Read Gujarati Common Language Bible - પવિત્ર બાઇબલ C.L. યોબ 3 Bible Online

યોબ 3 - Gujarati Common Language Bible - પવિત્ર બાઇબલ C.L. bible

યોબ 3

¹આખરે યોબ બોલી ઊઠયો અને તેણે પોતાના જન્મદિવસને શાપ દીધો.

²યોબે આમ કહ્યું:

³“મારા જન્મદિવસનો સત્યાનાશ હો, અને ‘પુત્રનો ગર્ભ રહ્યો છે’ એવી ખબર પડી એ રાતનો પણ સત્યાનાશ હો.

⁴તે દિવસ અંધકારમય બની રહો, અને આકાશમાંના ઈશ્વર તેને ગણતરીમાં ન લો; તેના પર કોઈ પ્રકાશ ન થાઓ.

⁵એ દિવસ અંધકાર, ઘોર અંધકારથી છવાયેલો, વાદળથી ઘેરાયેલો અને સૂર્યગ્રહણથી ગમગીન બની રહો.

⁶તે રાતને પણ ઘોર અંધારું જકડી લો, વર્ષની તારીખોમાં એનું કોઈ સ્થાન ન રહો, અને મહિનાઓમાં એની ગણતરી ન થાઓ.

⁷તે રાત વંધ્યા બની રહો; તેમાં કંઈ હર્ષનાદ ન થાઓ.

⁸લેવિયથાનને [1] છંછેડીને જગાડવામાં ચતુર સાધકો અને સમુદ્રને [2] શાપ દેનારા, તેને શાપ દો.

⁹તેના પરોઢના તારા અંધકારમાં ગરક થઈ જાઓ, તે અજવાળાને ઝંખે, પણ તે તેને ન મળો, તે કદી પ્રભાતનાં કિરણો ન જુએ;

¹⁰કારણ, મારી આંખો વિપત્તિ જુએ જ નહિ, તે માટે તેણે મને જનમતો અટકાવ્યો નહિ.

¹¹હું ગર્ભસ્થાનમાં જ મૃત્યુ કેમ ન પામ્યો? અથવા જનમતાંની સાથે જ મારો પ્રાણ કેમ ચાલ્યો ગયો નહિ?

¹²શા માટે મારી જનેતાએ મને ખોળામાં રમાડયો? શા માટે તેણે મને સ્તનપાન કરાવ્યું?

¹³નહિ તો, અત્યારે હું શાંતિમાં સૂતો હોત, અને નિરાંતે ઊંઘતો હોત.

¹⁴હાલ ખંડેર હાલતમાં છે એ મકબરા પોતાને માટે બાંધનાર પૃથ્વીના રાજવીઓ અને તેમના પ્રધાનોની સાથે

¹⁵અથવા પોતાના દફન આવાસોને સોનાચાંદીથી ભરી દેનાર રાજકુંવરોની સાથે હું હોત:

¹⁶ગર્ભપાતથી મરેલું જ જન્મ્યું હોય અને સંતાડી દીધું હોય, અને જેમણે જન્મીને પ્રકાશ જોયો જ નથી તેવાં બાળકોની જેમ મારી પણ હયાતી ન હોત.

¹⁷ત્યાં મૃત્યુલોક શેઓલમાં દુષ્ટોય ચૂપ થઈ જાય છે, અને થાકેલાઓ ત્યાં વિશ્રામ પામે છે.

¹⁸ગુલામો પણ ત્યાં નિરાંત અનુભવે છે. કારણ, ત્યાં તેમને મુકાદમોની બૂમો સાંભળવી પડતી નથી.

¹⁹ત્યાં નાના મોટા સૌ સરખા છે અને ગુલામ પોતાના માલિકથી મુક્ત છે.

²⁰દુ:ખીઓને પ્રકાશ, અને ગમગીનોને જીવન કેમ અપાય છે?

²¹તેઓ મોતને માટે તલપે છે, દાટેલો ખજાનો શોધવા ખોદવું પડે એથી વિશેષ પ્રયત્નો એને માટે કરે છે, પણ તે જડતું નથી.

²²દફનના સ્થાને પહોંચતાં તેઓ હરખાય છે, અને કબરમાં જાય ત્યારે તેઓ અતિ આનંદ માને છે.

²³જે માણસનું ભાવિ ધૂંધળું છે, અને ઈશ્વરે જેને સકંજામાં લીધો છે તેને પ્રકાશ શા કામનો?

²⁴મારા નિસાસા એ જ મારો ખોરાક બન્યા છે, અને મારા ઊંહકારા પાણીની પેઠે રેડાય છે.

²⁵જેની મને દહેશત હતી તે જ મારા પર આવી પડયું. જેનો મને ડર હતો તેણે જ મને પકડી પાડયો છે.

²⁶મને નથી નિરાંત કે નથી શાંતિ; અને નથી ચેન, પણ છે માત્ર સંતાપ!”