસો પામે છે:

¹⁴દુર્જનોની સંતતિ વધે તો પણ તે તલવારથી માર્યા જશે, અને તેમનાં સંતાનોને પેટભર ભોજન પણ મળશે નહિ.

¹⁵તેમના બાકી રહેલા વંશવારસો મરકીથી દટાશે, અને તેમની વિધવાઓ તેમને માટે વિલાપ કરશે નહિ.

¹⁶જો કે તેઓ ધૂળની જેમ ચાંદીના ઢગલા કરે, અને માટીની જેમ પોશાકોના ઢગ બનાવે.

¹⁷તોપણ નેક જનો જ તે પોશાકો પહેરશે, અને નિર્દોષ લોકો એ ચાંદી વહેંચી લેશે.

¹⁸દુષ્ટો ઘરો તો બાંધે પણ તે કરોળિયાનાં જાળાં જેવાં હશે, અને ચોકીદાર પોતાને માટે કામચલાઉ ઝૂંપડું બાધે તેવાં હશે.

¹⁹એ પથારીમાં સૂઈ જાય છે ત્યારે ધનવાન હોય છે, પણ તે એટલી જ વાર; કારણ, જ્યારે તે આંખ ઉઘાડે છે, ત્યારે બધું ધન લોપ થઈ ગયું હોય છે.

²⁰દિવસે પૂરની પેઠે આતંક આવી પડે છે અને બધું લૂંટી જાય છે, અને રાત્રે વાવાઝોડું તેમનું ધન ચોરી જાય છે.

²¹પૂર્વનો વાયુ તેમને તેમનાં ઘરમાંથી ઉખાડી નાખશે, અને તેમને ઉઠાવીને દૂર દૂર ફેંકી દેશે.

²²તે તેમને નિર્દય રીતે ફંગોળશે, અને તેના હાથમાંથી છટકવા તેઓ મરણિયા પ્રયત્નો કરશે.

²³તે તેમની વિરુદ્ધ તાળી લેશે, અને પોતાના સ્થાનેથી તેમની સામે સુસવાટા મારે છે.