Read Gujarati Common Language Bible - પવિત્ર બાઇબલ C.L. યોબ 7 Bible Online

યોબ 7 - Gujarati Common Language Bible - પવિત્ર બાઇબલ C.L. bible

યોબ 7

¹“માણસનું પૃથ્વી પરનું જીવન સતત સંઘર્ષનું નથી? શું એના દિવસો મજૂરના દિવસો જેવા નથી?

²ગુલામ છાંયડાની ઝંખના કરે છે, અને કામદાર આતુરતાથી વેતનની રાહ જુએ છે.

³એની જેમ મારે પણ મહિનાઓ વ્યર્થતામાં વીતાવવા પડે છે અને મારે ફાળે ગમગીનીની રાતો આવી છે.

⁴સૂતી વેળાએ હું વિચારે ચડું છું કે, ‘સવાર ક્યારે થશે?’ પણ રાત લંબાયા કરે છે અને સૂર્યોદય થતાં સુધી હું પડખાં ફેરવ્યા કરું છું.

⁵મારું શરીર કીડાઓ અને ક્દવથી ઢંક્યેલું છે. મારાં ભીંગડાં ફાટે છે અને તેમાંથી પરું વહે છે.

⁶વણકરના કાંટલા કરતાં ય મારા દિવસો વધુ ઝડપથી પસાર થાય છે, અને કોઈ પણ આશા વિના તેમનો અંત આવે છે.

⁷હે ઈશ્વર, સંભારો તો ખરા કે મારી જિંદગી એક ફૂંક જેવી છે. મારી આંખો ફરી કદીય સુખ જોનાર નથી.

⁸મારા પર સતત નજર રાખનાર આંખ પછી ક્યારેય મારી ચોકી કરશે નહિ; તમારી આંખો મને શોધશે, પણ હું હયાત હોઈશ નહિ.

⁹વાદળ વેરાઈ જઈને લોપ થઈ જાય છે, તેમજ મૃત્યુલોક શેઓલમાં ઊતરનાર પાછા ઉપર આવતા નથી.

¹⁰મૃત્યુ પામેલો માણસ પોતાને ઘેર પાછો આવશે નહિ, તેનું ઘર પણ તેને વીસરી જશે!

¹¹તેથી હું મૌન રહી શક્તો નથી. મારા અંતરની તીવ્ર વેદના જ મને બોલવા પ્રેરે છે, મારા પ્રાણની કડવાશ જ મારી પાસે ફરિયાદ કરાવે છે.

¹²હું તે શું સમુદ્ર કે જલરાક્ષસ લિવયાથાન [1] છું કે તમે મારા પર પહેરો મૂકો છો?

¹³જો હું વિચારું કે મારી પથારી તો મને શાંતિ આપશે કે મારો પલંગ મારા સંતાપને હળવો કરશે,

¹⁴ત્યારે તમે મને દુ:સ્વપ્નોથી ગભરાવો છો, અને ભયાનક સંદર્શનોથી થથરાવો છો!

¹⁵એથી તો મને ફાંસીએ લટકાઈ જવાનું, અને આ કંટાળાજનક વેદના કરતાં મોતને ભેટવાનું મન થાય છે.

¹⁶હું ત્રાસી ગયો છું. મારે ઝાંઝુ જીવવું જ નથી. મારો પીછો છોડો, કારણ, મારી જિંદગી વ્યર્થ છે.

¹⁷માનવી તે કોણ કે તમે તેને આટલું મહત્ત્વ આપો છો? અને તેના પર તમારું ચિત્ત લગાડો છો?

¹⁸કે રોજ સવારે તમે તેની તપાસ રાખો છો? અને પળેપળ તેની પારખ કરો છો?

¹⁹શું તમે એક ક્ષણભર પણ તમારી દષ્ટિ મારા પરથી ઉઠાવી લેશો [2] નહિ, અને મને થૂંક ગળવા જેટલો પણ અવકાશ નહિ આપો?

²⁰હે માનવજાતના ચોકીદાર, મેં પાપ કર્યું હોય તો એમાં મેં જ તમારું શું બગાડયું છે, કે તમે મને તમારા તાકવાનું નિશાન બનાવ્યો છે? શું હું જ તમારે માટે [3] બોજારૂપ છું?

²¹શા માટે તમે મારા અપરાધ ક્ષમા કરતા નથી, અને મારો દોષ દૂર કરતા નથી? કારણ, હું ધૂળમાં પોઢી જાઉં તે પછી તો તમે મને શોધશો, પણ હું હયાત નહિ હોઉં.”